Anei jing Hdră mâo bi mŭt mơ̆ng 4 hdră kñăm ala čar êlâo dih jing sa hdră kluôm, mâo: Mkŏ mkra krĭng ƀuôn sang mrâo, bi hrŏ ƀun hơĭt kjăp, mđĭ kyar bruă duh mkra - ala ƀuôn krĭng mnuih djuê ƀiă leh anăn krĭng čư̆ čhiăng; Mđĭ kyar dhar kreh; Mlih mrâo, mđĭ hnơ̆ng tŭ jăk bruă mtô bi hriăm; Dhar kreh, ênoh mnuih leh anăn mđĭ kyar. Kluôm ênoh prăk hluê ngă wưng thŭn 2026-2030 jing giăm 880.000 êklai prăk (hlăm anăn ngăn prăk gưl dlông jing 345.000 êklai prăk); mđing tal êlâo kơ dŭm alŭ wăl dleh dlan. Ênoh prăk mơ̆ng hdră bruă mđing djŏ hdră kñăm duh bi liê kơ mnuih ƀuôn sang dưi dưn, ktang phĭt amâo dưi yua čiăng tla prăk mlan amâo dah bruă ngă grăp hruê mơ̆ng anôk bruă.

Gưl dlông jao klei dưi kơ gưl să kriê dlăng dŭm hdră bruă hnơ̆ng điêt, hdră ngă bruă ênưih. Dŭm hdră bruă ti gŭ 500 êklăk prăk dưi jao klă anăp kơ êpul êya mnuih ƀuôn sang hluê ngă. Ti anôk bi kƀĭn, Khua knŭk kna Lê Minh Hưng mtă brei bi mguôp dŭm hdră ala čar kñăm brei mjing klei bi mlih klă sĭt hlăm klei kiă kriê, bi hrŏ anôk bruă, bi hrŏ klei ngă hră mơar lehanăn msir mghaih klei bi ktlah, bi kluôm; mđĭ klei tŭ dưn ba yua dŭm ai dưi, klei mâo; mđing ai dưi knŭk kna čiăng duh bi liê mâo mta phŭn, mta kñăm. Khua knŭk kna jao kơ Khua knơ̆ng bruă sang čư̆ êa dŭm čar, ƀuôn prŏng klă klơ̆ng ngă Khua Anôk bruă gĭt gai gưl čar lehanăn bi leh bruă bi kluôm ênŭm êlâo kơ hruê 25/10 kơ anăp. Dŭm alŭ wăl brei mđing bi liê jih hnơ̆ng hlăm brô 12.000 êklai prăk ngăn prăk ba jao mơ̆ng wưng thŭn 2021 - 2025 truh kơ thŭn anei./.