Êlâo kơ nao hgŭm hlăm Klei bi kƀĭn mjêč tal Sa, Anôk bruă kƀĭn ala gưl XVI, Êpul bi ala Anôk bruă kƀĭn ala čar Dak Lak mkŏ mjing leh klei bi kƀĭn mă klei blŭ mguôp hŏng dŭm hdră bhiăn srăng ba mdah kơ Anôk bruă kƀĭn ala ksiêm dlăng. Sa hlăm dŭm mta phŭn mâo mđing dlăng jing klei čih mkra Hdră bhiăn mkra mlih, thiăm mbŏ dŭm mta mơ̆ng Hdră bhiăn gang mkhư̆ klei luč liê mang. Ti anăp boh sĭt klei ngă soh yua kdrăp mrâo mrang leh anăn ngăn drăp mrô ƀrư̆ hruê ƀrư̆ dleh ksiêm dlăng, lu klei blŭ akâo thiăm mbŏ hdră kah mbha klei hâo hưn, bi kah mbha ênoh mrô hluê hruê mmông plah wah dŭm phŭn, dhar bruă kñăm đru kơ bruă thâo kral phung blei yua, bi mklă klei bi mnia mblei huĭ hyưt, tui duah phŭn mkăp prăk leh anăn gang mkhư̆ hmao dŭm klei ngă soh. Võ Quang Duy, bi ala Anôk bruă kahan ksiêm kahan ksiêm čar Dak Lak lač:

“Ară anei, phung ngă soh bliư̆ prăk hŏng ngăn drăp mrô leh anăn mplư yua kdrăp mrâo mrang mâo hnơ̆ng bi mlih prăk lu êdi. Tơdah dŭm phŭn, dhar bruă knŏng bi hgŭm hluê hdră mơĭt hră mơar msĕ hđăp snăn ênoh prăk čhĭ mnia soh hŏng klei bhiăn dưi bi mlih leh hlăm lu akŏ prăk mkăn, ngă dleh dlan kơ bruă ksiêm dlăng, tui duah, gang mkhư̆ klei ngă soh. Kyua anăn, brei mâo klei bi hgŭm plah wah dŭm akŏ prăk čiăng kơ drei dưi tui duah leh anăn gang mkhư̆ ênoh prăk."

Dưi ƀuh, anei jing klei kčĕ kbiă hriê mơ̆ng boh sĭt bi kdơ̆ng hŏng phung ngă soh, đru mguôp bi leh klei bhiăn čiăng kơ dŭm anôk bruă djŏ tuôm čŏng pô hĭn hlăm bruă răng mgang klei êđăp ênang bruă ngăn prăk leh anăn klei tŭ dưn kơ mnuih ƀuôn sang. Hŏng klei čih mkra Hdră bhiăn mkra mlih, thiăm mbŏ dŭm mta mơ̆ng Hdră bhiăn klei đua klam tla hnô mơ̆ng Knŭk kna, lu phung bi ala akâo ksiêm dlăng dŭm klei čuăn kơ hruê mmông msir mghaih klei akâo tla hnô hlăm boh klei dŭm tĭng bi tŭ ư mđĭ hruê mmông ksiêm dlăng klei luič liê leh anăn bi trông, kñăm rơ̆ng klei dưi akâo tla hnô mơ̆ng mnuih akâo tla hnô. Aduôn Phan Thị Hoa, Kiăng Khua Knơ̆ng bruă sang čư̆ êa čar Dak Lak mtă:

“Akâo kơ anôk bruă čih mkra ksiêm dlăng klă si hdră bi mklă hruê mmông jih hruê kčah klei akâo đru brei hlăm boh klei dŭm tĭng mâo klei kuôl kă mđĭ hruê mmông ksiêm yap klei luič liê, bi trông; amâodah lŏ ksiêm dlăng thiăm mbŏ hdră kčah hưn mthâo kơ hruê mmông mjưh ruê̆ hruê mmông msir mghaih čiăng mjing klei găl kơ pô akâo đru brei hlăm bruă hluê ngă klei dưi kčŭt hưn, ăt msĕ mơh rơ̆ng klei sa anăn hlăm hdră ba yua hdră bhiăn."

Dŭm klei blŭ anei mđing truh kơ mta kñăm răng mgang jăk hĭn klei dưi lehanăn boh tŭ dưn djŏ hdră bhiăn mơ̆ng mnuih ƀuôn sang, mbĭt anăn đru kơ dŭm klei čuăn mơ̆ng hdră bhiăn klă mngač, sa hnơ̆ng lehanăn găl hĭn hlăm hdră ba yua. Klei năng čih yap jing grăp klei blŭ đru mguôp kbiă hriê mơ̆ng boh sĭt bruă knuă, bi êdah dŭm klei dleh dlan, gun kpăk hlăm hdră ba yua hdră bhiăn. Anei ăt jing klei bi mklă brei ƀuh bruă čih mkra hdră bhiăn mâo nanao klei mđing dlăng, bruă klam mơ̆ng dŭm gưl, dhar bruă leh anăn mnuih ƀuôn sang. Dŭm klei blŭ hŏng ai tiê dưi bi mklin mơ̆ng boh sĭt hruê anei srăng lŏ dơ̆ng mâo Êpul bi ala bruă kƀĭn ala čar Dak Lak ksiêm dlăng, tŭ mă, ngă tur knơ̆ng nao hgŭm hlăm klei bi trông ti anôk bi kƀĭn. Anăn ăt jing hdră čiăng kơ grăp klei bhiăn tơdah dưi ba mdah klă sĭt jing klei bi mguôp mơ̆ng klei mĭn Đảng, ai tiê mnuih ƀuôn sang, mkăp djŏ hŏng klei čiăng mkŏ mjing Knŭk kna hdră bhiăn yang ƀuôn ngă phŭn êngiê leh anăn đru kơ mnuih ƀuôn sang ƀrư̆ hruê ƀrư̆ jăk hĭn.