Hruê mbruê 10/09, ti Anôk bruă knŭk kna, Khua knŭk kna Lê Minh Hưng gĭt gai mmông mă bruă hŏng Phŭn bruă ngăn prăk mbĭt hŏng dŭm phŭn, dhar bruă djŏ tuôm kñăm hmư̆ klei hưn mdah kơ klei mĭn tĭng hlăm dŭm hdră tă prŏng, yuôm bhăn čiăng bi leh hră mơar dŭm klei čih mkra Hdră bhiăn, mâo: Hdră bhiăn ngăn prăk knŭk kna (bi mguôp); Hdră bhiăn bi lông rŭ mdơ̆ng (mkra mlih), Hdră bhiăn mkra mlih thiăm mbŏ dŭm mta mơ̆ng Hdră bhiăn duh bi liê, Hdră bhiăn mđĭ kyar anôk bruă duh mkra điêt leh anăn man dưn mĭn tĭng ba mdah kơ Anôk bruă kƀĭn ala klei mĭn tĭng ti Klei bi kƀĭn tal 2 kơ anăp.

Khua knŭk kna Lê Minh Hưng brei thâo, anei jing dŭm klei bhiăn hmăi klă anăp kơ wăl anôk duh bi liê mnia mblei, kah mbha leh anăn ba yua dŭm ai dưi, bruă ngă mơ̆ng anôk bruă duh mkra, bi kluôm ênŭm wăl anôk hdră bhiăn, mđĭ hnơ̆ng klei dưi bi ktưn mơ̆ng hdră duh mkra, anôk bruă duh mkra, kyua anăn, bruă mkŏ mjing 4 hdră bhiăn brei mdưm hlăm kluôm klei čiăng bi klă hdră bhiăn hmao, djăp ênŭm dŭm hdră êlan prŏng mơ̆ng Đảng, boh nik Hdră mtrŭn Klei bi kƀĭn tal XIV mơ̆ng Đảng, dŭm hdră mtrŭn, klei klah čŭn mơ̆ng Gưl dlông.