Mơ̆ng thŭn 2022 truh kơ ară anei, kluôm ala čar čih yap êbeh 90.000 čô mâo asâo, miêu kĕ, kuač, hlăm anăn 365 čô djiê. Ênoh prăk tlŏ mgang leh anăn mdrao mnuih mâo asâo, miêo kĕ truh giăm 1.000 êklai prăk. Knŏng ti Dak Lak, wưng anei mâo dŭm êtuh čô mâo asâo, miêu kĕ, hlăm anăn mâo 7 čô djiê.

Ti anôk bi kƀĭn, phung bi ala bi mklă, adôk lu klei dleh dlan hlăm bruă kriê dlăng êpul asâo, miêu, tlŏ vaccine leh anăn ksiêm dlăng, msir mgaih klei đing mâo klei ruă. Lu klei blŭ lač bruă gang mkhư̆ klei ruă Khŏ ka mâo klei uêñ mĭn djŏ hnơ̆ng; bruă kriê dlăng êpul mnơ̆ng rông lu blư̆ adôk êdu kƀah.

Wưng thŭn 2026-2030, phung bi ala bi tŭ ư brei mđĭ hĭn bruă hâo hưn, mđĭ klei thâo săng mnuih ƀuôn sang, boh nik mghaih msir djŏ hdră tơdah tuôm hŏng klei asâo, miêu kĕ, kuač leh anăn nao ti anôk bruă mdrao mgŭn čiăng dưi đru kčĕ, tlŏ vaccine hnưm. Bruă gang mkhư̆ klei ruă Khŏ kyua klei asâo, miêu kĕ,  brei dưi pŏk ngă nanao, hŏng klei bi hgŭm kjăp plah wah bruă mdrao mgŭn, bruă mdrao mnơ̆ng rông, bruă sang čư̆ êa leh anăn êpul êya, mđing truh kơ mta kñăm amâo lŏ mâo mnuih djiê kyua klei ruă Khŏ hlăm thŭn 2030. Võ Hải Sơn, K'iăng khua anôk bruă gang mkhư̆ klei ruă (Phŭn bruă mdrao mgŭn), mtă.

“Hmei mtă kơ êpul êya brei thâo, tơdah phung amâo myun tuôm hŏng asâo, miêu kĕ snăn brei nao mtam ti anôk bruă mdrao mgŭn čiăng dưi ksiêm mkă dlăng, tlŏ huyết thanh gang mkhư̆ klei ruă. Hŏng dŭm gŏ sang mâo mnơ̆ng rông, brei tlŏ mgang kơ êpul asâo, miêu pô. Hŏng dŭm alŭ wăl, brei mđĭ hdră ktuê dlăng hnơ̆ng tlŏ mgang vaccine kơ êpul asâo, miêu; mbĭt anăn rơ̆ng nanao klei mâo mơ̆ng vaccine, huyết thanh čiăng tơdah mnuih ƀuôn sang čiăng snăn mprăp tlŏ mgang, gang mkhư̆ klei ruă khŏ kơ mnuih ƀuôn sang.”

          Dak Lak ăt mkŏ mjing leh Knăm mtrŭt mjhar leh anăn klei bi lông lu dhar bruă gang mkhư̆ klei ruă Khŏ gưl ala čar thŭn 2026. Hdră mâo klei nao hgŭm mơ̆ng êbeh 1.000 čô nao hgŭm, hŏng dŭm bruă mtrŭt mjhar, klei bi lông hâo hưn leh anăn klei bi lông klă sĭt kơ bruă ksiêm dlăng, tlŏ vaccine kơ asâo, miêu leh anăn msir mghaih anôk mâo klei ruă.

Klei năng mđing jing klei ruă Asâo miêo khŏ kĕ msĕ si amâo dưi dŏng mdrao ôh leh mâo klei ruă, ƀiădah dưi gang mkhư̆ tơdah mnuih djŏ asâo miêo khŏ kĕ dưi msir mghaih anôk êka djŏ hdră leh anăn tlŏ vaccine, huyết thanh hnưm. Ƀiădah, bruă kriê dlăng êpul asâo miêo leh anăn tlŏ mgang ti alŭ wăl Dak Lak ăt adôk lu klei êdu kƀah. Truh mlan 7 thŭn anei, hnơ̆ng tlŏ vaccine Asâo miêo khŏ kơ êpul asâo miêo mơ̆ng čar mrâo mâo 28.3%, ƀiă hĭn hnơ̆ng čiăng mkŏ mjing ai kdơ̆ng hŏng klei ruă hlăm êpul êya. Hlăk êjai anăn, kman klei ruă Asâo miêo khŏ ăt dôk mâo hlăm lu anôk leh anăn lu anôk mâo klei ruă hlăm mnơ̆ng rông lŏ dơ̆ng dưi hmao ƀuh.

Gang mkhư̆ klei ruă khŏ mơ̆ng asâo, miêo kĕ, brei mphŭn mơ̆ng dŭm bruă klă klơ̆ng: grăp gŏ sang kiă kriê jăk asâo, miêu rông leh anăn tlŏ vaccine djăp ênŭm; amâo phưi tha mnơ̆ng rông; tơdah asâo, miêu kĕ, kuač brei msir mgaih anôk êka djŏ hdră leh anăn nao mtam ti anôk bruă mdrao mgŭn čiăng dưi đru kčĕ, tlŏ mgang. Tơdah grăp čô mnuih ƀuôn sang čŏng pô sa knhuang, bruă sang čư̆ êa alŭ wăl čŏng pô sa knhuang leh anăn dŭm dhar bruă bi hgŭm kjăp hĭn, mta kñăm amâo lŏ mâo mnuih djiê kyua klei ruă Asâo khŏ kĕ hlăm thŭn 2030 mrâo dưi giăm hĭn truh kơ boh sĭt./.