Tĭng dlăng boh tŭ dưn 7 mlan leh êgao, Khua knŭk kna mtă kơ phung hlăm knŭk kna bi tĭng dlăng kơ boh sĭt leh anăn klei hưn mdah mơ̆ng Phŭn bruă ngăn prăk, Adŭ bruă knŭk kna čiăng tĭng dlăng kluôm dŭm boh tŭ dưn dưi mâo. Sa hlăm dŭm bruă phŭn prŏng mâo Khua knŭk kna mtă hlăm klei kƀĭn jing bruă bi leh klei bhiăn leh anăn pŏk ngă dŭm hdră mtrŭn hdră êlan.

Hluê anăn, mđĭ pral bruă bi leh dŭm klei čih mkra hdră bhiăn, hdră mtrŭn ba mdah kơ Anôk bruă kƀĭn ala; pral pŏk ngă dŭm hră mơar ktrâo lač hluê ngă dŭm klei čuăn hdră bhiăn mâo leh klei tŭ dưn ƀiădah dôk êmưt. Kơ bruă pŏk ngă ktang phĭt Hdră mtrŭn 57 mơ̆ng Phŭn bruă kđi čar kơ klei mlih mrô, Khua knŭk kna lač, leh Anôk bruă gĭt gai gưl dlông dưi bi kluôm ênŭm kơ hdră mkŏ dăp leh anăn anôk bruă thơ̆ng, dŭm phŭn, dhar bruă brei čŏng pô hluê ngă bruă klam hlăm grăp mta bruă. Hlăm anăn, mta phŭn jing bi klă Hdră mkŏ dăp kluôm ala čar mrô, bi kluôm ênŭm anôk bruă ngă hră mơar ala čar leh anăn anôk bruă ngă hră mơar thơ̆ng, mđĭ kyar kdrăp mrâo leh anăn dŭm mta kdrăp mrâo hdră êlan.