Klei bi kƀĭn mâo 6 alŭ wăl mâo dŭm ƀuôn hgŭm Xuân Hương - Đà Lạt, Lâm Viên - Đà Lạt, Xuân Trường - Đà Lạt, Cam Ly - Đà Lạt, Lang Biang - Đà Lạt leh anăn să Lạc Dương bi hgŭm mkŏ mjing, kñăm hưn mdah klei găl, anăn knăl hdră bruă leh anăn mđing hmư̆ klei akâo mơ̆ng anôk bruă duh mkra, phung duh bi liê.

 Hŏng ênhă êbeh 1.500 km², ênoh mnuih êbeh 314.000 čô, dôk hlăm wăl anôk lăn mnga êa mak Đà Lạt - Lạc Dương, 6 alŭ wăl mâo yan adiê msĕ, hnơ̆ng dlông kah knar hlăm brô 1.500m, găl ênưih mđĭ kyar bruă hiu čhưn ênguê mdei msăn, bruă lŏ hma ba yua kdrăp mrâo, ƀuôn prŏng ênuk mrâo leh anăn bruă nah tluôn hnơ̆ng tŭ jăk. Lu hdră bruă dôk iêo jak klei duh bi liê hlăm dŭm mta bruă ƀuôn prŏng, mnia mblei, hiu čhưn ênguê, bruă nah gŭ. Ƀiădah, anôk bruă duh mkra lač dŭm klei gun kpăk sui brei pral dưi ruh mgaih. Lê Văn Cường, Khua knơ̆ng bruă duh mkra mnia mblei Đà Lạt GAP lač klei gun kpăk klă sĭt kơ lăn ala:

“Hmei dôk gun kpăk jing lăn snăn mâo ƀiădah lăn anăn jing lăn êngao dliê ka mâo mkăp hră mơar lăn. Kyua anăn êjai hmei ngă mrô krĭng ăt gun kpăk mơh, lehanăn hmei čiăng prăk pioh čan knơ̆ng prăk snăn knơ̆ng prăk akâo jing brei mâo ngăn drăp, mâo hră mơar lăn”.

Alŭ wăl 5 ƀuôn hgŭm Đà Lạt lehanăn să Lạc Dương dưi tĭng dlăng adôk anôk, wăl anôk đĭ kyar prŏng ƀiădah klei găl ka dưi ba yua djŏ guôp. Mơ̆ng dŭm klei dleh dlan anôk bruă duh mkra lač, Kiăng khua knơ̆ng bruă sang čư̆ êa čar Lâm Đồng Nguyễn Hồng Hải mtă kơ dŭm alŭ wăl lehanăn knơ̆ng, dhar bruă brei mprăp jăk hĭn êlâo kơ ba hdră kčah iêo jak; ksiêm dlăng hdră čuăl mkă, klei bhiăn, boh sĭt lăn ala, bi leh hră mơar lehanăn dŭm klei găl pŏk ngă, ñĕ kơ klei dưi iêo jak phung duh bi liê leh anăn lŏ dơ̆ng ruh mgaih klei gun kpăk.

 “Kâo mtă kơ khua gĭt gai thŭn ƀuôn hgŭm lehanăn să Lạc Dương ăt msĕ mơh khua gĭt gai dŭm knơ̆ng, dhar bruă brei lŏ ksiêm wĭt klei bhiăn čuăl mkă ƀuôn prŏng. Mta phŭn hlăm lam ñu mâo djăp ênŭm hĕ klei čiăng mơ̆ng phung duh bi liê amâodah hơăi? Gĭr ngă bi kjăp čiăng amâo mâo ôh klei msĕ si hdră bruă leh mâo iêo jak leh, phung duh bi liê pŏk ngă leh êdei kơnăn lŏ mâo klei yăl dliê jing êpul êya ruh mgaih klei dleh dlan, gun kpăk kơ hdră bruă.”

Leh klei bi kƀĭn, khua gĭt gai čar Lâm Đồng mtă kơ dŭm alŭ wăl bi mklin, bi mklă grăp klei akâo mơ̆ng anôk bruă duh mkra, bi klă bruă klam msir mghaih lehanăn ktuê dlăng tơdah mâo boh tŭ dưn. Čar Lâm Đồng ƀuăn lŏ dơ̆ng hrăm mbĭt, ruh mgaih klei dleh dlan hluê si klei bhiăn, mjing wăl anôk jăk găl čiăng kơ dŭm hdră bruă dưi pŏk ngă klă sĭt, tŭ dưn.