58 gŏ sang kahan ksiêm kdlưn hĭn mâo bi mni, bi ala kơ dŭm êtuh êbâo gŏ sang hlăm kluôm êpul lĭng kahan yang ƀuôn. Grăp gŏ sang mâo sa klei hdĭp, sa klei yăl dliê mdê mdê, ƀiădah mâo klei msĕ jing klei săn asei mlei, klei thâo bi đru lehanăn jing pô dôk nah tluôn kjăp čiăng kơ phung knuă druh, lĭng kahan găn klei dleh dlan, bi leh jăk bruă klam.

Êdah kdlưn msĕ si gŏ sang Trung tá Cù Thị Thu Hà, Adŭ bruă kahan ksiêm klei ngă soh hŏng matuĭ, Kahan ksiêm čar Phú Thọ. Ti tluôn mniê gĭt gai jing ung klam bruă hlăm sang, jing anôk jưh knang êđăp ênang čiăng kơ mô̆ kjăp ai tiê mă bruă. Ayŏng Nguyễn Minh Luân, ung Trung tá Cù Thị Thu Hà, brei thâo:

“Klei mdê mơ̆ng anôk bruă kahan ksiêm ksiêm kơ phung ngă soh hŏng matuĭ jing huĭ hyưt êdi, suăi êmăn. Mâo dŭm hruê mô̆ kâo nao ngă bruă mơ̆ng hnưm snăk, truh kơ mlam mmăt ka wĭt mơh, đĭng blŭ amâo dưi blŭ hrăm ôh. Dŭm mmông msĕ snăn, kâo knŏng dôk guôn leh anăn hmăng hmưi klei đăo knang jăk mơh. Thâo săng bruă mă mdê hjăn mơ̆ng mô̆ snăn kâo leh anăn gŏ sang hrăm mbĭt nanao čiăng kơ mô̆ kâo hơĭt ai tiê mă bruă".

Blŭ hrăm gĭt gai ti knăm anei, Thượng tướng Lê Quốc Hùng, Khua hlăm Anôk bruă Đảng gưl dlông, K’iăng khua Phŭn bruă kahan ksiêm mñă klă, hŏng êpul kahan răng mgang klei êđăp ênang yang ƀuôn, gŏ sang jing ƀĭng găp hơĭt kjăp, jing anôk knang kơ ai tiê lŏ dơ̆ng mđĭ ai čiăng kơ grăp čô lĭng kahan dưi găn jih klei dleh dlan, djă pioh klei ƀuăn rơ̆ng kơ bruă răng mgang klei êđăp ênang lăn čar. Ti tluôn grăp klei bi tŭ dưi kdrưh kơăm mâo nanao klei hrăm mbĭt, săn asei mlei hjăn păn mơ̆ng amĭ, ama, ung, mô̆ leh anăn phung anak hlăm grăp boh sang.

Čiăng kơ bruă hlăm gŏ sang leh anăn anôk bruă nah tluôn kahan ksiêm ƀrư̆ hruê ƀrư̆ êlam hĭn, Kiăng Khua phŭn bruă Lê Quốc Hùng mtă kơ gưl bruă Đảng, khua gĭt gai dŭm êpul bruă brei mlih mrâo klei mĭn, klă sĭt kriê dlăng klei hdĭp mnơ̆ng dhơ̆ng leh anăn ai tiê klei mĭn kơ knuă druh lĭng kahan, boh nik phung mă bruă ti krĭng taih kbưi, knông lăn amâodah dŭm bruă mặt trận hgăm. Mbĭt anăn, dŭm êpul êya brei rơ̆ng boh tŭ dưn dŭm hdră đru kơ yang ƀuôn msĕ si "Anak rông kahan ksiêm să" amâodah "Amĭ pô rông".

K’iăng khua phŭn bruă Lê Quốc Hùng čang hmăng grăp gŏ sang lŏ dơ̆ng mđĭ lar knhuah gru, mjuăt bi hriăm anak čô hdĭp mâo klei mĭn, đru mkŏ mjing êpul kahan ksiêm ƀrư̆ hruê ƀrư̆ kjăp ktang hlăm ênuk đĭ kyar mrâo mơ̆ng lăn čar:

“Kâo đăo knang, hŏng knhuah gru jhŏng ktang, thâo khăp, thâo pap mơ̆ng êpul kahan ksiêm yang ƀuôn, hŏng klei hrăm mbĭt mơ̆ng dŭm gŏ sang leh anăn klei gĭr mơ̆ng jih jang yang buôn, grăp čô knuă druh, lĭng kahan hlăm jih jang bruă srăng mâo thiăm klei mđĭ ai, duh myơr čiăng bi leh tŭ kdlưn bruă klam, đru mkŏ mjing êpul kahan ksiêm yang ƀuôn hlăm hdră bi lông ktưn bi ktưn ‘Klei bhiăn kjăp hĭn”, ‘Sĭt suôr hĭn” leh anăn “Giăm mnuih ƀuôn sang hĭn’ kyua klei hdĭp êđăp ênang kơ Mnuih buôn sang”./.