Hră ênua mdrao mgŭn jing hdră ênua mơ̆ng Đảng leh anăn Knŭk kna, kyua klei tŭ dưn kơ mnuih mă bruă leh anăn Mnuih ƀuôn sang, mâo Knŭk kna răng mgang, mơ̆ng anôk bruă Hră ênua yang ƀuôn hluê ngă.

Êpul čŏng blei Hră ênua mdrao mgŭn mâo:

Mnuih hlăm gŏ êsei nao hgŭm hră ênua mdrao mgŭn hluê hdră gŏ êsei;

Mnuih hdĭp leh anăn mă bruă, mnuih dưi rông ba, kriê dlăng hlăm dŭm êpul êya, anôk bruă đru ba, klei đăo;

Mnuih mă bruă hlăm wưng mdei amâo tĭng prăk mlan amâodah mdei êjai klei kuôl kă mă bruă;

Hlăm anăn, gŏ sang nao hgŭm hră ênua mdrao mgŭn jing dŭm čô mnuih bi čih anăn dôk hdĭp amâo dah dôk jưh ti sa anôk hluê si klei kčah mtrŭn mơ̆ng hdră bhiăn dôk jưh.

Ênoh tla hră ênua mdrao mgŭn gŏ sang kơ dŭm čô mnuih msĕ si: mnuih tal sa tla hŏng 4.5% ênoh prăk mlan; mnuih tal dua, tal tlâo, tal pă tla 70%, 60%, 50% ênoh tla mơ̆ng mnuih tal sa; mơ̆ng mnuih tal êma kơ dlông tla hŏng 40% ênoh tla mơ̆ng mnuih tal sa.

Boh nik gŏ sang giăm ƀun dưi đru 100% ênoh tla hră ênua mdrao mgŭn, hlăm anăn: ngăn prăk gưl dlông đru 70%, ngăn prăk čar Dak Lak đru 30%;

Gŏ êsei ngă bruă lŏ hma, dliê kmrơ̆ng, kan hdang mâo hnư hrui wĭt kah knar dưi đru 60%, hlăm anăn: ngăn prăk gưl dlông đru 30%, ngăn prăk čar Dak Lak đru 30%.

Mnuih djuê ƀiă dôk hdĭp mda ti dŭm să dưi bi mklă amâo lŏ dôk hlăm krĭng mâo klei găl bruă duh mkra - ala ƀuôn dleh dlan, boh nik dleh dlan hluê si klei kčah mtrŭn mơ̆ng Knŭk kna dưi đru 85%, hlăm anăn: prăk knŭk kna gưl dlông đru 70%, prăk knŭk kna čar Dak Lak đru 15% (wưng đru jing 36 mlan yap mơ̆ng wưng să anôk pô dôk hdĭp mda amâo lŏ dôk hlăm krĭng mâo klei găl bruă duh mkra - ala ƀuôn dleh dlan, boh nik dleh dlan hluê si klei kčah mtrŭn mơ̆ng Knŭk kna).

Êpul êya nao hgŭm răng mgang klei êđăp ênang ti nah gŭ hluê si klei kčah mtrŭn mơ̆ng Êpul gơ̆ng bruă ƀuôn sang čar Dak Lak dưi đru 60% ênoh tla hră ênua mdrao mgŭn hluê si klei kčah mtrŭn.

-Hluê ngă hră ênua mdrao mgŭn gŏ sang, ih srăng dưi dưn dŭm klei tŭ dưn snei:

Dưi bi hrŏ ênoh tla kơ mnuih hlăm gŏ êsei nao hgŭm hlăm hră ênua mdrao mgŭn.

Dưi mkăp hră ênua bruă mdrao mgŭn điện tử.

Mâo tĭng tla prăk mkă dlăng klei ruă, mdrao klei ruă hlăm klei dưi leh anăn hnơ̆ng dưi tĭng tla hlăm hră ênua mdrao mgŭn.

Dưi ruah leh anăn bi mlih anôk čih anăn mkă dlăng mdrao mgŭn tal êlâo hlăm 15 hruê akŏ grăp gưl.

Mâo anôk bruă Hră ênua yang ƀuôn, anôk bruă ksiêm mkă dlăng mdrao mgŭn Hră ênua mdrao mgŭn leh anăn anôk bruă djŏ tuôm mblang, mkăp klei hâo hưn kơ hdră Hră ênua mdrao mgŭn.

Dưi hưn mthâo, kčŭt hưn klei ngă soh hŏng hdră bhiăn kơ hră ênua mdrao mgŭn.

-Hluê ngă hră ênua mdrao mgŭn gŏ sang čiăng răng mgang klei suaih pral kơ dŭm čô hlăm gŏ sang.