Ti alŭ 12, să Bảo Lâm 1, lu gŏ êsei mnuih ƀuôn sang čŏng ruh mnư̆ mnang, hdră bruă ti anăp sang čiăng ba jao anôk ala ngă êlan klông. Mâo dŭm gŏ êsei bi rai hdră bruă hlăm ênhă prŏng, ƀiădah leh mâo bruă sang čư̆ êa mtrŭt mjhar, mblang kơ klei tŭ dưn sui thŭn, mnuih ƀuôn sang sa ai, mjing klei găl kơ anôk bruă rŭ mkra pŏk ngă. Ƀuh klei sa ai mơ̆ng mnuih ƀuôn sang, Võ Chí Nhân, Khua alŭ 12, să Bảo Lâm 1, hơ̆k mơak:

“Mnuih ƀuôn sang jing sa ai leh anăn hơ̆k mơak êjai mâo klei bi mklă ngă êlan anei. Mnuih ƀuôn sang ară anei lu jing rŭ mdơ̆ng leh anôk ala čiăng kơ knơ̆ng bruă ngă bruă anei. Hmei čang hmăng leh êlan dưi bi leh srăng găl ênưih hlăm klei êrô êbat mơ̆ng mnuih ƀuôn sang, hriăm hră mơ̆ng phung hđeh”.

Mơ̆ng klei sa ai hlăm sa hdră bruă êlan klông brei ƀuh, êjai bruă sang čư̆ êa čŏng nao truh hŏng mnuih ƀuôn sang, mblang klă klei tŭ dưn leh anăn bruă klam, dŭm klei kpăk mâo thiăm klei găl dưi ruh mtlaih. Hdră ngă anăn ăt dôk mâo lu alŭ wăl ti Lâm Đồng ba yua hlăm bruă msir mghaih dŭm klei dôk mâo djŏ tuôm hŏng klei hdĭp mnuih ƀuôn sang. Ti să Bảo Lâm 3, lăn ala jing sa hlăm dŭm mta bruă mâo lu klei akâo. Hlăm klei bi tuôm hŏng mnuih ƀuôn sang thơ̆ng kơ bruă knhal jih mlan 9, mnuih ƀuôn sang hưn mdah dŭm klei kpăk kơ klei čih pioh lăn ala, mkăp hră dưi yua lăn, mbha gưl leh anăn ênoh čiu hnô. Ti anăp boh sĭt anei, bruă sang čư̆ êa să mđing bi mklă dŭm boh klei, bi klă bruă klam msir mghaih, mđing truh bi hrŏ klei ktrŏ leh anăn bi hrŏ wưng msir mghaih. Kơ hdră msir mghaih dŭm klei dôk mâo anei, Vũ Minh Đoàn, Kiăng khua bruă sang čư̆ êa să Bảo Lâm 3 mñă klă:

“Hmei dôk mđing msir mghaih dŭm bruă dôk gun kpăk, boh nik klei ngă hră mơar kơ lăn ala. Dŭm bruă sui hŏng anei ka dưi msir mghaih hlăk dôk ksiêm dlăng, msir mghaih bi jih, kñăm mjing klei găl hĭn kơ mnuih ƀuôn sang tơdah hluê ngă gru hmô bruă sang čư̆ êa alŭ wăl 2 gưl”.

Amâo djŏ knŏng dŭm klei ngă hră mơar, dŭm hdră bruă duh bi liê sui thŭn mlan ăt dôk mdưm klei čiăng bi mlih hdră msir mghaih. Ti să Dă Huai 3, hdră bruă Pui kmlă êran hŏng êa Dă Huai 2 hŏng dŭm klei gun kpăk êbeh 20 thŭn jing sa hlăm dŭm bruă dleh mâo alŭ wăl mđing msir mghaih. Klei gun kpăk prŏng hĭn jing mjing klei sa ai hlăm bruă čiu hnô, ruh mgaih anôk ala. Hluê hŏng 8 klei bi kƀĭn, blŭ hrăm klă anăp, bruă sang čư̆ êa să ƀrư̆ ƀrư̆ msir mghaih dŭm klei akâo mơ̆ng mnuih ƀuôn sang, mjing klei găl pŏk ngă bruă mkă dlăng, ksiêm yap leh anăn hluê ngă dŭm hdră êdei anăp. Lač kơ dŭm klei bi mlih hlăm bruă ruh mgaih anôk ala, Nguyễn Văn Trinh - Khua knơ̆ng bruă sang čư̆ êa să Dă Huoai 3 brei thâo:

