Hlăm ai êwa pŏk mlar, sĭt suôr leh anăn đăo knang hdơ̆ng găp, dua čô Khua knŭk kna bi trông leh kơ klei đĭ kyar mơ̆ng klei bi mguôp Việt Nam - Belanda hlăm wưng êgao, bi trông leh anăn bi tŭ ư dŭm hdră êlan čiăng ba yua tŭ dưn klei găl mâo, ba klei bi mguôp kluôm dhuôm truh ti hnơ̆ng mrâo kyua klei tŭ dưn mơ̆ng dua ala čar. Dua tĭng lŏ dơ̆ng mđĭ hĭn klei bi trông êpul, boh nik gưl dlông, mđĭ hĭn klei đăo knang kđi čar, mđing mđĭ klei bi mjĕ jing ƀĭng hgŭm kluôm dhuôm; mbĭt anăn mtă lŏ dơ̆ng bi mguôp, bi đru hdơ̆ng găp hlăm dŭm klei bi kƀĭn lu tĭng leh anăn tar rŏng lăn.

Dua čô Khua knŭk kna ăt bi trông kơ dŭm bruă hlăm alŭ wăl leh anăn tar rŏng lăn bi mđing, mñă klei yuôm bhăn hdră êlan mơ̆ng bruă rơ̆ng klei êđăp ênang, hơĭt kjăp, êđăp ênang leh anăn êngiê êlan êa ksĭ, êlan phiơr ti alŭ wăl leh anăn tar rŏng lăn, hlăm tur knơ̆ng hdră bhiăn tar rŏng lăn boh nik Klei kuôl kă kơ Hdră bhiăn Êa ksĭ 1982 (UNCLOS). Klei bi blŭ hrăm tal êlâo plah wah dua čô Khua knŭk kna Việt Nam lehanăn Belanda mâo leh klei tŭ jing jăk siam, hŏng dŭm hdră êlan bi hgŭm mrâo, pŏk êlan kơ wưng đĭ kyar bŏ hŏng klei čang hmăng kơ klei bi mjĕ Ƀĭng hgŭm kluôm dhuôm Việt Nam - Belanda./.