Thâo klă kơ klei ruă tưp êngoh bi ƀlĕ êrah thŭn anei, K’iăng khua nai prŏng, nai prĭn Trần Đắc Phu, Khua anôk bruă gang mkhư̆ klei ruă êlâo dih lač, Klei ruă tưp anei bluh đĭ amâo lŏ djŏ tui si klei bhiăn ƀuh leh hlue yan êlâo ôh. Msĕ si êlâo dih kreh bluh đĭ hlăm yan hjan, leh kơ anăn dơ̆ng hrŏ, snăn ară anei ênoh mnuih ruă dưi ƀuh hlăm jih thŭn, wăt hlam yan bhang không, snăn jing dôk hyưt êdi klei ruă anei dleh răm luič hlăm ƀuôn sang:

Dôk hyưt kơ klei ruă tưp srăng bluh đĭ, kyuadah ară anei dơ̆ng ƀuh leh mnuih mâo klei ruă êngoh bi ƀlĕ êran, yap jing đĭ hĭn mkă hŏng wưng anei thŭn dih, ƀuh jing dleh dưi thâo tĭng mkă, kyuadah wưng ñu bluh đĭ dleh dưi thâo tĭng mơh mkŏ hŏng êlâo dih. Thŭn anei, mâo lu mta klei amâo mâo găl hĭn, msĕ si yan adiê amâo mâo jăk, klei mnuih ƀuôn sang bi găn êrô lu. Mđiă ktang, hjan lu, hnơ̆ng h’uh êgao kơ 25 độ jing klei jăk găl êdi kơ kêč ƀloh bluh đĭ boh nik kêč ba klei ruă êngoh bi ƀlĕ êrah.”

 Ti ƀuôn prŏng Hồ Chí Minh ênoh mnuih mâo klei ruă êngoh bi ƀlĕ êrah lu hĭn hlăm kluôm ala, yap truh ti mlan 6/2026, mâo leh 18 êbâo čô mnuih mă bruă, lehanăn mâo leh 4 čô mnuih djiê. Dŭm čô mnuih ruă anăn kbiă hriê mơ̆ng djăp alŭ wăl. Tui si bruă mdrao mgŭn ƀuôn prŏng, klei ruă êngoh bi ƀlĕ êrah thŭn anei mâo klei bi knăl jing đĭ hĭn pral hĭn kơ yang đar. Sa klei năng mđing jing hlăm ênoh mnuih ruă êngoh anăn mâo klei bi knăl mdê mdê. Ară anei, êgao kơ mkrah mnuih ruă lu jing mnuih prŏng, hlăm anăn lu jing thŭn mơ̆ng 11 - 30 thŭn ƀuh lu hĭn. Klei anei bi knăl jing klei ruă êngoh bi ƀlĕ êrah anei amâo lŏ kñăm knŏng hlăm phung hđeh ôh msĕ si drei kreh mĭn êlâo dih. Nai prĭn, aê mdrao Trương Hữu Khanh, K’iăng khua êpul hgŭm kiă kriê klei ruă tưp ƀuôn prŏng Hồ Chí Minh, mtă:

“Boh nik klei ruă êngoh bi ƀlĕ êrah, jing ti hrue jih leh hlơr ăt kreh lŏ ngă mơh. Mâo đa đa mnuih ruă ƀuh suaih leh, kgŭ hiu msĕ si aguah tlam leh, dlăng hlăm asei mlei amâo mâo ƀuh êman êmik ôh snăn năng ai jing suaih leh sĭt. Bi tơdah ăt dôk hlă\m asei mlei bi hlơr nanao, dôk hwĭr kŏ, bi ruă hlăm tian, lehanăn bi êmăn êmik, amâo mâo čiăng huă ƀơ̆ng răng kơ klei ruă srăng lŏ bluh đĭ. Kyuanăn bi mkă jêñ jêñ aruăt êrah, mkă hnơ̆ng êrah đĭ. Lŏ nao bi mkă dlăng klei ruă khădah jih leh êngoh dưn.”

Phung truăn kơ bruă mdrao mgŭn bi lač, amâo lu snăk mnuih lĕ hlăm klei amâo mâo răng ôh hŏng mta klei ruă anei. Lu duah bi mdrao mă hjăn hlăm sang, amâodah ba nao kơ sang hnui leh, kyua dlăng hlăm asei mlei êngoh hlơr nanao amâo mâo thâo lŏ lưh, jing mdê hŏng klei êngoh hdrah aguah tlam. Êjai anăn lĕ, klei ruă êngoh bi ƀlĕ êrah, klei ruă đuĕ nao kơ ktrŏ hŏng klei pral snăn, truh kơ klei bi kñhăk, kluh êrah lu, dlưh awăt lu mta hlăm asei mlei, lehanăn ngă truh kơ djiê tơdah amâo mâo pral dưi hmao ƀuh klei ruă anei lehanăn mdrao mgŭn hĕ bi djŏ. Võ Hải Sơn, K’iăng anôk bruă gang mkhư̆ klei ruă, hlăm phŭn bruă mdrao mgŭn brei thâo, mnuih ƀuôn sang bi lăm lui hĕ jih klei mĭn soh čhuai lačdah kêč ƀloh ba klei ruă anei knŏng kčeh mđai hlăm dŭm mnơ̆ng kdơ̆ng êa čhŏ, amâodah hdĭp hlăm anôk lu mnuih, dôk hlăm sang dlông tal amâo mâo klei ruă ôh, klei anăn jing soh čhuai. Boh sĭt, wăt hlăm abŭ, hlăm atŏ mnga pô dưm hlăm sang wăt hŏng êa doh dưn pô mgơ̆ng hlăm anăn, anăn ăt jing anôk kêč ƀloh mboh mơh.

Klei čiăng mtă hlăm thŭn anei, jing amâo mâo hluăt lŏk snăn amâo mâo ôh klei ruă êngoh bi ƀlĕ êrah. Lehanăn hmei ăt mâo mơh klei čiăng mtă kơ grăp gŏ sang hlăm grăp hrue kăm pioh mâo 10 lŏ bi ksiêm dlăng jih anôk mâo hluăt lŏk hdĭp hlăm gŏ sang pô.

Klei ruă êngoh bi ƀlĕ êrah ăt jing klei ruă huĭ hyưt mơh, ƀiădah ăt dưi gang mkhư̆, tơdah grăp čô drei mâo klei thâo săng răng kriê klei suaih pral pô bi jăk, wăt hŏng ƀuôn sang msĕ mơh. Ksiêm dlăng nanao hlăm dŭm abŭ čŭt mnga mlih êa jêñ jêñ, hwai duiñ leh jih jang mnơ̆ng huĭdah jing mnơ̆ng ênưih mgơ̆ng êa, jing hĕ anôk kơ kêč mboh, anôk hluăt lŏk hdĭp. Mbĭt anăn brei jih jang mnuih pĭt đih hlăm mŭng, yua dŭm hdră bi mdrơ̆ng hŏng klei kêč ƀloh kĕ, lehanăn bi mguôp hŏng anôk bruă mdrao mgŭn hlăm klei bi mdoh wăl hdĭp mda, mdjiê hluăt lŏk, hlăm wăl sang pô, lehanăn hlăm ƀuôn sang./.