Lĭng kahan răng mgang knông lăn čar Dak Lak leh anăn Sang hră gưl sa leh anăn gưl dua Knŭk kna rông ba Ia Lốp srăng bi hgŭm êbeh 5 êpul bruă klam, hlăm anăn Lĭng kahan răng mgang knông lăn mđĭ lar bruă klam hrăm mbĭt hŏng sang hră hlăm bruă mtô mjuăt hdră bhiăn, klei thâo hdĭp, mjuăt bi hriăm bruă knuă, mkŏ mjing hdră bruă leh anăn kriê dlăng phung hđeh mâo klei hdĭp dleh dlan.

Năng mđing, dŭm hdră bruă kriê dlăng phung hđeh lŏ dơ̆ng dưi krơ̆ng kjăp, hlăm anăn mâo "Mđĭ ai adei nao sang hră - Anak rông kđông kahan răng mgang knông lăn", tŭ drông phung hđeh ƀun, mđup brei prăk đru hriăm hră, đru ksiêm mkă dlăng klei ruă, mbha êa drao leh anăn kdrăp mnơ̆ng, mnơ̆ng yua hriăm hră kơ phung hđeh mnuih djuê ƀiă dôk hriăm ti sang hră mâo klei hdĭp dleh dlan. Đại tá Rơ Lan Ngân, K'iăng khua bruă kđi čar hlăm knơ̆ng gĭt gai lĭng kahan răng mgang knông lăn čar Dak Lak brei thâo, klei mjĕ mjing mjing thiăm klei găl čiăng kơ êpul lĭng kahan răng mgang knông lăn bi hgŭm nanao, kjăp hŏng sang hră hlăm bruă mtô bi hriăm leh anăn kriê dlăng phung hđeh krĭng knông lăn. Hluê anăn đru mđĭ hnơ̆ng tŭ jăk bruă mtô bi hriăm, mjuăt bi hriăm klei thâo săng kơ hdră bhiăn, bruă klam răng mgang klei dưi kiă kriê knông lăn lehanăn mkŏ mkra krĭng knông lăn hơĭt kjăp.