Blŭ hrăm hŏng phung hriăm adŭ mjuăt bi hriăm, mđĭ klei thâo kơ bruă "Mđĭ klei dưi gĭt gai mơ̆ng Knŭk kna, mjing boh kdrŭt ktang kơ klei đĭ kyar pral, hơĭt kjăp leh anăn đĭ kyar dua ênoh mrô", Khua knŭk kna Lê Minh Hưng mñă klă, Klei bi kƀĭn tal XIV mơ̆ng Đảng jing gru kruăk hƀuê ênuk yuôm bhăn, klă klơ̆ng pŏk ênuk đĭ kyar mrâo mơ̆ng djuê ana Việt Nam.

Čiăng bi sĭt dua mta kñăm hdră êlan 100 thŭn (truh thŭn 2030, jing ala čar dôk đĭ kyar mâo bruă tuh tia mkra mjing mrâo mrang, hnư hrui wĭt man dưn lu leh anăn truh thŭn 2045, jing ala čar đĭ kyar, hnư hrui wĭt lu), ktuê êlan 5 thŭn 2026-2031 mâo boh tŭ yuôm bhăn, mjing tur knơ̆ng kjăp kơ wưng kơ anăp, hlăm anăn, bruă duh mkra brei đĭ kyar, mâo hnơ̆ng đĭ kyar dua ênoh mrô. Mbĭt hŏng dŭm hdră êlan, hdră mtrŭn prŏng, djŏ klă, mâo klei kdlưn hĭn mơ̆ng Đảng, Knŭk kna, sa mta phŭn yuôm bhăn čiăng dưi bi sĭt mta kñăm ti dlông jing brei mkŏ mjing dŭm klei mlih jăk, ktang, klă sĭt kơ ai dưi gĭt gai mơ̆ng Knŭk kna, mbĭt anăn mđĭ lar ai dưi hluê ngă mơ̆ng dŭm gưl, dhar bruă leh anăn alŭ wăl.