Dŭm ƀăng kphê mrâo klei ti ping kbuôn čư̆ mơ̆ng gŏ sang A Đuý, ti alŭ Ngọc Leng, mrâo anei dưi pla leh dŭm phŭn kphê mjeh. Pô dŭ ana kphê, pô pla kphê, pô mbŭ lăn leh anăn krih êa. knŏng hlăm dŭm mmông, đang pla mjing êlâo dih knŏng pla hƀei ƀlang ară anei mâo leh klei mtah mrâo.

Giăm 9 sào lăn mơ̆ng gŏ sang lu thŭn knŏng pla ana hbei ƀlang, hnư hrui wĭt amâo mâo hơĭt. Čiăng mlih pla ana kphê ƀiădah prăk blei mjeh leh anăn mưn phunug mă bruă jing lu êdi. A Đúy lač, gưl anei, ana mjeh dưi brei amâo mâo mă prăk, bruă pla kphê ăt mâo phung knuă druh leh anăn êpul êya alŭ wăl hriê đru, brei kơ gŏ sang mâo thiăm boh kdrŭt čiăng ngă hdră duh ƀơ̆ng mrâo.

“Bruă dưi mâo ana mjeh đru kơ gŏ sang bi hrŏ ênoh bi liê leh anăn mâo klei găl pŏk phai ênhă pla mjing. Gŏ sang kâo hmăng hmưi ana kphê srăng čăt đĭ jăk, ba wĭt hnư prăk hơĭt kơ gŏ sang”.

Amâo djŏ knŏng gŏ sang A Đúy, dŭm pluh gŏ sang jing gŏ sang phung khua thŭn, phung êwiên êwu, phung dôk hjăn păn ti Tu Mơ Rông ăt dưi mâo klei đru hlăm gưl ngă bruă tal êlâo. nah tluôn êbeh 1 êklăk phŭn mjeh jing hdră ngă bruă mdê hĭn.

Hrô kơ ba yua ênoh prăk blei mnga hơêč hmưi hdră bruă, să mtrŭt mjhar gru hmô Klei kƀĭn amâo mâo mnga, mtrŭt mjhar ai dưi mơ̆ng yang ƀuôn čiăng blkei asăr mjeh, ngă klei mjut mjing leh anăn kriê dlăng đlang pla mjing, mbha amâo mâo mă prăk kơ mnuih ƀuôn sang. Dŭm čăp mnga hơêč hmưi dưi hrô hŏng dŭm phŭn kphê điêt, ba mbĭt klei hmăng hmưi kơ sa hdră duh ƀơ̆ng hơĭt kjăp kơ mnuih ƀuôn sang krĭng čư̆ čhiăng.

Hlăm mlan 7 anei, să Tu Mơ Rông gĭt bi leh bruă mbha leh anăn đru kơ mnuih ƀuôn sang pla êbeh 1 êklăk phŭn kphê hlăm ênhă hlăm brô 200ha. Mta kñăm amâo djŏ knŏng jing mđĭ ênhă ana pla mjing ƀiădah lŏ mkŏ mjing krĭng pla mjing bi kƀĭn, mkŏ mjing tur knơ̆ng čiăng mđĭ kyar kphê hluê êlan mđĭ ênoh.

Võ Trung Mạnh, Khua dlăng bruă Đảng să Tu Mơ Rông brei thâo, êbeh 1 êklăk phŭn kphê dưi pla hlăm yan hjan anei jing klei mphŭn kčưm. Wưng thŭn 2026 - 2030, alŭ wăl mdưm mta kñăm đru kơ mnuih ƀuôn sang pla mrâo 1000ha kphê, gĭr truh thŭn 2030, kluôm ênhă kphê hlăm să mâo hlăm brô 1588 ha, mđing  truh mta kñăm grăp gŏ sang mâo ƀiă êdi 1ha kphê čiăng mđĭ kyar klei hdĭp mda gŏ sang. Čiăng dưi ngă mta kñăm anei, să Tu Mơ Rông lŏ dơ̆ng rơ̆ng kơ hdră mkăp brei ana mjeh amâo mâo mă prăk, duh bi liê kơ knơ̆ng kdơ̆ng êa, mtô hdră mnêč pla mjing, bi mguôp hŏng knơ̆ng bruă ba čhĭ mnơ̆ng dhơ̆ng leh anăn iêo jak duh bi liê mkra mjing êlam. Kbưi hĭn jing mkŏ mjing krĭng pla mjing mâo ênoh čuăn VIetgap, ƀrư̆ ƀrư̆ mkŏ mjing anăn kpăk kphê jăk Tu Mơ Rông.

Võ Trung Mạnh lŏ brei thâo: Tơdah dưi kriê dlăng jăk leh anăn mâo anôk ba čhĭ hơĭt, êbeh 1 êklăk phŭn kphê amâo djŏ knŏng luôm mtah kbuôn čư̆ ƀiădah lŏ pŏk klei găl bi mlih hdră duh ƀơ̆ng kơ dŭm êbâo gŏ sang mnuih Sêdang, ƀrư̆ ƀrư̆ ba kphê jing ana pla mjing phŭn ti krĭng lăn anei:

“Bruă Đảng să Tu Mơ Rông mkŏ mjing leh hdră êlan mkŏ mjing kphê jăk Tu Mơ Rông. Hluê anăn, hmei srăng mtô kơ mnuih ƀuôn sang pla, kriê dlăng, rơ̆ng djŏ ênoh čuăn Vietgap, mkŏ mjing mrô krĭng pla mjing, mbĭt anăn blŭ hrăm hŏng dŭm knơ̆ng bruă, êpul hgŭm bruă čiăng bi mguôp hŏng mnuih ƀuôn sang, mkŏ mjing mta mnơ̆ng jăk yâo mơ̆ng să Tu Mơ Rông, rơ̆ng kơ anăn knăl kphê Tu Mơ Rông srăng truh ti anôk mnia mblei hŏng klei kjăp hĭn”.