Hlăm sang maĭ mrâo bi leh mơ̆ng Knơ̆ng bruă tuh tia mkra mjing msei Trần Hồng Quân, wăl tuh tia mkra mjing Nhân Cơ, čar Lâm Đồng, dŭm hdră mkra mjing dơ̆ng bi êran. Leh bruă bi rai hŏng pui kmlă, msei lik dưi tuh hlăm jar, bi êăt leh anăn hluê hdră mkra mjing jing dŭm klŏ ksueh tal êlâo mâo anăn knăl Việt Nam.

Trần Hồng Quân, Khua knơ̆ng bruă Tuh tia mkra mjing msei Trần Hồng Quân brei thâo, gưl tal êlâo mơ̆ng sang maĭ 450.000 ton/thŭn, dưi ngă bruă jăk. Anôk bruă duh mkra mĭn tĭng mđĭ truh 300.000 ton/thŭn hlăm gưl IV thŭn anei leh anăn djăp ênŭm hnơ̆ng kčah hlăm gưl I/2027. Ti tluôn dŭm klŏ ksueh tal êlâo anăn jing hdră êbeh sa pluh thŭn găn lu klei dleh dlan kơ prăk kăk, kdrăp mă bruă, kdrăp mnơ̆ng leh anăn anôk bruă nah gŭ.

 “11 thŭn dôk guôn, truh kơ ară anei, Knơ̆ng bruă tuh tia mrka mjing msei Trần Hồng Quân ktưn hưn hưn mthâo klŏ ksueh tal êlâo mơ̆ng Việt Nam. Hlăm hdră rŭ mdơ̆ng sang mkra mjing tuôm hŏng lu klei dleh dlan, gun kpăk. Ƀiădah, hŏng klei uêñ mĭn gĭt gai mơ̆ng Đảng, Knŭk kna, klei hrăm mbĭt mơ̆ng bruă sang čư̆ êa alŭ wăl, dŭm êpul bruă ngăn prăk, ƀĭng hgŭm leh anăn jih jang knuă druh, mnuih mă bruă, hmei ƀrư̆ ƀrư̆ dưi găn čiăng bi leh hdră bruă".

Klŏ ksueh tal êlâo amâo djŏ knŏng bi klă sa mta mnơ̆ng mrâo dưi mkra mjing hlăm ala čar. Tơdah mâo hnơ̆ng grăp thŭn 450.000 ton, ênoh mkra mjing mơ̆ng hdră bruă dưi mâo hlăm brô 1 êklai 400 êbâo USD grăp thŭn, bi knar hŏng 36.000 êklai prăk. Mbĭt hŏng 1.000 čô mnuih mă bruă klă anăp mâo klei thâo, hdră mnêč leh anăn kriê dlăng, hdră bruă dưi mjing thiăm hlăm brô 3.500 truh 4.000 bruă mă hlăm bruă mkăp mnơ̆ng dhơ̆ng, pui kmlă, dŭ mdiăng, logistics, kdrăp mnơ̆ng, bruă nah tluôn leh anăn mnia mblei.

Hŏng Nhân Cơ, dŭm ênoh mrô anei dôk pŏk sa wăl đĭ kyar mrâo. Klei čiăng mnuih mă bruă hdră mnêč, sang dôk, dŭ mdiăng, logistics, mnia blei, hdră bruă srăng đĭ hlue si gru hmô sang mkra mjing. Alŭ wăl ăt dôk mprăp keh lăn čiăng drông dŭm hdră bruă tuh tia mkra mjing êdei anăp.

 Hlue si Phan Anh Tuấn, Khua bruă Đảng să Nhân Cơ, đa đa mnuih mă bruă mda asei dưi ba nao hriăm čiăng mprăp mă bruă ti sang mkra mjing. Kbưi hĭn, alŭ wăl dôk tĭng mkă hdră mkŏ mkra Wăl tuh tia mkra mjing Nhân Cơ 2 hlăm brô 400 ha; mbĭt anăn mprăp anôk ala kơ sang dôk kơ mnuih mă bruă, phung thơ̆ng kơ bruă, logistics, mnia mblei leh anăn dŭm hdră bruă mkra mjing êlam êdei kơ alumin.

“Bi kơ wưng sui, hŏng Nhân Cơ snăn hmei ăt mprăp leh dŭm klei găl čiăng iêo jak klei duh bi liê, mtrŭt mđĭ klei duh bi liê, iêo jak phung duh bi liê mŭt hlăm bruă pŏk ngă dŭm mta mnơ̆ng dhơ̆ng êlam mơ̆ng ksueh. Ară anei sang mkra mjing mrâo mkra mjing leh ksueh klŏ, ka ba yua ôh dŭm mta mnơ̆ng dhơ̆ng êdei kơ ksueh… Hmei mprăp leh ênoh lăn, čuăl mkă anôk bruă tuh tia, logistics, bruă mnia mblei čiăng drông kơ klei mđĭ kyar hlăm wưng kơ anăp”.

Amâo djŏ knŏng mkra mjing ksueh klŏ ôh, sang mkra mjing dôk srăng pŏk mlar wăt sa hdră mkra mjing nah tluôn. Ksueh msei dưi jing mnơ̆ng pioh kơ dŭm bruă mkra mjing, mnơ̆ng yua mrâo, kdrăp điện tử, êlan klông dŭ mdiăng leh anăn pui kmlă lŏ mkra mjing. Anăn ăt jing hdră mđĭ kyar Lâm Đồng kčah leh gru kruăk mkra mjing tŭ jing ksueh klŏ tal êlâo. Y Thanh Hà Niê Kđăm, Khua hlăm bruă Đảng gưl dlông, Khua bruă Đảng čar Lâm Đồng bi mklă:

“Mơ̆ng mnơ̆ng dhơ̆ng ksueh tal êlâo, amâo djŏ knŏng mâo boh tŭ yuôm hlăm bruă mkra mjing ôh ƀiădah lŏ pŏk klei găl mkŏ mjing hdră duh mkra mrâo, iêo jak dŭm anôk bruă mkra mjing, mnơ̆ng dhơ̆ng mrâo, bruă nah tluôn, kdrăp điện tử, bruă êlan klông dŭ mdiăng, bruă pui kmlă mrâo mrang leh anăn lu bruă kreh knhâo mrâo mrang đĭ kyar ti čar Lâm Đồng ăt msĕ mơh krĭng Lăn Dap Kngư".

Mơ̆ng lăn hrah bazan truh kơ dŭm klŏ ksueh ƀlêč ƀlir êa kông jing hdră ba mnơ̆ng dhơ̆ng đĭ sa knhuang hlăm hdră mđĭ boh tŭ yuôm. Tơdah klŏ ksueh hlơr ti Nhân Cơ, Lâm Đồng lŏ dơ̆ng dưi bi mguôp hŏng dŭm sang mkra mjing êlam, boh tŭ yuôm mơ̆ng bauxit Lăn Dap Kngư srăng amâo djŏ knŏng dưi tĭng hŏng hnơ̆ng mnơ̆ng dhơ̆ng hrui mă ôh, ƀiădah hŏng bruă tuh tia, bruă mă leh anăn boh tŭ yuôm dưi mkra mjing ti krĭng lăn anei.