Ti anăp klei huĭ hyưt klei ruă khŏ lŏ dơ̆ng bluh mâo, Knơ̆ng bruă mdrao mgŭn čar Lâm Đồng mtă kơ Anôk bruă ksiêm dlăng klei ruă tưp čar mđĭ hdră ksiêm dlăng, pral hmao ƀuh dŭm klei amâo jăk djŏ tuôm kơ klei ruă khŏ, boh nik asâo, miêu đing djŏ klei ruă; asâo kĕ lu mnuih; mnơ̆ng rông ruă, djiê amâo thâo phŭn agha leh anăn mnuih mâo asâo, miêô kĕ, kuač huĭ srăng tưp klei ruă.

Dŭm anôk bruă mdrao mgŭn dưi mtă bi hgŭm kjăp hŏng anôk bruă mdrao mgŭn mnơ̆ng rông leh anăn bruă sang čư̆ êa alŭ wăl ksiêm dlăng, bi mklă dŭm klei đing mâo klei ruă khŏ hlăm mnơ̆ng rông; mbĭt anăn mtrŭt mđĭ hdră mtô mblang ti êpul êya, sang hră leh anăn dŭm alŭ wăl huĭ hyưt. Knơ̆ng bruă mdrao mgŭn Lâm Đồng mtă, tơdah tuôm hŏng klei asâo, miêô kĕ amâodah kuač, mnuih ƀuôn sang brei pral rao bi doh anôk êka hŏng kƀu leh anăn êa doh, leh kơ anăn nao ti anôk bruă mdrao mgŭn čiăng mâo klei ktrâo lač, msir mgaih leh anăn tlŏ vaccine gang mkhư̆ klei ruă khŏ hŏng klei pral.