Thŭn anei adei Nguyễn Ngọc Minh Tâm ti ƀuôn Brang, să knông lăn Ia Púch, nao hriăm adŭ 7. Anei jing gưl tal êlâo ñu kbưi hŏng gŏ sang, dôk ti sang hră leh anăn knhal jih hruê kăm kơh wĭt kơ sang. Thŭn hriăm mrâo, mŭt hlăm wăl hriăm mrâo, mâo klei găl hriăm, mjuăt ktang asei mlei, hlăp lêñ ngă kơ ñu Tâm hơ̆k mơak êdi.

Kâo hơ̆k mơak êdi hlăm thŭn hriăm mrâo kyua kâo dưi hriăm thiăm lu klei thâo, lu klei hriăm leh anăn mâo thiăm mmông čiăng hriăm klei hriăm. Đa đa amâo thâo săng dŭm klei hriăm, kâo dưi êmuh mtam nai mtô leh anăn amâo guôn dôk guôn truh kơ hruê êdei ôh. Êngao kơ mmông hriăm, hmei lŏ dưi ngă klei lông dlăng, nao ti sang dlăng hră ksiêm dlăng hdruôm hră amâo dah mmông tlam nao hlăp čưng boh, čưng ksu. Anăn jing mmông hơ̆k mơak."

Mbĭt hŏng klei hơ̆k mơak mơ̆ng phung hđeh jing klei mơak, klei êđăp ênang leh anăn bi hrŏ klei ktrŏ mơ̆ng phung amĭ ama tơdah anak čô dưi hriăm leh anăn dôk hlăm sang hră. Thŭn hriăm anei, jih dua čô anak ñu Rơ Mah Ca, djuê ana Jarai, ti ƀuôn Čư̆ Kŏ, să Ia Pŭch, nao hriăm ti sang hră sơăi. Ung mô̆ ñu jing mnuih mă bruă kuai ktăk ksu, kreh đuê̆ mơ̆ng sang mă bruă mơ̆ng aguah ưm, lehanăn lŏ ktrŏ wĭt čiăng pral ba anak nao sang hră mơar. Truh yan pưk hma amâodah dŭm hruê hjan prŏng, êlan klông jhat rai, amâo mâo hmao atăt ba, ñu lui yơh phung anak mdei hriăm ti sang.

 Ară anei, tơdah phung anak dưi dôk dơ̆ng ƀơ̆ng huă, hriăm hră mơar leh anăn hdĭp mda ti sang hră mơ̆ng akŏ hruê kăm truh kơ knhal jih hruê kăm. Ung mô̆ Rơ Mah Ca amâo lŏ dleh dlan ôh hlăm bruă găn êrô grăp hruê, phung anak ăt bi hrŏ klei huĭ srăng mdei sang hră kyua klei gun kpăk mơ̆ng gŏ sang leh anăn êlan klông.

"Lač jăk kơ Đảng leh anăn Knŭk kna rŭ mdơ̆ng leh sang hră knŭk kna čiêm rông. Mơ̆ng ară anei, phung anak kâo dưi hriăm hră, huă ƀơ̆ng, mdei msăn, hlăp lêñ hlăm sang hră, truh kơ knhal jih hruê kăm kơh wĭt. Kâo hơ̆k mơak êdi."

Sang hră knŭk kna rông ba mlir gưl hriăm gưl sa lehanăn gưl dua Ia Púch thŭn hriăm anei mâo 752 čô hđeh, dưi mkŏ mjing 23 adŭ. Čiăng kơ phung amĭ ama thâo săng lehanăn tŭ ư hŏng hdră hriăm mrâo, mơ̆ng knhal jih thŭn hriăm 2025-2026, să Ia Púch bi hgŭm hŏng dŭm sang hră gưl sa, gưl dua ti alŭ wăl mkŏ mjing hdră mkŏ mjing sang hră knŭk kna rông ba mlir gưl hriăm gưl sa lehanăn gưl dua. Hlăm dŭm mlan yan mdei prŏng, bruă hrŏng ruah, dăp phung nai, mkŏ dăp adŭ hriăm, anôk huă ƀơ̆ng lehanăn dŭm hdră mtô bi hriăm dưi pŏk ngă mđrăm mbĭt.

 Nai Trương Duy Hồng, nai mtô sang hră brei thâo, bruă pŏk ngă sang hră knŭk kna čiêm rông ăt brei nai mtô bi mlih hdră mkŏ mjing leh anăn kriê dlăng phung hđeh sang hră. Nai mtô khua gĭt gai mkŏ mjing leh êpul Zalo, bi kƀĭn leh anăn blŭ hrăm klă anăp hŏng grăp gŏ sang čiăng kơ phung amĭ ama thâo klă klei hriăm hră, huă ƀơ̆ng, hdĭp mda mơ̆ng anak.

