-Knăm mơak boh durian Dak Lak thŭn 2026 mâo 17 mta bruă phŭn. Êdah êdi msĕ si: knăm mphŭn pŏk ti Wăl tač 10/3; Klei bi kƀĭn trông kơ wăl hdĭp mda boh durian hơĭt kjăp; knăm mơak mnơ̆ng ƀơ̆ng huă mđing truh kơ bruă bi klă hnơ̆ng čuăn Việt Nam hŏng 102 mta mnơ̆ng ƀơ̆ng mkra mjing mơ̆ng boh durian; anôk rang mdah thơ̆ng kơ boh durian leh anăn mnơ̆ng dhơ̆ng OCOP; dŭm tuôr tui ksiêm đang boh durian mguôp hŏng hdră hiu čhưn ênguê dhar kreh - wăl hdĭp mda; mbĭt hŏng lu hdră kdŏ mmuñ, rang mdah leh anăn mtrŭt mđĭ bruă mnia mblei…

- Klă klơ̆ng, anôk rang mdah thơ̆ng kơ bruă boh durian leh anăn mnơ̆ng dhơ̆ng OCOP mâo 310 anôk rang mdah. Kơ bruă hiu čhưn ênguê, dŭm anôk bruă mkŏ mjing 8 hdră tui ksiêm. Hdră 500 boh êdeh mdiăng mnơ̆ng hưn mdah boh durian hŏng êlan mơ̆ng Krông Pač truh kơ Ƀuôn Ama Thuôt. Hdră kdŏ mmuñ lehanăn wăl anôk mnơ̆ng ƀơ̆ng hưn mdah 102 mta mnơ̆ng ƀơ̆ng mkra mjing mơ̆ng boh durian. Klei bi lông êran Tuy Hòa 2026 "Drông adiê ang dar ti êa ksĭ" jak iêô hlăm brô 2.600 čô čih anăn bi lông…

 - Knăm mơak mnơ̆ng ƀơ̆ng durian Dak Lak dưi mkŏ mjing ti wăl anôk Hdră bruă Eco Palace, ƀuôn hgŭm Ƀuôn Ama Thuôt. Ti anei lŏ hưn mthâo mnơ̆ng dhơ̆ng lŏ hma, mnơ̆ng jăk alŭ wăl, mnơ̆ng dhơ̆ng hiu čhưn ênguê, dhar kreh Lăn Dap Kngư, ƀuôn bruă djuê ana mơ̆ng đưm leh anăn dŭm mta mnơ̆ng ƀơ̆ng, mnơ̆ng mnăm mkra mjing mơ̆ng durian. Mbĭt hŏng bruă mnơ̆ng ƀơ̆ng, knăm mơak mâo dŭm hdră kdŏ mmuñ, tông čing čhar Lăn Dap Kngư, kdŏ čhuang, klei hlăp lêñ djuê ana, čih kač rup êlan klông leh anăn dŭm hdră kdŏ mmuñ… Phung tuê ăt dưi lông mnăm mnơ̆ng amâo mă prăk mkra mjing mơ̆ng durian, hlăm anăn mâo kphê durian leh anăn čê bi lŭk hŏng êa ksâo êmô, durian.

- Lê Hoàng Cơ, Khua Dam San Tourist, Khua êpul mkŏ mjing Knăm mơak mnơ̆ng ƀơ̆ng durian, brei thâo, phung mkra mnơ̆ng ƀơ̆ng mơ̆ng 20 êpul bi lông mơ̆ng kluôm ala srăng nao hgŭm mkra mjing leh anăn rang mdah "102 mta mnơ̆ng ƀơ̆ng mguôp hŏng durian Dak Lak". Bruă anei bi mklă Hnơ̆ng klei êdah kdlưn Việt Nam.

“Boh durian jing sa mta mnơ̆ng dhơ̆ng ênoh prăk êklai kyua anăn brei drei mđĭ hnơ̆ng ñu, êngao kơ yua mơ̆ng dliê snăn drei bi mkra mjing. Tơdah bi klă leh ênoh mrô 102 mta mnơ̆ng ƀơ̆ng hŏng boh durian anăn snăn mnơ̆ng adôk jing drei dưi pŏk dŭm sang čhĭ mnơ̆ng ƀơ̆ng, dŭm anôk čhĭ mnơ̆ng ƀơ̆ng hŏng boh durian hlăm dŭm anôk, tăp năng hlăm ala čar leh anăn ala tač êngao.”

