Ti kplang êa ksĭ Xuân Đài,  lu  boh mran mtluk mtlak kbiă nao kơ dŭm anôk rông hdang ti kplang êa ksĭ, ba mnơ̆ng ƀơ̆ng kơ hdang. Ayŏng Đỗ Xuân Thạnh, Êpul mnuih ƀuôn sang Phú Mỹ, ƀuôn hgŭm Sông Cầu, jing sa hlăm dŭm čô mgăt mran nao kơ anei mơ̆ng ưm. Ayŏng Thạnh brei thâo, leh klei truh yan adiê knhal jih thŭn êgao, gŏ sang ñu dưi čan 1 êklai prăk čiăng duh bi liê mkra mđĭ anôk rông hdang, phưi rông 13.000 drei hdang mjeh mrâo. Êbeh 7 mlan kriê dlăng, gưl hdang mâo hnơ̆ng prŏng ba čhĭ, phung blei ăt akâo blei. Ayŏng Thạnh hơ̆k kdơ̆k:

“Kah knar hdang prŏng ară anei mâo hlăm brô 2 lạng/drei, čhĭ mâo êbeh 200.000 prăk/drei, jing 800.000 – 900.000 prăk/kg. Kluôm ênoh hrui wĭt gưl anei hlăm brô êbeh 2 êklai prăk. Kâo mĭn tĭng tla kơ knơ̆ng prăk sa kdrêč, dŭm adôk lŏ duh bi liê leh anăn rông dua blư̆ ênoh hdang prŏng mkă hŏng gưl anei. Tơdah đĭ kyar jăk snăn hlăm brô 2 thŭn êdei srăng lŏ wĭt msĕ hŏng êlâo gưl êa lip lêč.”

Ăt ti alŭ Phú Mỹ, ƀuôn hgŭm Sông Cầu, ayŏng Đỗ Ngọc Quang ƀrư̆ ƀrư̆ lŏ krŭ wĭt bruă rông hdang prŏng ti krĭng kplang Xuân Đài. Gưl yan adiê ngă knhal jih thŭn êgao ngă kơ gŏ sang luič liê êbeh 2,5 êklai prăk, hlăk êjai adôk nư knơ̆ng prăk. Kyua hdră đru, ayŏng dưi bi hrŏ nư, bi hrŏ prăk mnga leh anăn lŏ čan thiăm 800 êklăk prăk čiăng lŏ duh bi liê. Hlăm 2 gưl lŏ rông êdei anăn, 1 gưl dôk đĭ kyar jăk, gưl mkăn truh leh wưng hrui mă.

 “Kâo rông sa gưl hlăm mlan 4 hlăm brô 7.000 drei; gưl êdei hlăm mlan 5 leh anăn mlan 8, jih jang hlăm brô 10.000 drei. Ară anei knŏng ba c̆hĭ gưl tal êlâo leh anăn lŏ dơ̆ng gưl êdei, mđĭ nanao yơh.”

Klei truh yan adiê knhal jih thŭn 2025 ngă luč liê kjham kơ krĭng phŭn rông hdang prŏng ti krĭng ksĭ Xuân Đài, hŏng hlăm brô 1.500 gŏ êsei ti ƀuôn hgŭm Sông Cầu leh anăn Xuân Đài hmăi djŏ, giăm 100.000 boh war rông luič liê, ênoh jih jang hlăm brô 1.900 êklai prăk, hlăm anăn ƀuôn hgŭm Sông Cầu mâo giăm 2/3. Huỳnh Đình Quang, K'iăng khua anôk bruă sang čư̆ êa ƀuôn hgŭm Sông Cầu brei thâo, alŭ wăl ngă leh bruă hŏng dŭm êpul bruă brei čan prăk čiăng đru bi hrŏ prăk mnga čan, lăm lui nư, dăp thiăm prăk đru kơ mnuih rông lŏ wĭt rông. Kyua anăn, krĭng rông lŏ krŭ wĭt hlăm brô 80%. Hlăm wưng kơ anăp, ƀuôn hgŭm kčĕ kơ mnuih ƀuôn sang bi mlih hdră rông, čŏng pô ba yua klei kreh knhâo mrâo mrang čiăng gang mkhư̆ klei truh tơl, mđĭ klei dưi mdrơ̆ng hŏng klei yan adiê ngă, klei ruă tưp, mđing truh kơ hdră lŏ krŭ wĭt leh anăn đĭ kyar hơĭt kjăp.

