Hluê si klei hưn mdah klei blŭ mguôp mơ̆ng anôk bruă duh mkra, klei gun kpăk hlăm 4 mta bruă (lŏ hma, wăl hdĭp mda, mnơ̆ng gŭ lăn, mnơ̆ng yuôm hlăm gŭ lăn) kƀĭn 5 mta phŭn mâo knhuah kluôm. Anăn jing hnơ̆ng êmưt leh anăn klei bi kpleh ênoh yuôm lăn ala; klei bi ktlah plah wah bruă klam ngăn prăk hdră bhiăn leh anăn klei dưi dưn yua lăn ala; Klei amâo jăk hlăm hdră bhiăn hŏng dŭm klei bi mklă bruă knŭk kna leh ba mdah; Kƀah hnơ̆ng čuăn tĭng mkă hlăm klei ngă hră mơar wăl hdĭp mda leh anăn hdră čuăl mkă; Klei mĭn kriê dlăng djah djâo hluê hdră lui hĕ amâo dah lŏ wĭt.  

Klah čŭn klei bi kƀĭn, K'iăng Khua knŭk kna Hồ Quốc Dũng mtă kơ dŭm Phŭn dhar bruă wĭt lač klă mngač, klă nik dŭm klei akâo mơ̆ng anôk bruă duh mkra, bi klă bruă klam mơ̆ng Gưl dlông leh anăn alŭ wăl. Mñă kơ knŭk kna ară anei mđing kơ bruă mkŏ mjing klei bhiăn leh anăn ruh mgaih klei dleh dlan hluê hŏng klei mbha gưl, mbha klei dưi ktang kơ alŭ wăl, K’iăng khua knŭk kna mñă dŭm klei gun kpăk, klei dleh dlan, dŭm klei čuăn mơ̆ng hdră bhiăn adôk mtŭk mtŭl, ka djŏ hlăm bruă lăn ala leh anăn wăl hdĭp mda brei dưi ksiêm dlăng hlăm hdră mkra mlih hdră bhiăn lăn ala, hdră bhiăn wăl hdĭp mda, hdră bhiăn jia ngăn prăk leh anăn dŭm hră mơar ktrâo lač hluê ngă čiăng mjing klei găl hĭn kơ anôk bruă duh mkra mđĭ kyar, đru mguôp hlăm klei đĭ kyar kluôm mơ̆ng lăn čar.