Knăm mơak boh durian Dak Lak thŭn 2026 srăng mkŏ mjing mơ̆ng hruê 15/8 truh 2/9, hŏng hlăm brô 1.000 čô bi ala dŭm čar, ƀuôn prŏng, dŭm phŭn, dhar bruă Gưl dlông leh anăn êbeh 400 čô bi ala ala tač êngao. Mbĭt hŏng dŭm êpul phung tuê, Knăm mơak mĭn tĭng iêo jak 25.000 - 30.000 čô tuê hlăm ala čar leh anăn ala tač êngao.

Kñăm rơ̆ng klei doh êƀăt mnơ̆ng ƀơ̆ng ti knăm mơak, Anôk bruă mdrao mgŭn Dak Lak mkŏ mjing leh hdră kčah, pŏk ngă truh kơ dŭm alŭ wăl anôk mkŏ mjing knăm mơak; mbĭt anăn ksiêm dlăng kluôm dŭm anôk dôk jưh, sang huă mnăm, sang jưh kơ klei găl ngă bruă, gang mkhư̆ klei pui ƀơ̆ng leh anăn klei doh êƀăt mnơ̆ng ƀơ̆ng. Knơ̆ng bruă mdrao mgŭn ăt mtrŭt mđĭ hdră mtô mblang, mtă kơ mnuih ƀuôn sang, mnuih pla boh durian leh anăn dŭm anôk bruă mnia blei krơ̆ng kjăp, êrô hiu hluê ngă kjăp dŭm klei kčah mtrŭn kơ klei doh êƀăt mnơ̆ng ƀơ̆ng êlâo, hlăm leh anăn êdei kơ knăm mơak. Trần Quang Hưng, K’iăng Khua Anôk bruă răng mgang klei doh ê ƀăt mnơ̆ng ƀơ̆ng, Knơ̆ng bruă mdrao mgŭn čar Dak Lak, brei thâo:

“Knơ̆ng bruă mdrao mgŭn čar Dak Lak mkŏ mjing leh 2 êpul ksiêm dlăng. Sa êpul ksiêm dlăng dŭm anôk bruă mnia blei mnơ̆ng ƀơ̆ng huă mkăp kơ tue hiu čhưn ênguê hlăm wưng knăm mơak; êpul adôk ksiêm dlăng dŭm anôk bruă sang jưh, sang huă mnăm, ktrâo lač hluê ngă dŭm klei ngă yang mơ̆ng Knơ̆ng bruă sang čư̆ êa čar mkŏ mjing, mkăp kơ phung bi ala. Mbĭt anăn, dŭm êpul mơ̆ng Knơ̆ng bruă mdrao mgŭn ăt ksiêm dlăng dŭm klei bi lông mkra mnơ̆ng ƀơ̆ng, dŭm anôk rang mdah mnơ̆ng dhơ̆ng kñăm rơ̆ng klei doh ê ƀăt mnơ̆ng ƀơ̆ng huă.”