Aguah mbrue (21/09) ti Anôk bruă knŭk kna, Khua knŭk kna Lê Minh Hưng gĭt gai mmông mă bruă hŏng Phŭn bruă sang hră mtô bi hriăm mbĭt hŏng dŭm phŭn, dhar bruă djŏ tuôm, kñăm mđing mghaih msir mjêč klei kƀah hdruôm hră hriăm kơ thŭn hriăm 2026-2027; ksiêm dlăng hdră, hdruôm hră hriăm mtô bi hriăm leh anăn mprăp Êpul ksiêm dlăng thơ̆ng kơ bruă hluê ngă Hdră mtrŭn mrô 71 hruê 22/8/2025 mơ̆ng Phŭn bruă kđi čar kơ mđĭ kyar mtô bi hriăm leh anăn mtô bi hriăm.

Khua knŭk kna Lê Minh Hưng mñă klă, thŭn hriăm 2026-2027 jing thŭn tal êlâo kluôm ala pŏk ngă hdruôm hră mtô bi hriăm sa hnơ̆ng hlăm kluôm ala. Wăt tơdah Khua gĭt gai Đảng, Knŭk kna leh anăn Knŭk kna gĭt gai mơ̆ng hnưm, ƀiădah khă gơ̆ mŭt hlăm thŭn hriăm mrâo giăm sa mlan, ti dŭm alŭ wăl ăt mâo klei hđeh sang hră kƀah hdruôm hră hriăm. Hluê si klei hưn, ênoh hdruôm hră adôk kƀah ară anei hlăm brô 776.000 hdruôm (truh 0.31%), Khua knŭk kna mñă klă, anei jing bruă mjêč mâo ala ƀuôn mđing dlăng êdi, mtă kơ Phŭn bruă sang hră mtô bi hriăm bi hgŭm kjăp hŏng dŭm alŭ wăl, Knơ̆ng bruă sang hră mtô bi hriăm ksiêm dlăng klă klơ̆ng grăp mta hdruôm hră, klei hriăm adôk kƀah čiăng mâo hdră msir mghaih jih, čiăng rơ̆ng mkăp djăp hdruôm hră hlăm wưng pral hĭn.