Lĭng khan Biệt động Sài Gòn myơr brui mngưi bi hdơr kơ phung êngiă asei ti War mnga Lê Thị Riêng
Thứ năm, 08:59, 17/09/2026
Y-Ƀel Êban/ VOV Tây Nguyên
Y-Ƀel Êban/ VOV Tây Nguyên
VOV.Êđê- Hruê mbruê 16/9, Câu lạc bộ kháng chiến Khối Biệt động Sài Gòn - Gia Định mbĭt hŏng dŭm anôk bruă bi mguôp Biệt động yŭ Dhŭng, Êpul 67A, Thiếu sinh quân leh anăn sang djă pioh Biệt động Sài Gòn - Gia Định nao bi hdơr kơ phung jhŏng ktang êngiă asei ti wăl tač Lê Thị Riêng.
Hluê si klei hưn mơ̆ng Knơ̆ng gĭt gai lĭng kahan ƀuôn prŏng Hồ Chí Minh, mơ̆ng hruê 23/6 truh kơ jih hruê 14/9, dŭm êpul êya dưi ƀuh, bi kƀĭn 632 klang kleh phung êngiă asei ti dŭm krĭng tui duah hlăm Wăl tač Lê Thị Riêng.
Mâo ƀô̆ mta nao čuă êmuh êpul kahan bi blah Sài Gòn, Thiếu tướng Nguyễn Thành Trung - Khua bruă kđi čar knơ̆ng gĭt gai lĭng kahan ƀuôn prŏng Hồ Chí Minh brei thâo, anôk bruă dôk ngă klei ksiêm wĭt wưng tal sa mơ̆ng Hdră 500 hruê mlam tui duah, bi kƀĭn leh anăn bi mklă anăn klang kleh phung êngiă asei, hlăm anăn mâo wăl tač Lê Thị Riêng. Mĭn tĭng hlăm akŏ mlan 10/2026, anôk bruă djŏ tuôm srăng ngă klei čang ênuh, tui duah leh anăn knăm dơr dŭm klang kleh phung êngiă asei dưi ƀuh ti Wăl tač Lê Thị Riêng.
Viết bình luận