Tĭng truh hruê 28/7, čar Lâm Đồng msir mghaih leh 116/365 hdră bruă dôk gun kpăk, mjing boh kdrŭt mtrŭt mđĭ kyar bruă duh mkra - ala ƀuôn. Hlăm anăn, 31 hdră bruă dưi bi leh leh anăn ba yua; 24 hdră bruă dưi hrui wĭt, mdei ngă bruă amâo dah ba kbiă mơ̆ng ênoh ksiêm dlăng; 61 hdră bruă dưi lŏ dơ̆ng pŏk ngă amâo dah dôk bi leh dŭm hră mơar čiăng lŏ dơ̆ng pŏk ngă. Dŭm hdră mâo msir mghaih mâo ênhă êbeh 8.700 ha, hŏng ênoh duh bi liê giăm 25.800 êklai prăk.

Hŏng 249 hdră bruă dôk gun kpăk, čar Lâm Đồng bi mklă jing lu êpul čiăng mđing msir mgaih, mâo dŭm hdră bruă hlăm klei dưi gưl dlông, klei dưi alŭ wăl; hdră bruă mtŭk mtŭl hlăm  klei čuăl mkă mnơ̆ng hlăm gŭ lăn; hdră bruă tŭ klei hmăi mơ̆ng dŭm hdră mtrŭn, hdră mtrŭn mrâo; dŭm hdră bruă kpăk gun kơ klei duh bi liê, lăn ala, rŭ mdơ̆ng … Hŏng dŭm hdră bruă hlăm klei dưi alŭ wăl, dŭm knơ̆ng, dhar bruă mjêč ksiêm dlăng grăp hdră bruă čiăng mâo hdră msir mgaih djŏ guôp.