Ti knăm anei, phung hiu trah mă kan dưi hưn mthâo dŭm mta phŭn mơ̆ng Hdră bhiăn hiu trah mă kan thŭn 2017; ktrâo lač rơ̆ng kdrăp ksiêm dlăng hdră hiu trah mă kan, čih hră hdră êlan hiu trah mă kan leh anăn hluê ngă klei kčah mtrŭn êjai kŭm păn kbiă, mŭt hlăm kdrŭn. Êpul êya bruă ăt mtô mblang klei thâo gang mkhư̆ klei truh êka, msir mghaih klei truh leh anăn bi hgŭm tui duah, đru dŏng hlăm êa ksĭ.

Đồng Văn Thi, mnuih hiu trah mă kan ti ƀuôn hgŭm Phú Thủy brei thâo, dŭm klei thâo dưi mprăp đru kơ mnuih ƀuôn sang thâo săng klă hĭn bruă klam êjai hiu trah mă kan, hơĭt ai tiê nao trah mă kan hlăm êa ksĭ leh anăn mă bruă djŏ hdră bhiăn.

"Wĭt kơ hang lu leh, ară anei mrâo trŭn lŏ, ăt hmư̆ lac̆ kơ IUU anei ƀiădah wưng anăn ară anei ăt ka thâo klă mơh. Hruê anei pô nao hlăm klei bi kƀĭn, pô thâo săng jing brei trah mă djŏ hdră bhiăn, amâo mâo trah mă ôh hlăm dŭm krĭng êa ksĭ Knŭk kna amâo brei ôh, si srăng ngă c̆iăng kơ bruă trah mă kan hdang djŏ hdră bhiăn".

Hluê si kahan răng mgang knông lăn kđông kahan răng mgang knông lăn Thanh Hải, mbĭt hŏng ksiêm dlăng, ktuê dlăng ti ƀăng jang êa ksĭ leh anăn hlăm êa ksĭ, bruă mtô mblang hdră bhiăn klă anăp đru kơ phung trah mă kan thâo săng klă bruă klam amâo ngă soh hŏng krĭng êa ksĭ ala tač êngao, hluê ngă dŭm klei mtă hlăm klei trah mă leh anăn rơ̆ng klei êđăp ênang kơ mnuih, kdrăp mnơ̆ng. Đại úy Tạ Hữu Nghĩa, K’iăng khua êpul mtrŭt mjhar mnuih ƀuôn sang, kđông kahan răng mgang knông lăn Thanh Hải brei thâo:

“Kđông kahan răng mgang knông lăn Thanh Hải pral bi hgŭm hŏng dŭm dhar bruă, êpul êya leh anăn êpul bruă djŏ tuôm pŏk ngă mđrăm mbĭt lu hdră msir, hlăm anăn mđing hâo hưn ti anôk bi kƀĭn leh anăn klă anăp ti dŭm kdrŭn ksĭ čiăng kơ mnuih ƀuôn sang thâo klă dŭm klei kčah mtrŭn mơ̆ng hdră bhiăn. Mbĭt anăn, anôk bruă ăt bi mguôp klei hâo hưn hdră bhiăn hlăm dŭm mmông bi kƀĭn čiăng kơ mnuih ƀuôn sang thâo leh anăn hluê ngă jăk dŭm klei kčah mtrŭn hlăm hdră mă bruă ti êa ksĭ”.

Hlăm wưng kơ anăp, Lĭng kahan răng mgang knông lăn čar Lâm Đồng lŏ dơ̆ng bi hgŭm hŏng dŭm dhar bruă, alŭ wăl mtrŭt mđĭ bruă mtô mblang hdră bhiăn ti krĭng ktuê hang ksĭ, đru mkŏ mjing bruă trah mă kan mâo klei đua klam, đĭ kyar hơĭt kjăp leh anăn hluê ngă tŭ dưn dŭm klei kčah mtrŭn mơ̆ng Dhar bruă Ơrôp kơ bruă bi kdơ̆ng hŏng klei trah mă hlue si IUU./.