Mơ̆ng akŏ thŭn 2026 truh kơ ară anei, grăp knăm 4 grăp hruê kăm, Bruă sang čư̆ êa să Hàm Tân, čar Lâm Đồng lŏ mjing mjing mmông “Mđing hmư̆ leh anăn blŭ hrăm hŏng mnuih ƀuôn sang” ti anôk bruă să mtam. Trương Quang Lập, dôk ti să Hàm tân brei thâo, hdră ngă anei jing klă klơ̆ng, mkŏ mjing klei găl brei mnuih ƀuôn sang dưi bi trông hŏng khua gĭt gai alŭ wăl.

Dŭm hră mơar djŏ tuôm hŏng lăn ala ăt mâo klei ăl čôñ êdi, ƀiădah kyua knăm 4 mâo gru hmô drông mnuih ƀuôn sang, mâo khua gĭt gai mtô kơ hmei dŭm bruă ngă brei bi kluôm dhuôm, pral hĭn mơh.

Bi Lê Văn Hoà bi myuôm klei blŭ tlao đru bruă mơ̆ng knuă druh nah gŭ:

"Lač sĭt knuă druh tinei diñu êmăt hŏng bruă knuă, ƀiădah kyua klei mlih mrâo ăt mâo mơh đa đa dôk êmưt. Klă sĭt, grăp čô diñu hur har sơăi. Kâo hriê tinei mkra hră lăn, leh anăn mă bruă djŏ tuôm hŏng klei đăo, lač sĭt kâo mâo klei sa ai, kâo ƀuh jing jăk êdi”.

Mơ̆ng hruê ngă gru hmô truh kơ ară anei, Bruă sang čư̆ êa să Hàm Tân mđing hmư̆ êbeh 320 klei blŭ mguôp mkŏ mjing bruă Knŭk kna leh anăn ruh mgaih lu klei kpăk gun mơ̆ng mnuih ƀuôn sang hlăm klei ngă hră mơar Knŭk kna.

Amâo djŏ knŏng ti Hàm Tân, aguah knăm 5 tal êlâo hlăm mlan 7 mrâo anei, ƀuôn hgŭm Phú Thúy ăt gưl tal êlâo ba mdah gru hmô “Mnăm Kphê aguah mbĭt hŏng khua gĭt gai ƀuôn hgŭm leh anăn mnuih ƀuôn sang”. Hdră iêo jak klei uêñ miŭn mơ̆ng êpul êya.

Bruă sang čư̆ êa ƀuôn hgŭm Phú Thuỷ brei thâo “Mnăm Kphê Aguah” mkŏ mjing sa mlan 1 blư̆, bi mlih tuor ti 12 alŭ ƀuôn ti alŭ wăl. Aduôn Nguyễn Thị Minh Ngọc, khua dhar bruă mặt trận ƀuôn hgŭm Phú Thuỷ mñă ktang, mta kñăm mơ̆ng gru hmô jing klă sĭt ngă hdră êlan “jĕ hŏng mnuih ƀuôn sang, giăm hŏng nah gŭ”:

"Hŏng dŭm boh phŭn dưi bi trông leh anăn msir mgaih mtam snăn khua gĭt gai ăt lač kơ dŭm adŭ bruă thơ̆ng bi trông hlăm mmông mnăm kphê. Bi hŏng dŭm bruă brei ksiêm dlăng hră mơar čiăng msir mgaih snăn Anôk bruă mặt trận lŏ ksiêm dlăng leh anăn ba dŭm boh phŭn djŏ tuôm kơ klei dưi msir mgaih mơ̆ng dŭm anôk bruă thơ̆ng ksiêm dlăng leh anăn gĭt gai hmao msir mgaih kơ mnuih ƀuôn sang”.

Ai tiê mă klei sa ai mnuih ƀuôn sang leh anăn anôk bruă duh mkra jing hnơ̆ng mkă dôk lar ktang. Dŭm mmông “mnăm kphê aguah” amâodah dŭm hruê “hmư̆ mnuih ƀuôn sang blŭ” dôk đru mđĭ thiăm klei đăo knang, mkŏ mjing sa bruă ngă hră mơar mă klei mnuih ƀuôn sang ư ai jing hnơ̆ng mkă.