Gưl hriê čhưn mâo boh tŭ yuôm bhăn êdi êjai mkŏ mjing djŏ wưng bi hdơr 50 thŭn mkŏ mjing klei mjĕ giăm Việt Nam - Thái Lan, đru mtrŭt mđĭ klei bi mjĕ Ƀĭng hgŭm phŭn kluôm dhuôm Việt Nam - Thái Lan ƀrư̆ hruê ƀrư̆ đĭ kyar êlam, klă sĭt leh anăn tŭ dưn. Dua čô khua gĭt gai bi tŭ ư lŏ dơ̆ng mđĭ hĭn klei đăo knang kđi čar hluê hŏng bi trông gưl dlông leh anăn dŭm gưl; mđĭ lar klei tŭ dưn dŭm hdră bi hgŭm yuôm bhăn, boh nik hdră bi kƀĭn knŭk kna mbĭt mơ̆ng Khua knŭk kna dua ala čar hrăm mbĭt gĭt gai; bi hgŭm pŏk ngă tŭ dưn Hdră bruă pŏk ngă klei bi hgŭm hdră êlan kluôm dhuôm Việt Nam - Thái Lan wưng thŭn 2026-2031 hŏng dŭm boh tŭ klă klơ̆ng hlăm dŭm mta bruă lĭng kahan, răng mgang klei êđăp ênang, bruă duh mkra, kreh knhâo, kdrăp mrâo, dhar kreh, hiu čhưn ênguê leh anăn mjĕ mjuk mnuih ƀuôn sang.

Dua čô khua gĭt gai bi tŭ ư mtrŭt mđĭ pŏk ngă sĭt êmĭt Hdră "Tlâo hdră mkŏ", mđĭ klei bi hgŭm mkăp mnơ̆ng dhơ̆ng, anôk bruă duh mkra, alŭ wăl leh anăn dŭm hdră mđĭ kyar hơĭt kjăp; ba yua tŭ dưn ktuê êlan duh mkra Ngŏ - Yŭ leh anăn ktuê êlan duh mkra nah Dhŭng; pŏk mlar klei bi hgŭm êlan klông, êlan êdeh phiơr leh anăn êlan êa ksĭ; mtrŭt mđĭ anôk bruă duh mkra dua ala čar pŏk mlar klei duh bi liê; mđĭ lar tŭ dưn klei bhiăn Dhar bruă bi hgŭm mnia blei Việt Nam - Thái Lan, gĭr ktưn hnưm dưi mâo mta kñăm hnơ̆ng bruă mnia blei dua nah 25 êklai USD, mđing truh 50 êklai USD hluê hdră bi knar leh anăn hơĭt kjăp.