VOV4.K’ho- Biăp mơl tàm ding gle là phan sa kờñ ngan bơh kòn cau cau M’nông dê.  Gơwèt mờ kòn cau M’nông, phan sa do là phan sa bơkah, krơi is ngan, geh uă bơta ƀô thồm, bơkah mờ tơngŏ bơhiàn niam chài phan sa bơh kòn cau Tây Nguyên dê đơs bal mờ kòn cau M’nông dê đơs is. Biăp mơl tàm ding gle ờ mìng là phan sa pah ngai lơm mờ gam geh kòn cau M’nông ngui nàng wă rò năc kuơ màng tàm ală dơ̆ lơh chờ ờs mờng bơh ƀòn lơgar dê.

Tài bơh phan sa geh mat sơnđan là biăp mơl tàm ding gle là tài bơh phan trŭ gơm geh mơl jơh tàm ding gle nàng gơm sin. Phan gơm biăp mơl tàm ding gle tàm hơ̆ geh: biăp nse, blơn bơtang, gòl, ka dà croh mờ poăc phan poan jơng. Ndrờm là bơh phan gơm bơh yau lơm, neh geh lài tàm brê bơnơm mơya tŭ gơm tàm bơrlŭ bal gơ gơs là phan sa bơkah ngan mờ pràn să jan ngan. Biăp nse nàng gơm biăp mơl tàm ding là biăp nse bơnung, biăp nse goh ngan, ờ duh pal rào tàm dà tai mờ geh gơm tơn hơ̆ sồng lời wơl bơta bơkah krơi is gơ dê. Gòl tơnơ̆ tŭ ai bơh tàm brê dờng rê geh rào goh, klồ sang kơmhò lò lơŭt gùt dar bơdìh, mìng lời wơl gòl kò tàm dơlam gơ dê lơm. Gòl kò do cèng gơm dimơ den hơ̆ sồng koh dềt di mơ.

Ală phan gơm tơnơ̆ tŭ geh rào goh mờ geh mơl tàm ding gle

Krơi mờ blơn bơtang brê geh plai dờng mờ geh bơta bơtang mờ kòn cau M’nông, Rơđê ngui nàng gơm biăp blơn bơtang mờ ka rì, blơn bơtang dềt nàng gơm biăp mơl tàm ding gle geh bơta lơngồt. Blơn bơtang do geh tam uă ngan tàm suơn hìu bơh kòn cau M’nông dê.

Phan gơm ờ gơtùi ờ geh tàm biăp mơl tàm ding gle do dê hơ̆ là poăc ka mờ poăc. Ka dà croh rào goh, buh tàm bơnhă ồs rơnga nàng lơh roh ƀà bô ngir. Tŭ gơm, cau tĕ bal ka tàm ding mờ ờ duh pal tă lò. Poăc digơlan là poăc sur, poăc iar, poăc phan brê... jat bơta kờñ sa bơh tơl hìu bơnhă dê.

Gơm biăp mơl tàm ding di pal ngan ờ di ngui glah mờ pal ngui ding gle nàng buh tàm bơnhă ồs. Ding gle geh sac rơwah nền non ngan, ờ di bơnung ir mờ kung ờ di kràñ ir sơl. Bơta jòng di pal dùl làih tê là di. Cau gơm ngui pềs hơr nàng tơnbluh tàm bơr ding lơh mbè lơi dà tàm ding ờ gơlik bơdìh tàm tŭ gơm. Broă mơl ală phan tàm ding gle kung pal lơh kơrhia ngan.

Biăp mơl tàm ding gle bơkah, krơi is geh gơm tàm ding gle bơh kòn cau M’nông dê

Ding gle geh buh tàm bơnhă ồs rơnga. Tŭ buh pal ai ồs in hơng di pal, ban ai ồs hơng ir. Ding gle geh sơlơ̆ hời rơ hời, sơlơ̆ sùm nàng ală phan tàm dơlam ding in sin bal, ding gle kung ờ gơbàn ồs sa sơl. Tàm tŭ buh, ding gle gơlik dà tàm bơrlŭ bal mờ ală phan tàm dơlam ding, lơh geh ală bơta ƀô thồm bơkah, krơi is ngan mờ mìng geh biăp mơl tàm ding gle hơ̆ sồng geh.

Kòn cau M’nông ngui dùl nơm gle neh kồih lài, bŏ biăp tàm ding gle lơh mbè lơi nàng ală phan tàm dơlam ding in lề jơh mờ gơ tàm bơrlŭ bal. Digơlan tài bè hơ̆ mờ phan sa do hơ̆ sồng geh sơnđan là biăp mơl tàm ding. Phan sa buh tàm bơnhă ồs pơgap 30 phuk, tĕ ală phan tĕ bè boh, mrĕ, tĕ tai dùl ết nha ƀô là neh geh dùl phan sa ƀô thồm, bơkah mờ pràn kơl dang să jan.

Biăp mơl tàm ding gle niam ngan ai pràn kơl dang să jan ai ală cau mè pa deh, cau kra ờ sô, ờ pràn mờ kơnòm dềt rơgai in. Biăp mơl tàm ding gle ờ mìng là phan sa pah ngai lơm gời mờ gam là phan sa ngui nàng wă năc kuơ màng tàm ală dơ̆ lơh chờ ờs mờng bơh kòn cau M’nông dê.

K’Brọp jat băo VOV- Cau mblàng K’ Hạnh