“Phung nai kiă adŭ bi kƀĭn leh phung amĭ ama, mơĭt klei čih hưn kơ phung amĭ ama bi trông kơ hdră ngă bruă mơ̆ng gru hmô dôk jưh lehanăn dôk đih đăm. Đa đa phung amĭ ama hơĭt ai tiê êdi. Kyua diñu thâo săng gru hmô sang hră mrâo prŏng êdi, djăp ênŭm bruă ngă, anôk hlăp lêñ, huă ƀơ̆ng, mdei săn, êđăp ênang êdi”.

Mbĭt hŏng Sang hră knŭk kna čiêm rông hđeh mnuih djuê ana ƀiă gưl sa lehanăn gưl dua Ia Púch, thŭn hriăm 2026-2027, krĭng nah Yŭ čar Gia Lai lŏ mâo 6 boh sang hră hŏng gru hmô nao hlăm klei ngă bruă, drông hđeh sang hră ti dŭm să knông lăn. Dŭm hdră bruă dưi mphŭn rŭ mdơ̆ng mơ̆ng mlan 11/2025, truh kơ ară anei dưi ngă leh dŭm mta bruă yuôm bhăn pioh kơ klei mtô bi hriăm, klei huă ƀơ̆ng lehanăn klei dôk dơ̆ng ƀơ̆ng huă. Jih jang 7 boh sang hră mâo hrŏng ruah leh êbeh 6.800 čô hđeh sang hră, lu jing hđeh sang hră knŭk kna čiêm rông lehanăn sang hră knŭk kna čiêm rông.

Anei jing klei bi mlih năng mđing êdi hŏng krĭng knông lăn nah Yŭ Gia Lai, anôk mâo hlăm brô 90 km êlan knông lăn, lu mnuih ƀuôn sang djuê ana ƀiă hdĭp mda lehanăn klei găl êrô êbat, hriăm hră mơ̆ng phung hđeh adôk amâo djŏ ƀiă ôh klei dleh dlan. Hŏng gru hmô mrâo, phung hđeh amâo djŏ knŏng mâo thiăm adŭ hriăm, anôk huă ƀơ̆ng ƀiădah lŏ mâo wăl anôk pioh dlăng hră, hlăp lêñ lehanăn nao hgŭm hlăm dŭm hdră mtô bi hriăm êngao mmông. Yuôm bhăn hĭn, klei hriăm hră mơ̆ng phung hđeh dưi krơ̆ng kjăp, hrô kơ klei jưh knang lu đei kơ klei găl atăt ba lehanăn hdĭp mda mơ̆ng grăp gŏ sang.

Phạm Văn Nam, Khua Knơ̆ng bruă sang hră mtô bi hriăm čar Gia Lai brei thâo, dŭm sang hră knŭk kna rông ba mlir gưl srăng đru bi hrŏ klei bi kpleh bruă mtô bi hriăm plah wah krĭng knông lăn hŏng dŭm krĭng găl hĭn, mbĭt anăn mjing mnuih mă bruă ti alŭ wăl kơ alŭ wăl.

"Sang hră knŭk kna rông ba mlir gưl ti dŭm să knông lăn mâo boh tŭ yuôm bhăn êdi. Phung hđeh srăng dưi kriê dlăng, rông ba jăk, jih ai tiê čiăng mâo klei găl hriăm hră jăk hĭn, đru mguôp bi mlih klei thâo săng. Kyua dŭm boh sang hră anei srăng mtô mjuăt mnuih mă bruă hnơ̆ng tŭ jăk čiăng êdei anei phung hđeh lŏ wĭt duh myơr kơ ƀuôn sang pô, đru mđĭ kyar bruă duh mkra - ala ƀuôn ti alŭ wăl."

Mơ̆ng yan hriăm mrâo anei, phung hđeh krĭng knông lăn nah Yŭ mơ̆ng čar Gia Lai mphŭn dưi hriăm hră, huă ƀơ̆ng leh anăn mjuăt ktang asei mlei hlăm sa wăl anôk mtô bi hriăm mđrăm mbĭt. Sang hră knŭk kna rông ba mlir gưl hriăm mrâo amâo djŏ knŏng mkra mđĭ klei găl hriăm hră hruê anei, ƀiădah lŏ jing anôk đru dlăng ba, mđĭ ai kơ phung hđeh krĭng knông lăn ti alŭ wăl.