VOV4.K’ho- Biăp kơmƀùh kơl tau prìt gơm bal mờ bơl hông mờ băng sràt là dùl tàm ală phan sa cèng bềng phan sa bơh yau bơh kòn cau M’nông dê. Pơgồp bal mờ ală phan tĕ gơlơh bè ờ gơ hờp mơya ală cau M’nông den trŭ gơm gơs dùl phan sa ƀô thồm, bơkah mờ pràn să jan ngan...

Tŭ do, tàm rài kis bơh mpồl bơtiàn kòn cau M’nông dê kung gam prap sơl bơta mờng kuèng, bơta kờñ gơm phan sa bal mờ kơmƀùh. Ngan là kơmƀùh chu bơh ală kơltàu prìt dum ìs rañ.

                     Kơmƀùh kơltau prìt là dùl tàm ală phan tĕ khà tàm tuư trŭ gơm krơi is ngan bơh kòn cau M’nông dê

Bơdìh mờ kơltau prìt, phan sa do ờ gơtùi ờ geh 2 phan gơm bal hơ̆ là plai bơl hong mờ ƀăng sràt geh gơm bal mờ poăc ntìng. Bơl hong pal sac rơwah ală plai lir halà plai mờr dum. Bơl hông geh sil kơltau, koh lơhơ di sa, rào kloh ai gơ in jơh dà ntă. Ƀăng sràt kòn cau M’nông dê sùm geh tram jŏ ngan, tài bơh sràt uă. Den tàng, tŭ gơm phan sa do, băng pal geh păt jơh dà nàng gơ in ờ hoan sràt. Kòn cau M’nông ai kơmƀùh klài bal mờ dà, tơnơ̆ hơ̆ jồr bơh dùl nơm ƀiài halà ală phan ngui jồr lơh is ndai nàng ờ hoan geh lŭ liang bơh kơmƀùh dê. Bơnah dà kơmƀùh neh jồr sùm gơ mờr lơh bè dà rơmĭt bơrkuh halà dà bơrkuh jat khà kơmƀùh klài bal tàm dà bơh sơnrờp.

                     Phan sa kơmƀùh kơltau prìt gơm bal mờ bơl hong mờ ƀăng sràt bơh kòn cau M’nông dê

Kòn cau M’nông đơs là, dà kơmƀùh kơltau prìt gam dong ală phan tĕ ndai tàm phan sa mhar sin lề, lề rlau mờ lồi dŭt là tĕ wơl phan tĕ. Lài do, cau M’nông sùm ngui uă kơmƀùh nàng jồr gơs dà geh bơta hăng ngan nàng gơm ala boh. Tŭ do, kòn cau M’nông bơdìh mờ ngui kơmƀùh lơh geh bơta hăng krơi is ngan ai phan sa in den gam tĕ tai bàr pe phan tĕ ndai bè boh, ƀòk ngòk, hạt nêm. Gơwèt mờ phan sa biăp kơmƀùh kơltau prìt gơm bal mờ bơl hong mờ ƀăng sràt, cau M’nông gam ƀŏ mrĕ nàng tĕ tai. Dùl ết boh, ƀòk ngòk bal mờ mrĕ brê ƀŏ lề den tĕ tàm glah biăp. Sùm den cau M’nông geh ngui uă ngan mrĕ tàm phan sa do.

Gơwèt mờ kòn cau M’nông, phan sa do pal geh bơta ƀô thồm, bơkah, mờ pal kơ̆t di mơ hơ̆ sồng bơkah. Poăc ntìng geh riă jŏ lơh geh bơta lơngồt bal mờ bơta hòi, sràt mờ hăng mơya ờ gơs hăng ir. Phan sa do geh trŭ gơm bơh kơmƀùh kơltau prìt rañ là phan sa bơkah, ƀô thồm, pràn să jan bơh yau bơh kòn cau M’nông tàm ù tiah càr Dak Nông dê.

K’ Brọp ai bơh báo Dak Nông- Cau mblàng K’ Hạnh