Dŭm klei hưn mthâo mbĭt mâo: Klei hưn mthâo mbĭt bi êlam hĭn klei bi mjĕ Ƀĭng hgŭm phŭn kluôm dhuôm Việt Nam – Australia; Klei hưn mthâo mbĭt kơ bruă mđĭ ai bi kdơ̆ng, mdrơ̆ng leh anăn krŭ wĭt bruă duh mkra Việt Nam – Australia; Klei hưn mthâo mbĭt kơ bruă mđĭ klei bi hgŭm bruă kreh knhâo, kdrăp mrâo leh anăn mlih mrâo hŏng klei mbruă plah wah Việt Nam leh anăn Australia. Dŭm hră mơar bi hgŭm kluôm hlăm lu mta bruă, mâo dŭm klei bi hdơr kơ klei bi hgŭm hlăm bruă lŏ hma leh anăn mđĭ kyar krĭng ƀuôn sang hơĭt kjăp, hlue ngă hdră bhiăn hlăm êa ksĭ, bi hgŭm leh anăn bi đru hdơ̆ng găp hlăm bruă răng mgang knông lăn, bi hgŭm kơ bruă mjuăt bi hriăm bruă knuă, bruă mdrao mgŭn, bruă duh mkra mrô leh anăn bi hgŭm kơ bruă dŭ mdiăng êdeh phiơr.

Gưl nao čhưn gưl knŭk kna truh ti Australia mơ̆ng Khua gĭt gai Đảng, Khua lăn čar Tô Lâm leh anăn Êpul bi ala gưl dlông Việt Nam lŏ dơ̆ng bi kjăp leh anăn mđĭ hnơ̆ng klei đăo knang kđi čar, mjing boh kdrŭt mrâo kơ bruă pŏk ngă tŭ dưn klei bi hgŭm hdră êlan kluôm dhuôm, mbĭt anăn tă hdră êlan kơ dŭm klei găl bi hgŭm hlăm wưng kơ anăp; mjing klei găl čiăng kơ phung khua kiă kriê dua ala čar bi trông êlam kơ dŭm boh klei hlăm alŭ wăl leh anăn tar rŏng lăn bi mđing, mđĭ hdră bi hgŭm hlăm dŭm klei bhiăn lu tĭng, hluê anăn bi mklă klei ƀuăn rơ̆ng mbĭt kơ klei êđăp ênang, hơĭt kjăp, bi hgŭm leh anăn mđĭ kyar hơĭt kjăp ti alŭ wăl leh anăn tar rŏng lăn.