Năng mđing êdi, knŏng hlăm hruê kăm êgao, ênoh mnuih ruă đĭ leh amâo mâo thâo hlao ôh hŏng êbeh 210 čô mnuih nao đih mdrao kơ sang êa drao. Klei ruă tưp bluh đĭ ktang hĭn ti ƀuôn hgŭm Tuy Hòa, leh anăn dŭm boh să Phú Hòa, Đồng Xuân, Sông Hinh, Krông Ana, Ea Sup, Ea Hleo čar Dak Lak. Gang mkhư̆ klei ruă tưp, răng mgang klei suaih pral kơ mnuih ƀuôn sang wưng anei hlăk jing bruă klam mjêč êdi, amâo dưi mâo klei ngă ngơi mang. Mta phŭn ngă truh klei đĭ lar ktang ti dŭm alŭ wăl să, ƀuôn hgŭm kyua adiê hjan mđiă amâo mâo sa hnơ̆ng, mjing klei găl kơ kêč ƀloh kc̆eh.

Năng huĭ hĭn, ti lu ƀuôn sang krĭng taih kbưi, klei mưng mkăp pioh êa hlĭm hjan hlăm dŭm brŏng, anôk mkăp êa ƀiădah amâo mâo kđăl ƀăng, mbĭt hŏng klei juăt mưng amâo bi mdoh ôh dŭm mta mnơ̆ng djah djâo djiêu gah pưk sang  mơ̆ng sa kdrêč mnuih ƀuôn sang mjing hĕ anôk “mboh kčeh” kêč ƀloh lu snăk.

Ti anăp klei dleh ktuê dlăng anei, Anôk bruă ksiêm dlăng klei ruă tưp čar Dak Lak dôk bi hgŭm tliêr kjăp hŏng êpul bruă mdrao mgŭn alŭ wăl pŏk ngă mđrăm mbĭt dŭm hdră msir. Êngao kơ bruă krih êa drao mkhư̆ klei ruă, bruă mjuăt bi hriăm êlam leh anăn mđĭ hĭn klei dưi đăo knăl kơ anôk ba anăp ti dŭm boh sang êa drao să, ƀuôn hgŭm hlăk mâo klei mđing êdi. Lac̆ kơ hdră phŭn anei, Aê mdrao Lê Phúc, K’iăng khua Anôk bruă răng mgang klei ruă tưp c̆ar Dak Lak brei thâo:

 “Hmei mđĭ hĭn leh anăn ngă pral bruă gang mkhư̆ , bi kdơ̆ng hŏng véc tơ, jing ksiêm dlăng, msir mgaih kêc̆ ƀloh, hluăt lŏk, kêc̆ kơ êpul bruă mdrao mgŭn nah gŭ ti dŭm Sang êa drao să, ƀuôn hgŭm. Mơ̆ng anăn, mđĭ klei thâo diñu čiăng mkăp djŏ hŏng klei đăo knăl klei huĭ hyưt hlăm grăp alŭ wăl, čiăng ngă jăk bruă đăo tĭng ăt msĕ mơh tŭ dưn hĭn hlăm bruă gang mkhư̆ klei ruă êngoh bi ƀlĕ êrah".

Klei gĭr mơ̆ng anôk bruă mdrao mgŭn jing prŏng êdi, ƀiădah hdră mdrơ̆ng hŏng klei ruă êngoh bi ƀlĕ êrah knŏng dưi tŭ jing tơdah mâo klei čŏng pô mơ̆ng mnuih ƀuôn sang. Bi hrô hŏng klei amâo mâo mđing dôk guôn klei ruă tưp hriê kơh gang mkhư̆, grăp gŏ sang pioh mtam 10 mnĭt hlăm sa hruê kăm čiăng mdlưh dŭm kdrăp mgơ̆ng êa, bi mdoh djah djâo leh anăn mkŏ mjing klei mưng pĭt kă mŭng wăt yang hruê. Brei čŏng ngă bruă mơ̆ng bruă điêt hĭn čiăng răng mgang klei suaih pral kơ gŏ sang leh anăn rơ̆ng klei êđăp ênang kơ êpul êya hlăm yan hjan anei.