Hluê si klei hưn mơ̆ng Anôk bruă ksiêm dlăng klei ruă tưp čar Dak Lak (CDC Dak Lak), truh kơ ară anei, kluôm čar čih yap 8.433 čô djŏ klei ruă êngoh bi ƀlĕ êrah, đĭ 25% mkă hŏng wưng anei thŭn dih. Knŏng dŭm hruê giăm anei, grăp hruê čih yap êbeh 100 čô. Mâo leh 2 čô djiê ti ƀuôn hgŭm Tân An leh anăn să Quảng Phú. Dŭm alŭ wăl mâo klei hŭi hyưt djŏ lu leh anăn lu mnuih ruă, mâo ƀuôn hgŭm Ƀuôn Ama Thuôt, Tân Lập, Tân An, Ea Kao leh anăn dŭm să Ea Hleo, Hòa Phú, Tân Tiến, Krông Pač, Ea Tul, Čư̆ Mgar. Ƀuôn hgŭm Thành Nhất leh anăn dŭm să Ea Knuếch, Pơng Drang, Ea Drông, Ea Na, Ea Drăng jing êpul mâo klei hŭi hyưt lu.

Ênoh mnuih ruă đĭ pral hlăm dŭm hruê giăm anei dưi brei thâo djŏ tuôm hŏng adiê hjan sui, găl kơ kêč ƀloh đĭ lar leh anăn ba mtưp klei ruă. Hlăk êjai anăn, hdră gang mkhư̆ klei ruă ti dŭm anôk ka tŭ dưn, mnuih ƀuôn sang dôk ngă ngơi mang.

Aê mdrao Hoàng Hải Phúc, Khua anôk bruă ksiêm dlăng klei ruă tưp Dak Lak brei thâo, ênoh mnuih ruă đĭ lu ngă kơ Adŭ dŏng mdrao mjêč phung hđeh leh anăn hđeh mrâo kkiêng, Sang êa drao prŏng krĭng Lăn Dap Kngư kreh êgao hnơ̆ng; lu anôk bruă mdrao mgŭn knŭk kna leh anăn êngao knŭk kna ti krĭng Yŭ čar Dak Lak ăt tŭ klei kpĭ msĕ. CDC Dak Lak dôk mjêč pŏk ngă dŭm hdră msir bi hrŏ ênoh mnuih ruă mrâo, ksiêm dlăng anôk bluh mâo klei ruă, amâo brei klei ruă tưp lar.

“Anôk bruă ksiêm dlăng klei ruă tưp čar Dak Lak đru kčĕ kơ Knơ̆ng bruă mdrao mgŭn, Knơ̆ng bruă sang čư̆ êa čar Dak Lak mtrŭn hră mơar gĭt gai Knơ̆ng bruă sang čư̆ êa dŭm să, ƀuôn hgŭm brei mđĭ ktang bruă gang mkhư̆ klei ruă tưp čŏng pô hŏng hdră pŏk ngă dŭm gưl bi mdoh wăl hdĭp mda; hŏng mnuih ƀuôn sang brei čŏng răng mgang pô jing phŭn. Bi hŏng bruă mdrao mgŭn, hmei tiŏ nao knuă druh truh kơ dŭm krĭng mâo klei ruă ksiêm dlăng, tĭng dlăng hnơ̆ng véc-tơ, hnơ̆ng hluăt lŏk čiăng bi kna kdrăp mnơ̆ng, masin, ba yua krih êa drao hŏng êdeh êdâo čiăng mdjiê kêč ƀloh, hluăt lŏk”.

Hluê si Anôk bruă ksiêm dlăng klei ruă tưp, mơ̆ng akŏ thŭn truh kơ ară anei, kluôm čar Gia Lai čih yap êbeh 7.600 čô ruă êngoh bi ƀlĕ êrah leh anăn 1 čô djiê. Mkă hŏng wưng anei thŭn 2025, ênoh mnuih ruă đĭ 5.059 čô. Kluôm čar čih yap 393 anôk mâo klei ruă, đĭ 28 anôk mâo klei ruă mkă hŏng wưng anei thŭn 2025. Anôk bruă mdrao mgŭn mtă gang mkhư̆ klei ruă êngoh bi ƀlĕ êrah jing bruă brei ngă nanao, mđrăm mbĭt, boh nik hlăm yan hjan, wưng găl kơ kêč ba mtưp klei ruă đĭ lêč. Klei bi hgŭm kjăp plah wah anôk bruă mdrao mgŭn, bruă sang čư̆ êa alŭ wăl leh anăn mnuih ƀuôn sang, boh nik jing bruă msir mghaih jih dŭm anôk mâo hluăt lŏk ti gŏ sang srăng đru ksiêm dlăng hluăt lŏk, mkhư̆ ênoh mnuih ruă leh anăn klei huĭ tưp lar, mơ̆ng anăn răng mgang klei suaih pral êpul êya.