Dŭm hruê anei, adei Vũ Trần Tiến Đạt, hđeh hriăm hră adŭ 5 Sang hră gưl sa Nguyễn Thị Định, să Ia R'vê, mbĭt hŏng phung ƀĭng găp čưng boh ti kdrăn tač ti anăp ƀăng jang sang hră. Tĭng nah dih, Sang hră rông hđeh knŭk kna čiêm rông să Ia R'vê ƀrư̆ ƀrư̆ bi leh dŭm mta bruă knhal tuič mơ̆ng anôk dôk jưh, anôk bi lông lu mta, sang dlăng hră… Adei Đạt hơ̆k kdơ̆k kyua thŭn hriăm 2026–2027 kơ anăp, adei mbĭt hŏng phung ƀĭng găp dưi hriăm hră, dôk hlăm sang hră mrâo:

“Nai mtô leh anăn amĭ ama kâo lač jing mơ̆ng thŭn hriăm kơ anăp kâo srăng nao hriăm hlăm Sang hră knŭk kna čiêm rông mlir gưl să Ia R’vê. Kâo ƀuh mơak êdi tơdah dưi nao hlăm anăn hriăm. Ti anăn, phung nai srăng kriê dlăng hmei, mơ̆ng huă ƀơ̆ng, pĭt đih, mdei leh anăn mâo wăt anôk hriăm mjuăt asei mlei, mjuăt ktang asei mlei. Knhal jih hruê kăm kâo kơh wĭt čuă kơ sang. Kâo ƀuăn srăng hriăm hră kjăp. Klei hmăng hmưi kâo jing pô čưng boh.”

Bi adei Nông Thị Thùy, hđeh hriăm hră adŭ 7 Sang hră gưl 2 Trần Hưng Đạo, să Ia Lốp brei thâo, Sang hră knŭk kna rông ba mlir gưl hriăm să Ia Lốp dưi rŭ mdơ̆ng hlăm tur knơ̆ng mơ̆ng Sang hră gưl 1 Nguyễn Trãi leh anăn Sang hră gưl 2 Trần Hưng Đạo. Kyua anăn, thŭn hriăm kơ anăp adei srăng hriăm hră, hdĭp mda ti anei. Ti anăp klei čang hmăng dưi hriăm hlăm sang hră mrâo prŏng siam, djăp ênŭm kdrăp mnơ̆ng, hŏng wăl anôk hdĭp mda doh siam, adei bi êdah:

“Kâo mơak snăk kyua dưi mŭt hriăm sang hră Knŭk kna rông ba kyua sang kâo kbưi hŏng sang hră truh 15 km. Hlăm sang hră mâo ƀĭng găp, nai mtô, mâo anôk nội trú mniê prŏng siam. Kâo srăng čŏng pô hdĭp mda, čŏng pô hriăm hră. Klei hmăng hmưi kâo jing nai mtô. Kâo srăng gĭr hriăm hră bi jăk čiăng dưi mâo klei hmăng hmưi, êdei anei lŏ wĭt ti knông lăn mtô klei thâo kơ phung hđeh tinei.”

Čar Dak Lak mâo 4 să knông lăn mâo Êa Bung, Ia Rvê, Ia Lốp leh anăn Ƀuôn Đon. Dŭm să mâo ênhă prŏng, mnuih ƀuôn sang ƀiă, lu alŭ, ƀuôn kbưi hŏng wăl krah să dŭm pluh km. Amai Vi Thị Thiều, ti alŭ  Êdam ểa čô̆ kơ brưa, să Ia Lốp brei thâo: Gŏ sang mâo dua čô anak dôk hriăm adŭ 8 lehanăn adŭ 6. Sang kbưi hŏng sang hră giăm 20 km kyua anăn bruă atăt ba anak nao sang hră jing dleh dlan êdi. Bruă phung anak dưi dôk hlăm sang hră đru leh kơ gŏ sang hơĭt ai tiê hĭn.

“Êjai kâo hriăm hră, dôk hlăm sa anôk jăk siam, mâo djăp mnơ̆ng yua hŏng anôk huă ƀơ̆ng, pĭt đih djăp ênŭm snăn kâo hơĭt ai tiê. Anei srăng jing anôk đru kơ kâo đĭ hriê kơ prŏng kluôm dhuôm mơ̆ng klei thâo săng truh kơ asei mlei. Jing amĭ ama snăn kâo mơak êdi kyua amâo guôn nao atăt anak grăp hruê msĕ êlâo ôh, leh anăn kăn guôn kiă kriê diñu rei. Knhal jih hruê kăm diñu wĭt hlăp, čuă sang.”

Wưng thŭn 2025–2027, čar Dak Lak rŭ mdơ̆ng 4 sang hră knŭk kna čiêm rông ti dŭm să knông lăn leh anăn krĭng dleh dlan. Hlăm anăn, dŭm sang hră ti Ia R’vê, Ia Lốp leh anăn Ƀuôn Đon srăng ba yua hlăm thŭn hriăm 2026–2027, drông hlăm brô 3.100 čô hđeh mơ̆ng adŭ 1 truh kơ adŭ 9, hŏng hlăm brô 2/3 hđeh hriăm hră, dôk hlăm sang hră.

Hồ Sĩ Cát, Khua sang hră Knŭk kna rông ba mlir gưl Ia R’vê (să Ia R’vê), brei thâo sang hră bi leh bruă hrŏng ruah 910 čô hđeh mơ̆ng 3 sang hră mâo: Sang hră gưl sa, gưl dua Chu Văn An, gưl dua Nguyễn Thị Định leh anăn gưl sa Nguyễn Đình Chiểu. Mbĭt anăn, sang hră dôk bi kluôm ênŭm phung nai mtô, mnuih mă bruă adŭ bruă, kriê dlăng hđeh leh anăn anôk huă ƀơ̆ng, mprăp drông hđeh mŭt hlăm thŭn hriăm mrâo 2026 – 2027.

“Tơdah phung hđeh nao sang hră leh snăn bruă kriê dlăng phung hđeh mơ̆ng aguah truh kơ tlam amâo lŏ uêñ mĭn ôh, hơĭt ai tiê nao kơ pưk hma. Amĭ ama amâo lŏ uêñ mĭn kơ yang hruê, tlam drông anak, brei anak huă ƀơ̆ng. Jih jang phung hđeh hriăm ti sang hră knŭk kna rông ba dưi dưn dŭm hdră mtrŭn jăk găl mơ̆ng prăk huă ƀơ̆ng, čhum ao, hdruôm hră, bảo hiểm mdrao mgŭn mâo Knŭk kna đru brei.”

 Dŭm boh sang hră ti knông lăn krĭng lăn dap kngư amâo djŏ knŏng pŏk klei găl hriăm hră jăk hĭn ƀiădah lŏ pŏk êlan kơ klei čang hmăng, đru kơ phung hđeh krĭng knông lăn đĭ kyar kluôm dhuôm, čiăng kơ êdei anăp lŏ wĭt đru mkŏ mkra ƀuôn sang anôk jưh knang mơ̆ng lăn čar.