Ti ƀuôn hgŭm Tà Hine, alŭ wăl mĭn srăng dăp mơ̆ng 24 boh alŭ ƀuôn trŭn adôk 12 alŭ ƀuôn. Tui si hdră, 3 boh ƀuôn Đà Thành, Đà Phước lehanăn Đà An srăng bi mŭt mbĭt jing ƀuôn Đà An. Leh klei bi mŭt mbĭt ƀuôn mrâo mâo 775 gŏ sang hŏng êbeh 3.300 čô mnuih, jing sa boh ƀuôn prŏng hĭn hlăm ƀuôn hgŭm. Hồ Đấu, Khua bruă Đảng ƀuôn Đà Phước, ƀuôn hgŭm Tà Hine, čar Lâm Đồng brei thâo:

"Klei dăp wĭt kñăm čiăng bi khuăt hĭn lehanăn mă bruă mâo klei tŭ dưn hĭn, snăn asei mlei kâo ƀuh tŭ ư hŏng klei anei. Kâo mtrŭt mnuih ƀuôn sang, mđĭ ai jih jang găp djuê hlue ngă jăk hdră êlan mơ̆ng knŭk kna kơ bruă bi mŭt mbĭt ƀuôn sang.”

Mbĭt hŏng Tà Hine, ƀuôn hgŭm Bảo Lâm 1 ăt dôk ngă klei bi mŭt mbĭt hlue hŏng hdră êlan bi khuăt, tŭ jing. Leh klei dăp wĭt, alŭ wăl srăng bi hrŏ 19 anôk kiă kriê nah gŭ lehanăn bi hrŏ truh 57 mnuih mă bruă jing phung amâo mâo truăn kơ bruă, đru bi hrŏ ngăn prăk bi liê, mđĭ hĭn klei tŭ dưn bruă kđĭ car hlăm alŭ wăl mnuih ƀuôn sang dôk.

Tui si Nguyễn Đức Thanh, K’iăng khua knơ̆ng bruă sang čư̆ êa ƀuôn hgŭm   Bảo Lâm 1, klei mkŏ mjing hdră bi mŭt mbĭt hlăm ƀuôn sang, dưi ngă hlue hŏng klei ksiêm dlăng bi nik kơ ênoh mnuih, kơ ênhă, kơ anôk, kơ kdriêl anôk, kơ hƀuê ênuk, lehanăn kơ dhar kreh, kñăm mjing klei bi sa hnơ̆ng jăk hĭn hlăm mnuih ƀuôn sang:

 "Hmei mđĭng kơ klei ênoh mnuih, kơ ênhă, kơ anôk lehanăn kơ kdriêk anôk, kơ hƀuê ênuk lehanăn kơ dhar kreh pioh kơ klei bi mŭt mbĭt.čiăng si srăng ngă mâo klei sa ai hlăm mnuih ƀuôn sang hŏng bruă bi mŭt mbĭt, pioh mđĭ kyar klei hdĭp mda ala ƀuôn ti alŭ wăl.”

Tui si klei ksiêm dlăng mơ̆ng čar Lâm Đồng, ară anei hlăm kluôm čar mâo 2.773 boh alŭ ƀuôn. Hlue ngă klei kiă kriê mơ̆ng bruă Đảng čar, dŭmm alŭ wăl hlăk dôk bi leh hdră čiăng bi hrŏ mơ̆ng 50% ênoh alŭ ƀuôn lkơ dlông leh klei bi mŭt mbĭt. Dơ̆ng mơ̆ng klei sa ai mơ̆ng mnuih ƀuôn sang, lehanăn klei kut kat mơ̆ng bruă sang čư̆ êa, bruă bi mŭt mbĭt dŭm boh alŭ ƀuôn hlăk mjing leh knhuang kjăp hĭn hlăm klei kiă kriê mnuih ƀuôn sang, dưi mă bruă kơ mnuih ƀuôn sang bi jăk hĭn, djŏ hlăm klei čiăng mđĭ kyar hlăm wưng ênuk mrâo./.