Blŭ hrăm ti anôk bi tuôm, Khua bruă kƀĭn ala Trần Thanh Mẫn čih yap, bi mni dŭm klei đru mguôp jăk mơ̆ng phung mniê bi ala bruă kƀĭn ala leh anăn phung knuă druh mniê hlăm bruă mkŏ mjing hdră bhiăn, ksiêm dlăng leh anăn bi mklă dŭm bruă yuôm bhăn mơ̆ng lăn čar. Bruă kƀĭn ala gưl XVI mâo 150 čô mniê bi ala, truh hlăm brô 30% ênoh phung bi ala.

Khua bruă kƀĭn ala mtă kơ phung mniê bi ala lŏ dơ̆ng mđĭ lar klei thâo, klei jhŏng, ai tiê mlih mrâo; mđĭ hnơ̆ng tŭ ksiêm dlăng, bi mklă dŭm hdră bhiăn, boh nik dŭm hdră êlan djŏ tuôm kơ klei hdĭp yang ƀuôn, mtô bi hriăm, mdrao mgŭn, bruă mă, klei tŭ dưn phung mniê leh anăn phung hđeh. Mbĭt anăn, lŏ dơ̆ng jing kdrông mkŏ plah wah phung bi ala hŏng anôk bruă kƀĭn ala, hưn mdah klei mĭn, klei čiăng mơ̆ng mnuih ƀuôn sang, boh nik phung mniê leh anăn mnuih djuê ƀiă.