Klei bi kƀĭn bi trông leh kơ bruă bi leh 3 klei čih mkra hdră bhiăn: Hdră bhiăn lăn ala lŏ mlih mrâo, Hdră bhiăn sang dôk leh anăn Hdră bhiăn mnia mblei sang lăn lŏ mlih mrâo. Khua knŭk kna mñă, 3 klei čih mkra hdră bhiăn mâo klei bi mguôp mbĭt, mâo bruă klam yuôm bhăn hlăm bruă mđĭ lar ai dưi lăn ala, mđĭ kyar wăl anôk mnia mblei sang lăn, sang dôk leh anăn mtrŭt mđĭ klei đĭ kyar bruă duh mkra.

Knŭk kna mĭn tĭng mkŏ mjing klei bi kƀĭn thơ̆ng kơ bruă mkŏ mjing hdră bhiăn hlăm hruê 15/9 čiăng brei klei blŭ êlâo kơ ba mdah kơ Anôk bruă kƀĭn ala. Kơ bruă lăn ala, Khua knŭk kna mtă brei bi leh dŭm klei bhiăn kơ klei jao, brei mưn lăn, klei bi lông, klei bi ktưn, ênoh lăn leh anăn klei mkă tĭng ênoh đĭ mơ̆ng lăn kyua hdră čuăl mkă ba wĭt; mbĭt anăn mlih mrâo klei mĭn hrui mă lăn, mơ̆ng klei tla hnô mnơ̆ng dhơ̆ng jing lŏ mkŏ mjing klei hdĭp kơ mnuih ƀuôn sang. Kơ bruă sang dôk, brei mđing mđĭ kyar sang dôk lu mnuih, bi hrŏ klei mbha čuê čhĭ lăn ti krĭng ƀuôn prŏng, mkŏ mjing klei bhiăn iêo jak duh bi liê sang dôk mưn leh anăn ksiêm dlăng klei duh bi liê mđĭ ênoh čhĭ lăn.