Sa mta bruă mĭn tĭng dưi Guinness tar rŏng lăn bi mklă klei kdlưn hĭn jing klei ruĕ êpul êdeh mdiăng boh durian mơ̆ng Krông Pač truh kơ Anôk klah 6 leh anăn dŭm ktuê êlan mơ̆ng ƀuôn prŏng Ƀuôn Ama Thuôt. Êpul êdeh mdiăng boh durian ruĕ ti Knăm mơak boh durian Dak Lak 2026 mâo 500 boh êdeh, grăp boh êdeh mdiăng 200 kg boh durian. Êpul kčưm mơ̆ng Wăl tač prŏng Tân An, să Krông Pač, êran hluê êlan dơ̆ng prŏng mrô 26, leh anăn mŭt hlăm êlan dơ̆ng prŏng mrô 27 leh anăn truh ti Êlan dơ̆ng prŏng Võ Nguyên Giáp. Êpul lŏ dơ̆ng găn krĭng Wăl êlan tlah 6 leh anăn dŭm ktuê êlan hlăm alŭ wăl Ƀuôn Ama Thuôt.

- Trần Vũ Thùy Linh, K'iăng khua êpul mkŏ mjing klei ruĕ êdeh, brei thâo truh kơ ară anei, Êpul mkŏ mjing tŭ mă leh klei bi mklă êbeh 600 pô êdeh, êgao hnơ̆ng kčah êbeh 100 boh êdeh. Êpul mkŏ mjing Guinness ăt tiŏ nao leh pô bi ala truh ti Dak Lak čiăng bi mguôp, ngă dŭm hră mơar bi mklă klei kdlưn hĭn.

“Tĭng anôk bruă Guinness mâo klei kčah mtrŭn kjăp, mơ̆ng ênoh boh durian hlăm êdeh brei jing mnơ̆ng sĭt 100% truh kơ bruă mnuih nao hgŭm brei mâo djăp anăn, thŭn leh anăn hră anăn phung mgăt êdeh. Ară anei Êpul hgŭm boh durian čar Dak Lak ngă leh djăp ênŭm dŭm hră mơar anei. Êngao kơnăn, Êpul hgŭm ăt iêo jak leh sa čô thơ̆ng kơ bruă hlăm Guinness hriê ti Dak Lak čiăng ksiêm dlăng. Leh klei ngă bruă hlăm brô 30 mnĭt, diñu srăng lŏ ksiêm dlăng sa blư̆ dơ̆ng. Tơdah amâo mâo ôh klei amâo jăk, klei kdlưn hĭn srăng dưi bi mklă mtam."

Hluê si Anôk bruă mkŏ mjing, Knăm mơak durian Dak Lak thŭn 2026 amâo djŏ knŏng hưn mthâo anăn knăl durian ƀiădah lŏ mđing truh mkŏ mjing wăl anôk bruă duh mkra, mtrŭt mđĭ hdră bi hgŭm pla mjing - ba čhĭ, jak iêu klei duh bi liê hlăm bruă mkra mjing êlam, logistics leh anăn mđĭ kyar hiu čhưn ênguê bruă lŏ hma. Dak Lak dôk ƀrư̆ ƀrư̆ ba Knăm mơak Durian jing hdră bruă gưl ala čar, mđing truh kơ tar rŏng lăn.

- Trần Hồng Tiến, Khua knơ̆ng bruă dhar kreh, mjuăt ktang asei mlei leh anăn hiu čhưn ênguê čar Dak Lak brei thâo, dŭm tour lông dlăng đang boh durian dưi mkŏ mjing amâo djŏ knŏng mkăp kơ knăm mơak ƀiădah srăng dưi ksiêm dlăng čiăng jing mnơ̆ng dhơ̆ng hiu čhưn ênguê nanao, đru ba yan boh durian jing anôk bi kƀĭn hiu čhưn ênguê grăp thŭn mơ̆ng Dak Lak.

