Truh ară anei, mâo êbeh 7.000 hdră bruă mơ̆ng phung duh bi liê China dôk tŭ dưn ti Việt Nam, ênoh prăk bi klă giăm 37 êklai USD, kƀĭn ƀrư̆ hruê ƀrư̆ lu hlăm bruă mkra mjing, mkra mjing, bruă nah gŭ, bruă pui kmlă, điện tử leh anăn kdrăp mrâo. Ti anôk bi tuôm, Khua knŭk kna Lê Minh Hưng bi mklă: klei bi mjĕ Việt Nam - China dôk đĭ kyar jăk siam, hơĭt kjăp, ƀrư̆ hruê ƀrư̆ êlam hĭn. China jing ƀĭng hgŭm mnia mblei prŏng hĭn mơ̆ng Việt Nam; Việt Nam jing ƀĭng hgŭm mnia mblei prŏng hĭn mơ̆ng China hlăm ASEAN.

Hưn mthâo kơ dŭm klei êdah êdi hlăm bruă duh mkra - ala ƀuôn mơ̆ng Việt Nam wưng êgao, Khua knŭk kna mñă, wưng mrâo amâo djŏ knŏng mdưm bruă bi hgŭm, duh bi liê "lu hĭn" ƀiădah brei "jăk hĭn", "hnơ̆ng tŭ jăk hĭn" leh anăn "tŭ dưn, klă sĭt hĭn". Khua knŭk kna mtă kơ dŭm anôk bruă duh mkra China mlih ktang klei duh bi liê kơ hnơ̆ng tŭ jăk, kdrăp mrâo, ênoh yuôm leh anăn mlih mrâo mbruă; mđĭ klei bi hgŭm, mjing klei găl kơ anôk bruă duh mkra Việt Nam nao hgŭm hlăm hdră mkăp mnơ̆ng dhơ̆ng; duh bi liê hluê si hnơ̆ng čuăn mtah, hơĭt kjăp; kriê dlăng klei hdĭp, klei tŭ dưn djŏ klă mơ̆ng mnuih mă bruă leh anăn hluê ngă jăk bruă klam yang ƀuôn. Knŭk kna Việt Nam srăng lŏ dơ̆ng mđing hmư̆, hrăm mbĭt, răng mgang klei dưi leh anăn klei tŭ dưn djŏ hdră bhiăn, djŏ guôp mơ̆ng phung duh bi liê; mjing klei găl čiăng kơ anôk bruă duh mkra duh bi liê, mnia mblei tŭ jing, hơĭt kjăp ti Việt Nam./.