“Alŭ wăl mtrŭt mjhar mnuih ƀuôn sang rông djŏ ênhă, ênoh leh anăn krĭng čuăl mkă; mbĭt anăn ba yua kdrăp mrâo mrang, bi mlih mơ̆ng war rông hŏng kĭ hđăp jing war rông hŏng HDPE kjăp hĭn, bi hrŏ klei luič liê tơdah adiê hjan angĭn êbŭ. Tơdah yan hjan angĭn êbŭ truh, mnuih ƀuôn sang mđing hrui blei ba čhĭ, bi kjăp war rông. Hŏng hdang rông amâo myun mâo klei ruă tưp, brei hmao hưn mthâo čiăng kơ bruă sang čư̆ êa alŭ wăl leh anăn bruă lŏ hma trŭn đru kơ mnuih ƀuôn sang.”

Rông mnơ̆ng hlăm êa jing bruă duh mkra mâo klei găl ti nah Ngŏ čar Dak Lak ƀiădah tuôm nanao hŏng klei luič liê hlăm grăp yan adiê ngă, brei mprăp ngăn prăk prŏng čiăng msir mghaih klei luič liê, lŏ duh bi liê bruă mkra mjing. Knŏng hjăn hŏng phung čan rông mnơ̆ng hlăm êa mơ̆ng Agribank Anôk bruă Phú Yên, gưl yan adiê ngă knhal jih thŭn êgao ngă kơ diñu đuôm nư êmưt tla truh 6.000 êklai prăk. Hrăm mbĭt hŏng phung čan msir mghaih klei dleh dlan, knơ̆ng prăk bi hrŏ nư, bi hrŏ prăk mnga mbĭt anăn dăp thiăm prăk brei čan. Knŏng hjăn krĭng rông hdang prŏng ti krĭng ksĭ Xuân Đài, êbeh 300 čô čan dưi bi hrŏ prăk mnga, mbĭt anăn dưi lŏ čan thiăm 240 êklai prăk. Phan Thông Thái, Khua Anôk bruă Agribank ti Phú Yên, brei thâo:

“Hmei ƀuăn rơ̆ng srăng rơ̆ng djăp prăk čan ăt msĕ mơh wưng čan duh bi liê čiăng đru kơ dŭm gŏ êsei rông hdang prŏng  ăt msĕ mơh mkra mjing čan duh bi liê mkra mjing. Bruă ba yua prăk mơ̆ng mnuih ƀuôn sang ăt mâo hmei ksiêm dlăng kjăp, čiăng kơ mnuih ƀuôn sang duh bi liê klă klơ̆ng, tŭ dưn hĭn. Hŏng hnơ̆ng anei, bruă rông hdang prŏng srăng krŭ wĭt kluôm dhuôm wĭt ti hnơ̆ng aguah tlam mơ̆ng thŭn anei truh jih thŭn êdei.”

Yan hdang prŏng tal êlâo leh klei truh yan adiê hlăk brei ƀuh dŭm klei bi knăl jăk hŏng phung rông hdang prŏng ti krĭng ksĭ Xuân Đài. Mơ̆ng bruă ba yua jăk ênoh prăk lŏ mkra mjing truh kơ hdră tă mơ̆ng alŭ wăl leh anăn klei gĭr mơ̆ng phung rông, jih jang dưi bi klă hŏng dŭm kdrăn rông hdang mprăp ba čhĭ, amâo djŏ knŏng brei ƀuh bruă rông hlăk lŏ krŭ wĭt ƀiădah lŏ pŏk êlan nao kjăp kơ bruă rông mnơ̆ng anei.