VOV4.Êđê-Mbĭt hŏng lăn čar, mơ̆ng êlâo wưng tết Nguyên đán, ti đa đa alŭ wăl Lăn Dap Kngư, phung êdam êra hlăm ênuk thŭn bi hơ̆k mơak leh anăn mjêč nao mkă dlăng nao kahan.

VOV4.Êđê - Mbĭt hŏng kluôm ala, hlăm mnĭt mmông yuôm bhăn kkuh drông thŭn mrâo Ất Tỵ, mnuih ƀuôn sang dŭm djuê ana krĭng Lăn dap kngư ktưn hưn êdi hŏng dŭm klei bi mlih mơ̆ng ƀuôn sang, čang hmăng sa thŭn mrâo klei hdĭp trei mđao, yâo mơak.

VOV4.Êđê - Hlăm mnĭt mmông yuôm bhăn mơ̆ng hruê akŏ thŭn mrâo Ất Tỵ 2025, hmei alum mơĭt truh kơ ƀĭng găp drei kluôm Asăp hơêč hmưi Têt mơ̆ng Khua lăn čar Lương Cường truh hŏng mnuih ƀuôn sang, lĭng kahan hlăm kluôm ala čar

VOV4.Êđê - Thŭn 2024, găn lu klei dleh dlan, klei lông dlăng, bruă duh mkra Lăn Dap Kngư dưi mâo êbeh 484 êbâo êklai prăk, hnư hrui wĭt kah knar grăp čô đăo tĭng mâo 78,5 êklăk prăk hlăm sa thŭn, đĭ 16% mkă hŏng thŭn êlâo. Mŭt hlăm thŭn mrâo Ất Tỵ 2025 anei, lu bĭt êlan dơ̆ng pral dôk rŭ mjing, mkŏ mjing tur knơ̆ng čiăng kơ Lăn Dap Kngư bi lar klei găl mâo, čhuang mŭt hlăm ênuk mrâo.

VOV4.Êđê - Tuôm jing khua kiă kriê sa knơ̆ng bruă thơ̆ng kơ klei hưn mthâo mrâo mrang ti ƀuôn prŏng Hồ Chí Minh, ƀiădah kyua hmăi mơ̆ng klei ruă tưp Covid-19, ayŏng Y-Bhiông Ƀuôn Yă wĭt ti ƀuôn sang pô ti ƀuôn Kmrơ̆ng Prŏng B, să Ea Tu, ƀuôn prŏng Ƀuôn Ama Thuôt, čar Dak Lak čiăng duah êlan nao mrâo. Mơ̆ng thŭn 2021, ñu mphŭn ksiêm duah kơ dhar kreh leh anăn mnơ̆ng ƀơ̆ng huă mnuih Êđê, mkŏ mjing dŭm tour hiu čhưn dhing, ktuê dlăng dhar kreh ti dŭm ƀuôn êlan ti čar Dak Lak. Ƀri wưng hruê tal êlâo hlăm yan mnga, alum kơ ƀĭng găp drei hmư̆ klei blŭ hrăm hŏng ayŏng Y-Bhiông Ƀuôn Yă kơ klei hmăng hmưi mkŏ mjing ƀuôn sang ƀrư̆ hruê ƀrư̆ mlih mrâo.

VOV4.Êđê - Thŭn 2024 hŏng ai tiê ktang phĭt, đua klam mơ̆ng dŭm gưl bruă, dhar bruă mbĭt hŏng klei hrăm mbĭt, klei gĭr mơ̆ng knơ̆ng bruă leh anăn jih jang mnuih ƀuôn sang, bruă duh mkra – ala ƀuôn mơ̆ng čar Kon Tum mâo klei đĭ kyar ktang ba wĭt klei hơ̆k mơak trei mđai leh anăn mkŏ mjing tur knơ̆ng đĭ kyar kơ thŭn mrâo 2025.

VOV4.Êđê - Thŭn 2024 jing thŭn dŭm čar Lăn Dap Kngư mâo lu klei tŭ dưn hlăm bruă mđĭ kyar bruă duh mkra leh anăn mđĭ klei hdĭp mda mnuih ƀuôn sang. Lu klei găl prŏng ăt pŏk hŏng krĭng wăl tơdah mâo lu hdră êlan mrâo dưi mtrŭn, pŏk êlan kơ Lăn Dap Kngư đĭ kyar. Mđĭ lar klei găl bruă lŏ hma, mnơ̆ng hlăm gŭ lăn, hiu čhưn ênguê, lŏ mâo thiăm klei găl mơ̆ng hdră êlan mrâo,mnuih ƀuôn sang dŭm djuê ƀiă ti Lăn Dap Kngư hơ̆k mơak mŭt hlăm thŭn mrâo, mkŏ mjing sa wưng đĭ kyar mrâo bŏ hŏng klei čang hmăng.

VOV4.Êđê - Hŏng mnuih ƀuôn sang kluôm ala, mnuih ƀuôn sang ti kdriêk knông lăn Tuy Đức, čar Dak Nông ăt dôk mơak mñai drông thŭn mrâo hŏng klei đăo knang kơ sa thŭn tŭ dưn, hŏng lăn čar mŭt hlăm ênuk mrâo, ênuk kpưn đĭ mơ̆ng djuê ana.

VOV4.Êđê- Hŏng klei gĭr mơ̆ng dŭm gưl bruă, dhar bruă, klei hrăm mbĭt mơ̆ng phung mâo ai tiê kmah, thŭn 2024, kdriêk M’Drak, čar Dak Lak dưi iêo mkrum dŭm pluh êklai prăk rŭ mdơ̆ng mrâo êbeh 250 boh sang leh anăn mkra bi jăk 190 boh sang kơ phung mâo klei hdĭp dleh dlan amâo mâo sang dôk. Dŭm boh sang mrâo đru kơ dŭm êtuh gŏ sang “mâo anôk dôk hơĭt”. Mnuih ƀuôn sang mơak drông yan mnga mrâo Ất Tỵ 2025 mđing truh kơ klei hdĭp trei mđao.

VOV4.Êđê- Leh giăm 65 thŭn dưi ƀuh ti krah čư̆ dliê Phong Nha - Kẻ Bàng, čar Quảng Bình, mnuih Rục dôk ƀrư̆ ƀrư̆ mâo dŭm klei mlih mrâo hlăm klei mđĭ kyar bruă duh mkra ala ƀuôn. Mơ̆ng sa djuê ana mnuih dliê, ară anei diñu thâo mđĭ kyar bruă duh mkra, nao hgŭm mkŏ mjing ƀuôn sang. Mŭt hlăm ênŭk kpưn đĭ mơ̆ng djuê ana Việt Nam, mnuih Rục mâo leh lu boh tŭ bi klă klei đĭ kyar.