"Leh 8 klei bi kƀĭn, hmei iêo mthưr jih anôk bruă kđi čar hâo hưn, mblang leh anăn msir mghaih dŭm klei gun kpăk mơ̆ng mnuih ƀuôn sang. Truh kơ ară anei, hdră mâo leh klei sa ai. Alŭ wăl dôk bi hgŭm pŏk ngă bruă mkă dlăng, ksiêm yap čiăng hluê ngă bruă čiu hnô, ruh mgaih anôk ala, gĭr čiăng kơ hdră bruă mphŭn rŭ mkra hlăm thŭn 2026".

Dŭm klei bi mlih ti Bảo Lâm 1, Bảo Lâm 3 leh anăn Dă Huoai 3 jing dŭm kdrêč hlăm klei gĭr ruh mgaih klei dleh dlan, bi lar ai dưi mđĭ kyar mơ̆ng Lâm Đồng.

Hưn mdah bruă duh mkra - ala ƀuôn 9 mlan thŭn 2026 brei ƀuh, ênoh prăk duh bi liê hluê ngă kluôm yang ƀuôn mơ̆ng čar mâo êbeh 84.100 êklai prăk, đĭ êbeh 12% mkă hŏng wưng anei thŭn dih. Kluôm čar mâo giăm 3.000 hdră duh bi liê dôk tŭ dưn, ênoh prăk čih anăn êbeh 947.000 êklai prăk. Ƀiădah, dŭm klei gun kpăk kơ lăn ala, ruh mgaih anôk ala, hră mơar duh bi liê leh anăn ai dưi ngă bruă ăt dôk hmăi kơ hnơ̆ng lu hdră bruă.

Ti anăp klei čiăng bi hluh dŭm ai dưi mđĭ kyar, Khua hlăm Anôk bruă Đảng gưl dlông, Khua bruă Đảng čar Lâm Đồng Y Thanh Hà Niê Kđăm kčah klei čiăng mlih mrâo klei mĭn kiă kriê, mđĭ bruă klam leh anăn klei tŭ dưn hlue ngă hlăm kluôm anôk bruă kđi čar:

“Kluôm anôk bruă kđi čar brei mlih ktang mơ̆ng klei mĭn gĭt gai jing klei mĭn mkŏ mjing klei đĭ kyar, mơ̆ng klei kčah mtrŭn jing boh tŭ dưn klă sĭt. Mđing ruh mgaih dŭm anôk kpăk hlăm klei đĭ kyar, mtrŭt mđĭ hdră hluê ngă dŭm hdră bruă phŭn, dŭm hdră bruă adôk êmưt, sui leh anăn mđĭ boh tŭ hdră bi liê ngăn prăk knŭk kna. Lŏ dơ̆ng mđĭ lar ai tiê bruă klam, blŭ nao mbĭt hŏng ngă, păn kjăp bruă klam dưi jao, ksiêm dlăng, mtrŭt mđĭ, hmao ruh mgaih klei dleh dlan, gun kpăk, gĭr mjing klei bi mlih klă sĭt hlăm dŭm mlan knhal jih thŭn 2026, bi leh kdlưn hĭn dŭm mta kñăm mâo kčah mtrŭn".

Mơ̆ng dŭm bruă yang ƀuôn truh kơ dŭm hdră bruă dôk mâo lu thŭn, klei bi mlih ti nah gŭ brei ƀuh boh tŭ tal êlâo hlăm klei ngă bruă knŭk kna alŭ wăl 2 gưl ti Lâm Đồng. Čiăng kơ dŭm boh tŭ anăn dưi mđĭ lar, klei yuôm bhăn jing lŏ dơ̆ng msir mghaih bruă truh kơ jih, bi mlih klei gĭr jing boh tŭ dưn klă klơ̆ng, mjing thiăm boh kdrŭt kơ Lâm Đồng đĭ kyar./.