Ti Dak Lak, leh sa mlan pŏk ngă hdră bruă "30 hruê mlam" bi mklă mrô krĭng pla mjing lehanăn anôk đŭng hruh, truh kơ ară anei hlăm brô 60% ênhă lehanăn mrô dưi bi mklă. Hdră bruă dưi hluê ngă mơ̆ng hruê 7/8 truh kơ 7/9, mđing ksiêm dlăng, hrui m ƀĭn, mkra mlih lehanăn bi mklă klei hâo hưn hŏng dŭm krĭng pla mjing boh durian lehanăn anôk đŭng hruh. Dŭm êpul ngă bruă klă anăp ksiêm dlăng ênhă, anôk, pô kriê dlăng, hră mơar lehanăn klei ngă bruă. Anei amâo djŏ knŏng jing bruă bi mrâo klei hâo hưn, ƀiădah lŏ jing knhuang bi klă klei hâo hưn čiăng mđĭ boh tŭ dưn kriê dlăng, đru tui duah phŭn agha leh anăn ngă djŏ klei čiăng mơ̆ng dŭm anôk ba čhĭ. Bùi Hồng Quý, Khua knơ̆ng bruă lŏ hma leh anăn wăl hdĭp mda čar Dak Lak, brei thâo:

“Knơ̆ng bruă lŏ hma leh anăn wăl hdĭp mda mkŏ mjing leh 8 êpul ngă bruă hluê ngă bruă klam anei leh anăn ăt akâo kơ dŭm să, ƀuôn hgŭm mâo boh durian hâo hưn, mtrŭt mjhar mnuih ƀuôn sang nao hgŭm mkŏ mjing mrô krĭng pla mjing, bi hgŭm hur har bi mklă mrô krĭng pla mjing. Knơ̆ng bruă ăt srăng lŏ dơ̆ng păn kjăp čiăng hrăm mbĭt hŏng dŭm alŭ wăl hluê ngă dŭm bruă adôk.”

Hluê ngă Hdră mtrŭn 36/2026/NQ-CP, Anôk bruă mtrŭt mđĭ bruă lŏ hma ala čar, Phŭn bruă lŏ hma leh anăn wăl hdĭp mda mkŏ mjing klei hriăm mjuăt kơ êpul mtrŭt mđĭ bruă lŏ hma kơ bruă pla mjing êđăp ênang, mkŏ mjing mrô krĭng pla mjing, tui duah phŭn agha leh anăn mkăp djŏ hŏng klei čiăng mơ̆ng wăl anôk mnia mblei ti Lâm Đồng. Phung hriăm ksiêm dlăng gru hmô čêñ hruê̆ prŏng hlăm brô 8.000 met vuông ti să Phú Sơn Lâm Hà, dưi tă hdră pla mjing hluê VietGAP, ba yua kdrăp krih êa bi rôc̆ thư̆ thư̆ leh anăn čŏng pô krih êa hbâo. Êpul ăt ksiêm dlăng sa sang mkra mjing čêñ hruê̆ mâo hnơ̆ng êbeh 10.000 ton grăp thŭn. Lê Quốc Thanh, Khua anôk bruă mtrŭt mđĭ bruă lŏ hma ala čar mñă klă: êjai krĭng pla mjing dưi bi mklă, mnơ̆ng dhơ̆ng mâo phŭn agha klă nik, mkra mjing mguôp hŏng anôk ba čhĭ, ai bi ktưn mơ̆ng mnơ̆ng dhơ̆ng lŏ hma Việt Nam srăng dưi mđĭ.

“Mtrŭt mđĭ bruă lŏ hma brei klă sĭt hrăm mbĭt hŏng mnuih ƀuôn sang ngă lŏ hma ti kdrăn lŏ. Brei bi mlih leh anăn mlih mơ̆ng klei mĭn ba jao hdră mnêč jing klei mĭn bruă duh mkra lŏ hma, nao hgŭm hlăm djăp mta bruă. Drei brei mâo djăp ênŭm klei thâo, srăng mâo dŭm klei hâo hưn, adŭ mtô bi hriăm, mjuăt bi hriăm čiăng jing phung knuă druh mtrŭt mjhar bruă lŏ hma thơ̆ng kơ bruă. Thâo kơ klei thâo anôk mnia mblei, klei thâo kơ klei bi mguôp leh anăn mkŏ mjing klei đru kơ mnuih ƀuôn sang ngă lŏ hma nao hgŭm hlăm dŭm hdră bruă Êpul hgŭm bruă”.

Mrâo anei, Knơ̆ng bruă pla mjing leh anăn răng mgang mnơ̆ng pla mjing, Phŭn bruă lŏ hma leh anăn wăl hdĭp mda brei thâo Knơ̆ng bruă sang čư̆ êa Trung Quốc bi mklă thiăm 567 mrô knăl anôk đŭng hruh leh anăn krĭng pla mjing durian dưi brei čhĭ kơ wăl anôk mnia mblei Trung Quốc. Hlăm anăn mâo 401 mrô knăl krĭng pla leh anăn 166 mrô knăl anôk đŭng hruh. Mơ̆ng anăn, đru mguôp mđĭ hnơ̆ng ba čhĭ durian phŭn kơ Trung Quốc, mbĭt anăn mjing klei găl čiăng kơ dŭm alŭ wăl, anôk bruă leh anăn mnuih ƀuôn sang mkŏ wĭt hdră pla mjing, hrui blei, đŭng hruh leh anăn ba čhĭ, boh nik hlăm wưng Lăn Dap Kngư mŭt hlăm wưng hrui pĕ.

Mơ̆ng dŭm ênoh mrô kơ klei bi mlih mrô ti Dak Lak, dŭm gru hmô mkra mjing bi knar ti Lâm Đồng truh kơ bruă pŏk mlar mrô dưi brei ba čhĭ kơ wăl anôk mnia mblei China, dưi ƀuh bruă lŏ hma Việt Nam hlăk ƀrư̆ ƀrư̆ bi mlih mơ̆ng phŭn. Anăn jing bi mlih mơ̆ng hdră mkra mjing, hdră kriê dlăng truh kơ hdră mŭt hlăm wăl anôk mnia mblei; mơ̆ng mkra mjing hjăn jing bi hgŭm, mơ̆ng mđing kơ hnơ̆ng lu jing mđing kơ hnơ̆ng tŭ jăk, hnơ̆ng čuăn leh anăn boh tŭ yuôm. Anei ăt jing sa hlăm dŭm klei bi êdah klă klơ̆ng mơ̆ng hdră Việt Nam kpưn đĭ hlăm ênuk gưl mrâo: čŏng pô ba yua kdrăp mrâo, mđĭ hnơ̆ng tŭ jăk mnuih mă bruă, mkŏ wĭt bruă mkra mjing leh anăn mkăp jăk hĭn dŭm hnơ̆ng čuăn mơ̆ng wăl anôk mnia mblei tar rŏng lăn.