Nao hŏng bruă waih mran hŏng kngan ti êlah êa Bàu Đá, dưi dlăng klă mnơ̆ng dhơ̆ng hdĭp ti gŭ êlah êa êđăp. Dŭm kdrăn rơ̆k, čư̆ kyâo, boh tâo prŏng điêt, leh anăn dŭm kdrăn mnga krih ƀâo mngưi jih hruê mlan, ngă kơ wăl anôk Bàu Đá jăk siam hĭn.

Êbeh leh 70 thŭn Đào Kim Thông ti alŭ Mỹ Điền, să Hòa Thịnh siă suôr leh hŏng krĭng dliê êa anei mơ̆ng điêt leh anăn ăt găn leh dŭm thŭn mlan bi blah ktang phĭt êdi. Kyua krĭng dliê êa Bàu Đá anei đru mgang leh kơ mnuih ƀuôn sang leh anăn rông ba leh Cách mạng čiăng ngă klei krŭ kdơ̆ng Hòa Thịnh thŭn 1960.

"Klei krŭ kdơ̆ng leh anăn mnuih ƀuôn sang tinei jing ênuk đuĕ kơ phung roh...đĭ mran nao mdơ̆ng pưk ti gŭ dŭm ƀĕ ana kyâo prŏng anăn, hriê tinei dôk mdăp. Ƀuh êdeh phiơr jing mŭt hlăm lam pum đuĕ dăp. Klei krŭ kdơ̆ng leh anăn truh thŭn 63, 64 lŏ dơ̆ng bi kdơ̆ng hŏng phung roh, drei đuĕ nao hlăm ênao êa anei, nao hlăm čư̆ đuĕ dăp ti gŭ ƀăng anăn."

Mlan 7 leh anăn Mlan 8, mnga krih ti Bàu Đá Hòa Thịnh ăt dôk siam êdi. Êa hrah mda, êa kô̆, êa hrah jŭ mơ̆ng dŭm đang mnga ti dlông êa mbĭt hŏng mnga knŭng, mnga truôl jang mơ̆ng dlông… ƀrư̆ bi siam hĭn kơ rup dliê êngăp êa Bàu Đá jăk siam hĭn, tluh jak lu tue hĭn. Hŏng mnuih ƀuôn sang alŭ wăl, Bàu Đá jing wăl anôk jăk siam, jing krĭng lăn hƀuê ênuk, ăt jing anôk mâo lu mnơ̆ng dhơ̆ng:

“Kâo ƀuh klei jăk siam ti ênao êa Bàu Đá anei jing mâo êman yơh, leh anăn kan, čĭm, kan, leh anăn ana bần, leh anăn mnga krih, kram… Djăp mta ana yơh. Hlăm anei hiu čhưn ênguê jing jăk siam êdi. Mơ̆ng mlan 12 truh kơ mlan 9, mlan 10 grăp thŭn jing siam hĭn."

Hlăm lu thŭn êgao, mnuih ƀuôn sang ti alŭ Mỹ Điền leh anăn dŭm alŭ, dŭm să riêng gah hdĭp mda jưh knang kơ klei găl mnơ̆ng dhơ̆ng hlăm êa ti krĭng wăl dliê êa ksĭ anei. Amâo djŏ knŏng dŭm năn ôh, hŏng klei jăk siam mơ̆ng lăn adiê, mbĭt hŏng wăl anôk hdĭp mda jăk siam, lu jơr, krĭng dliê êa ksĭ Bàu Đá Hòa Thịnh hlăk dôk ti anăp klei găl mđĭ kyar bruă hiu čhưn ênguê hlăm wăl lăn êa. Phương Văn Lành, Khua bruă Đảng să Hòa Thịnh brei thâo, alŭ wăl tă hdră mđĭ kyar dliê êa ksĭ Bầu Đá jing anôk hiu čhưn ênguê êpul êya mguôp hŏng bruă kriê pioh čư̆ dliê êa:

          Alŭ wăl mkŏ mjing leh tour hiu čhưn ênguê Bàu Đá. Ti anăp snăn srăng mkŏ mjing hdră êlan mđĭ kyar bruă hiu čhưn ênguê êpul êya hluê hdră mkŏ mjing êpul hgŭm bruă hiu čhưn ênguê êpul êya, leh anăn phung ƀuôn sang ti ƀuôn Mỹ Điền anei srăng jing phung nao hgŭm ngă bruă hiu čhưn ênguê. Diñu srăng waih mran atăt phung tuê hiu čhưn dlăng krĭng dliê êa Bàu Đá, leh anăn srăng jing phung kăp ktrâo atăt phung tuê hiu čhưn hưn mthâo kơ klei jăk siam, klei găl mâo mbĭt hŏng anôk lăn mnga êa mơak Bàu Đá anei”.

Hòa Thịnh –anôk tuôm jing krĭng "phŭn êa lip" dleh dlan ară anei dôk ti anăp knhuang nao mlih mrâo bŏ hŏng klei bi mlih jăk siam. Bruă krŭ wĭt klei găl hiu čhưn ênguê ti ênao êa Bàu Đá amâo djŏ knŏng pŏk hdră duh ƀơ̆ng mrâo, mđĭ klei hdĭp kơ mnuih ƀuôn sang, ƀiădah lŏ jing boh kdrŭt yuôm bhăn kriê pioh kluôm dhuôm klei jăk siam mơ̆ng lăn adiê.