Hlăm êbeh 1 ha lăn hma mơ̆ng gŏ sang Nguyễn Trung Đông, ti alŭ Čư̆ Ty 4, să Đức Cơ, čar Gia Lai, dŭm anôk klưh hlăm krah đang kphê. Lu kdrêč lăn klưh trŭn, ktŭng ba ana pla mjing. Ayŏng Đông đăo tĭng mâo dŭm êtuh phŭn kphê mâo klei luič liê. Ayŏng hŭi hyưt êdi kyua klei klưh anei mâo leh mơ̆ng dŭm thŭn êlâo, ƀiădah thŭn anei lŏ dơ̆ng đĭ lar, lar prŏng leh dŭm gưl adiê hjan prŏng. Mbĭt hŏng hma mơ̆ng ayŏng Đông, lŏ mâo hma mơ̆ng 2 gŏ sang mkăn hlăm alŭ mâo klei msĕ snăn, hŏng boh taih truh 1,5km.

 "Êlam ară anei ti dlông krah war trŭn hlăm brô 1 met 2 leh, ka thâo ôh si srăng mghaih msir. Mprăp wĭt hrui pĕ leh ƀiădah wĭt kơ war kphê amâo jhŏng nao ôh. Klei klưh hĕ kyua agha kphê guôm hĕ, pô bi mĭn amâo mâo jăk ôh, êbat lŏ klưh hĕ. Klưh hĕ jih jơ̆ng nah gŭ leh, amâo jhŏng lŏ trŭn kơ war kphê ôh."

Boh tŭ ksiêm dlăng tal êlâo mơ̆ng Knơ̆ng bruă sang čư̆ êa să Đức Cơ brei ƀuh, krĭng klưh lăn ti alŭ Čư̆ Ty 4 mâo leh klei bi mlih klưh lăn, klưh ƀrôč leh anăn mâo klei bi knăl klưh hroh, hmăi lu ha lăn pla mjing mơ̆ng 3 gŏ sang. Knơ̆ng bruă sang čư̆ êa să čuăl krĭng hưn brei răng, mtă kơ mnuih ƀuôn sang, boh nik phung hđeh, đăm mŭt ôh hlăm dŭm anôk klưh leh anăn amâo ba kdrăp maĭ mŏk ngă bruă ti krĭng klưh. Nguyễn Văn Tuyến, Khua knơ̆ng bruă sang čư̆ êa să Đức Cơ brei thâo, să mâo leh hră m'ar akâo kơ knơ̆ng bruă lŏ hma leh anăn wăl hdĭp mda čar Gia Lai bi mklă phŭn agha, hnơ̆ng hmăi leh anăn hnơ̆ng huĭ hyưt čiăng ktrâo lač bi hrŏ klei mkra mjing leh anăn ruah hdră msir mgaih êđăp ênang.

"Anôk anăn êlâo kơ kdriêk iêo leh knơ̆ng bruă ngăn dŏ trŭn ksiêm dlăng jih leh. Hjan lu hŏng dŭm anôk lăn čŏng čư̆ čhiăng, sui hruê hjan dua mlan mtam. Tal êlâo hâo hưn, mtrŭt mjhar mnuih ƀuôn sang hưn răng: tơdah nao ngă pưk hma giăm anăn răng bĕ jih ai tiê, amâo myun lĕ buh hlăm dŭm anôk anăn ƀuh huĭ hyưt. Truh kơ anei, să srăng tĭng mkă hdră mkŏ mdơ̆ng pŏk mdhă hưn brei răng đăm lĕ hlăm klei huĭ hyưt."

Klei klưh hroh, klưh lăn ti tĭng Yŭ čar Gia Lai mâo ktang hlăm dŭm thŭn giăm anei, boh nik ti dŭm să Ia Krêl, Ia Ly leh anăn să Gào, hmăi truh kơ lŏ, hma leh anăn ngă jhat rai anôk bruă êlan klông. Ngô Vĩnh Khánh, khua kiă kriê knơ̆ng bruă sang čư̆ êa čar Gia Lai brei thâo, hŏng dŭm anôk klưh hroh huĭ hyưt kơ wăl mnuih ƀuôn sang dôk, dŭm alŭ wăl dưi mtă brei čuăl krĭng hưn brei răng, ksiêm dlăng bi kjăp amâodah mbĕ đuĕ mnuih ƀuôn sang. Hŏng lăn hma luič liê, Knơ̆ng bruă lŏ hma leh anăn wăl hdĭp mda akâo ksiêm dlăng, čih yap klă klơ̆ng čiăng ngă tur knơ̆ng đru kčĕ.

"Ară anei, hŏng dŭm anôk klưh hroh, knơ̆ng bruă mâo hră mơar mơĭt kơ dŭm alŭ wăl hưn mthâo klei luič liê, tĭng kơ anăn srăng đru lŏ krŭ wĭt bruă duh mkra. Leh mâo klei luič liê mơ̆ng dŭm alŭ wăl mơĭt kơ knơ̆ng bruă lŏ hma srăng bi kƀĭn mta phŭn mơĭt kơ knơ̆ng bruă ngăn prăk čiăng tĭng kơ anăn mbha đru kơ dŭm alŭ wăl mkăp kơ bruă duh mkra."

Mbĭt hŏng klei đru ti anăp, bruă ksiêm dlăng kjăp dŭm krĭng huĭ srăng klưh hroh, klưh lăn ti čar Gia Lai srăng đru kơ alŭ wăl ƀrư̆ ƀrư̆ duah hdră msir djŏ guôp čiăng răng mgang anôk dôk leh anăn mkra mjing mơ̆ng mnuih ƀuôn sang. Anăn ăt jing tur knơ̆ng čiăng kơ mnuih ƀuôn sang hơĭt ai tiê mkra mjing.