Truh jih mlan 9, Lâm Đồng mâo 8.160 boh kŭm păn mơ̆ng 6 met kơ dlông mâo čih anăn, lŏ mlih mrâo hlăm klei čih pioh kơ bruă hiu trah mă kan ala čar. Klei năng mđing, ênoh kŭm păn mâo klei arưp aram ngă soh hŏng klei bhiăn IUU dôk ti hnơ̆ng lu. Mơ̆ng akŏ thŭn truh kơ ară anei, êpul bruă djŏ tuôm mơ̆ng čar mkŏ mjing leh êbeh 1.200 gưl hiu suang dlăng, ksiêm dlăng êbeh 6.700 boh hô̆ mran, hmao ƀuh 212 hô̆ mran ngă soh, phat mkra kluôm ênoh prăk êbeh 3.7 êklai prăk. Čar Lâm Đồng ăt ksiêm dlăng, bi mklă hlăm brô 300 hô̆ mran mâo klei huĭ srăng ngă soh ti krĭng êa ksĭ ala tač êngao leh anăn 864 hô̆ mran amâo djăp klei găl ngă bruă, kñăm mbha êpul kriê dlăng kjăp hô̆ mran leh anăn mnuih mă bruă.

Anôk bruă gĭt gai ala čar mñă, bruă kriê dlăng hô̆ mran ti Lâm Đồng ăt adôk mâo lu bruă brei mghaih msir. Ênoh hô̆ mran huĭ srăng ngă soh leh anăn hô̆ mran amâo djăp klei găl ngă bruă adôk lu hŏng jih jang êbeh 1.500 hô̆ mran. Ti anăp klei čiăng bi kdơ̆ng hŏng klei trah mă IUU, Knơ̆ng bruă sang čư̆ êa čar Lâm Đồng hưn mthâo leh 2 anôk kŭm păn êjai, mkŏ mjing klei čih pioh kriê dlăng mŭt kbiă grăp hruê. Ksiêm dlăng dŭm anôk trah yao kŭm păn kreh trah yao êjai, mbĭt anăn jao bruă klam kơ grăp alŭ wăl ksiêm dlăng kŭm păn mŭt kbiă ti dŭm kdrŭn anei.