Ti alŭ Mê Ka, să Dam Rông 4, gŏ sang ayŏng Liêng Hót Ha Ngát mprăp leh djăp ênŭm hdruôm hră, čhum ao, giê čih kơ dua čô anak, sa čô hđeh hriăm adŭ 11, sa čô hđeh hriăm adŭ 4. Hdĭp ti să dleh dlan êdi, klei hdĭp adôk lu klei kƀah, ƀiădah hŏng ayŏng Ngát, duh bi liê kơ bruă hriăm hră mơ̆ng anak jing klei duh bi liê amâo dưi kƀah ôh. Ñu lač, hlăm sa yang ƀuôn ƀrư̆ hruê ƀrư̆ mrâo mrang, klei thâo săng jing mnơ̆ng pioh kơ phung hđeh gưl mrâo dưi păn kjăp klei găl leh anăn amâo lui kơ tluôn.

"Hriăm hră jing yuôm bhăn snăk čiăng kơ êdei anei mâo klei găl čiăng kơ anak čô đĭ kyar hĭn. Amâo dưi ôh lui phung hđeh dôk ti tluôn. Kyua êdei anei kdrăp mrâo mrang leh anăn bi mrâo mrang lăn čar čiăng kơ lu klei thâo, čiăng kơ lu hnơ̆ng mdê mdê. Khădah dleh dlan ƀiădah brei gĭr kơ phung hđeh nao sang hră".

Klei năng mơak jing klei mĭn anăn ƀrư̆ hruê ƀrư̆ mâo lu hlăm dŭm ƀuôn sang krĭng mnuih djuê ƀiă ti Lâm Đồng. Grăp yan nao sang hră, dŭm gŏ sang čŏng mprăp prăk blei hdruôm hră, čhum ao, mnơ̆ng yua hriăm hră; dŭm gŏ sang dôk dleh dlan ăt gĭr ktưn, đa đa lŏ čan čiăng kơ anak čô djăp klei găl nao sang hră. Amâo djŏ knŏng mđing dlăng dŭm klei čiăng ti anăp, lu gŏ sang lŏ mđing kơ hdră tă kơ anak čô hriăm hră, bruă mă leh anăn kriê pioh knhuah dhar kreh. Diñu thâo săng, hriăm čiăng mâo klei thâo, mâo bruă mă, ƀiădah ăt jing hdră čiăng kơ phung hđeh lŏ đăo knang tơdah kbiă mơ̆ng ƀuôn sang. Ayŏng Liêng Hát The, mnuih K'Ho ti alŭ Bắc Tà Nung, ƀuôn hgŭm Cam Ly - Đà Lạt, brei thâo:

“Gưl gŏ sang snăn mâo leh klei ktrâo atăt kơ anak klă mngač klei bhiăn djuê ana anăn jing phŭn. Mơ̆ng anăn tơdah phung anak prŏng hriăm hră bi mguôp, mjĕ mjuk hlăm sang hră srăng hưn mdah, hưn mthâo kơ phung ƀĭng găp hlăm sang hră. Mgi dih phung anak mă bruă ti dŭm anôk bruă snăn mơh srăng ƀuh klei ktưn hưn kơ knhuah gru pô”.

Tơdah klei čŏng pô mơ̆ng phung amĭ ama mjing tur knơ̆ng mơ̆ng gŏ sang, snăn ti sang hră, bruă mprăp kơ thŭn hriăm mrâo ăt dưi pŏk ngă mơ̆ng hnưm. Ti să dleh dlan Đam Rông 4, thŭn hriăm anei mâo êbeh 4.300 čô hđeh mơ̆ng gưl hđeh điêt truh kơ Gưl 2, lu jing anak aneh mnuih djuê ƀiă. Dŭm boh sang hră dưi duh bi liê kjăp siam, doh mngač; adŭ hriăm, wăl anôk lehanăn dŭm klei găl mkăp kơ hdră mtô, hriăm dưi mprăp jăk. Nai mtô Phạm Thị Ngọc Bích, Khua sang hră Gưl hđeh điêt Đạ Tông, să Đam Rông 4, brei thâo:

“Ti adŭ hriăm snăn nai mtô jih ai tiê mkŏ mjing wăl hriăm hlăm adŭ jăk êdi. Truh ti adŭ hriăm phung hđeh dưi lông ngă dŭm mta bruă djŏ guôp snăn jing dưi iêo jak phung hđeh. Sang hră hđeh điêt Dă Tông ăt kreh mkŏ mjing nanao dŭm mta bruă bi mjĕ mjuk mâo klei lông ngă mơ̆ng phung amĭ ama, nai mtô leh anăn phung hđeh snăn phung amĭ ama ƀrư̆ hruê ƀrư̆ hơĭt ai tiê ba anak aneh kơ sang hră”.

Lâm Đồng ară anei mâo 100 să hlăm krĭng mnuih djuê ƀiă leh anăn krĭng čư̆ čhiăng; hlăm anăn mâo 27 să dleh dlan êdi, 5 să knông lăn leh anăn wăl krah Phú Quý. Kluôm čar mâo êbeh 182.000 čô hđeh mnuih djuê ƀiă. Ti dŭm krĭng adôk lu klei dleh dlan, êlan nao sang hră pŏk leh klei găl dưi mâo klei thâo săng, jing sa hlăm dŭm boh phŭn đru kơ mnuih ƀuôn sang bi mlih klei hdĭp.

Ntơr Ha Krong, ti ƀuôn Dă Nhinh, să Dam Rông 4, mâo 3 čô anak hriăm leh gưl prŏng. Mơ̆ng klei yăl dliê mơ̆ng gŏ sang pô, ñu ƀrư̆ đăo knang, mâo klei thâo săng snăn kơh mnuih ƀuôn sang dưi lŏ mâo klei thâo kiă kriê klei hdĭp, mơ̆ng bruă duh mkra truh kơ klei thâo ba yua dŭm klei mrâo mrang.

“Êlâo adih hriăm hră amâo mâo lu ôh ƀiădah ară anei tơdah amâo mâo boh hră snăn amâo dưi ngă ôh. Wăt tơdah pô amâo ngă prŏng prĭn ôh knŏng pô thâo dlăng kriê ana pla mjing amâodah dưi dlăng hră ya jing hbâo pruê ăt čiăng mâo boh hră mơh. Ară anei tơdah mnuih djăp klei găl nao sang hră gưl prŏng jih. Mơ̆ng mâo boh hră kơh dưi mđĭ kyar djăp mta bruă hlăm klei hdĭp”.

Ênai hgơr mphŭn pŏk thŭn hriăm mrâo kwang leh hlăm djăp alŭ ƀuôn ti čar Lâm Đồng, ba hriê klei hơ̆k mơak êlâo kơ thŭn hriăm mrâo. Klei hơ̆k mơak anăn bi êdah mơ̆ng klei knŭk kna duh bi liê kơ bruă sang hră mơar, klei jih ai tiê mơ̆ng phung nai mtô, truh kơ klei kriê dlăng, klei gĭr mơ̆ng grăp gŏ sang mnuih djuê ƀiă. Anei jing mnơ̆ng pioh kơ phung hđeh krĭng mnuih djuê ƀiă mơ̆ng čar Lâm Đồng hơĭt ai tiê mŭt hlăm adŭ hriăm, đĭ hriê kơ prŏng čih dŭm klei yăl dliê kơ êdei anăp mngač tač ti krĭng lăn pô mtam./.