“Dŭm tuôr anei amâo djŏ knŏng jing ngă bruă hlăm knăm mơak ƀiădah êdei anei srăng dưi ksiêm duah, lŏ ksiêm wĭt jing dŭm tuôr hiu čhưn ênguê nanao hlăm grăp thŭn. Dưi lač jing mâo dŭm thŭn  amâo mkŏ mjing knăm mơak, ƀiădah čiăng kơ jih jang mnuih truh hŏng Dak Lak dưi dưn yua truh hŏng dŭm đang pla mjing, dưi ƀơ̆ng, dlăng hdră pla mjing, mkra mjing, hrui pĕ, đŭng hruh. Leh knăm mơak hmei hmăng hmưi jing grăp yan durian jing jih jang mnuih srăng hdơr lehanăn srăng hiu čhưn Dak Lak".

- Kơ boh tŭ dưn klă sĭt mơ̆ng Knăm mơak durian Dak Lak thŭn 2026 hŏng mnuih ngă lŏ hma, boh nik klei dưi pŏk mlar anôk ba čhĭ, iêo jak klei duh bi liê, mtrŭt mđĭ bruă mnia mblei leh anăn dŭm hnơ̆ng čuăn tĭng dlăng tơdah knăm mơak mjưh ruê̆, Đặng Thị Thủy, Kiăng Khua Knơ̆ng bruă Lŏ hma leh anăn Wăl hdĭp mda čar Dak Lak brei thâo:

“Knơ̆ng bruă mâo leh dŭm hdră êlan klă klơ̆ng čiăng đru kčĕ kơ Knơ̆ng bruă sang čư̆ êa čar dŭm hdră êlan kluôm dhuôm mơ̆ng dŭm dhar bruă hlăm bruă kriê dlăng knơ̆ng bruă durian. Hmei dôk đru kčĕ kơ Knơ̆ng bruă sang čư̆ êa čar ba mdah hdră êlan mtrŭt mđĭ klei mlih mrô, hlăm anăn mâo hdră bruă 30 hruê mlam. Tal dua jing hluê ngă hdră êlan ksiêm dlăng, ară anei snăn hŏng bruă mkăp mrô knăl krĭng pla mjing lehanăn anôk đŭng hruh snăn hmei ăt mtrŭt mđĭ, si srăng ngă čiăng ñĕ kơ klei ngă soh hlăm mrô knăl krĭng pla mjing”.

- Čar Dak Lak ară anei mâo giăm 45.000 ha boh durian, mâo êbeh 1/5 ênhă boh durian kluôm ala. Thŭn 2025, hnơ̆ng boh durian mơ̆ng čar mâo 390 êbâo ton, ênoh ba čhĭ kơ ala tač êngao mâo hlăm brô 1.1 êklai USD, ba boh durian jing sa hlăm dŭm mta mnơ̆ng lŏ hma phŭn mơ̆ng alŭ wăl. Êngao kơ dŭm ênoh mrô anăn jing hdră duh ƀơ̆ng mơ̆ng dŭm pluh êbâo gŏ êsei mnuih ƀuôn sang, jing klei bi mlih mơ̆ng lu ƀuôn sang leh anăn ai dưi čiăng kriê pioh, mđĭ lar dŭm boh tŭ yuôm dhar kreh.

- Knăm mơak boh durian Dak Lak 2026 amâo djŏ knŏng bi mni kơ mta boh anei, ƀiădah lŏ bi mklă klei čang hmăng mkŏ mjing anăn knăl boh mnga bruă lŏ hma mguôp hŏng knhuah gru Lăn Dap Kngư, mđĭ kyar bruă hiu čhưn ênguê leh anăn mđĭ boh tŭ yuôm bruă duh mkra êklai dolar. Tơdah dŭm ênai čing kwang ti krah yan boh durian ksă, anăn ăt jing mmông Dak Lak yăl dliê hŏng ƀĭng găp hlăm ala čar leh anăn ala tač êngao klei yăl dliê kơ sa krĭng lăn thâo bi mlih klei găl bruă lŏ hma jing boh kdrŭt mđĭ kyar bruă duh mkra - ala ƀuôn./.