VOV4.K’ho - Bulah gơtìp uă kal ke tài bơh trồ prang dờng soat dà, dà ko\ dà cò, kòp tu sa aniai… mơya nam do gah lơh sa suơn sre càr Daklak kung gam gàr khà bơtàu tơnguh niam, geh 3,7%. Tàm hơ\, broă tam gơl chi tam, tơnguh cồng nha lơh geh, bơta niam tàm broă lơh sa pơnjat tai geh chồl pràn, hời rơ hời bơtàu tơnguh bơta kuơ phan lơh gơs bơh suơn sre càr dê:

Mờ rơndap broă lơh ngan ngồn bè gàr kơ\ bă ù, tam gơl pa tàm broă mut ngui ală gơguh jak khoa học kỹ thuật, ngui ală bơta sơntìl chi tam, phan ròng tàm broă lơh sa tơnguh cồng nha lơh geh phan bơna, nam 2016, phan lơh gơs bơh suơn sre càr Daklak dê bơtàu tơnguh li la ngan, ai go\ loh làng rơndap broă lài bơh dùl gah lơh sa suơn sre kơ\ kơljap gam bơtàu tơnguh bè khà mờ bơta niam. Bơta kuơ lơh sa gùt gah do dê geh 33 rbô 200 tơmàn priă, gơguh 3,7% pơn drờm mờ nam lài. Bơta pal đơs là tàm tu\ bă ù chi tam ờ gơguh uă, mơya kơnờm mut ngui ală gơguh jak khoa học kỹ thuật bal mờ broă mut lơh tam gơl li la sơntìl chi tam den tàng uă cau lơh broă sa càr Daklak neh sơr lèt gan ală bơta lòng bơh trồ tiah ờ niam dê nàng sền gàr broă lơh sa hìu nhă. Mò Phạm Thị Thu Thuỷ, dùl nă cau lơh broă sa tàm xã Hoà Đông, kơnhoàl Krông Pach pà git: “Nam do trồ tiah kal ke ngan, bồ nam den trồ prang dờng soat dà, lồi nam den mìu uă kung lơh aniai uă tus broă lơh sa hìu nhă dê. Kơphe tơnhàu gơmù mờr 1/3, mơya nam do priă tac yòm rlau. Priă lơh geh hìu nhă dê kung gam geh gàr kơ\ tài ròng tai nđờ nơm sur, nđờ nơm be mờ ròng iar tai. Roh bơta do den geh bơta ne bơ tơl. Đơs bal kal ke den uă mơya broă lơh sa hìu nhă kung gam kơ\ kơljap.”

Bal mờ bơta lơh ngan bơh tơl hìu nhă dê, den ală kơnă, ală gah broă lơh, ală tiah neh lơh niam kơnòl he dê tàm broă rơndap lài broă lơh sa, dong kờl ală gùng dà, broă lơh ai gah lơh sa suơn sre in bè dong kờl sơntìl chi tam phan ròng, tàm jàu công nghệ, dong kờl bè priă bơcri nàng làng bol iang nùs lơh sa. Pơn rơ tàm kơnhoàl Cư Mgar, dùl tàm ală kơnhoàl lơh sa suơn sre dờng ngan bơh càr dê, kơnờm tam gơl chi tam dipal, mut ngui mai\ mok tàm broă lơh sa suơn sre ngai sơlơ uă… den tàng bulah gơtìp aniai bơh trồ tiah ờ niam mơta bơtàu tơnguh gah lơh sa suơn sre kơnhoàl dê kung gam gơguh rlau 4% pơn drờm mờ nam lài. Gơtùi geh cồng nha do, ồng Nguyễn Văn Minh, Phó Chủ tịch Ủy ban nhân dân kơnhoàl Cư Mgar pà git: “Ủy ban nhân dân kơnhoàl neh đơng lam ală tiah, ală mpồl lơh broă, ală xã, thị trấn lam sồr, mblàng yal làng bol in tơr gùm tàm broă lơh sa jat rơndap broă hời rơ hời gơ rờm bal mờ tam gơl trồ tiah tu\ do, den tàng tơnơ\ mờ dơ\ trồ prang dờng soat dà lơh aniai nam 2016, kơnhoàl neh đơng lam mờ làng bol neh tam gơl ală chi tam geh cồng nha jơnhua rlau. Do kung là broă lơh pa tam gơl bơhìan lơh sa kơnờm tàm ală chi tam jo\ ngai neh kra halà cồng nha lơh geh ờ uă tàm 1 bă ù lơh sa. Dơ\ 2 là chul chồl làng bol tơnguh khà tam bơrlu\ tàm ală suơn kơphe nàng pơgồp bơnah tơnguh bơta kuơ lơh geh. Tu\ do, tàm kơnhoàl kung bơtàu tơnguh ală bơta chi sa plai bè tờm bơ booth, sầu riêng kung lơh geh cồng nha uă tàm dùl bă ù lơh sa, mờ ală broă lơh hơ\ gam pơnjat tai geh rề ơnàng.”

Sền bal, broă lơh sa suơn sre càr Daklak dê kung gam geh khà 44,8% tàm rơndap broă lơh sa. Kờp jơh khà kòi phe gùt nam geh rlau 1 tơlak 100 rbô tấn, lơh geh broă rơndap lơh ai tơlik. Phan ròng càr dê geh rlau 11 tơlak 400 rbô nơm. Bulah bè hơ\, bơdìh ală cồng nha lơh geh, gah lơh sa suơn sre càr Daklak kung gam uă bơta lòng pal sơr lèt gan bè trồ tiah tam gơl, kòp bơ tờp tàm phan ròng, broă lơh sa kă bro bơh ală mpồl lơh sa dê lơỳai bơtàu tơnguh wơl, khà priă blơi phan ngai sơlơ gơguh kas… Den tàng, tàm rơndap broă bơtàu tơnguh gah lơh sa suơn srê tơngai tus, ồng Nguyễn Hoài Dương, kuang atbồ Sở nông nghiệp mờ phát triển nông thôn càr Daklak pà git: “Nam 2017, ală broă lơh, ală kơnòl broă ndrờm wèt tus ală tơngume tàm rơndap tap sèng wơl gah lơh sa suơn sre. Kuơ màng là bơta ngui sơntìl pa, sơntìl niam, sơntìl geh cồng nha, hơ\ sồng ală kỹ thuật pa, lơh sa suơn sre geh dờp bơta niam uă, phan lơh gơs geh bơta kuơ uă, geh bơta pràn pơr lòng tàm drà kă bro, cèng wơl bơta kuơ lơh sa uă ai gah lơh sa suơn sre in.”

Ală bơta [uơn mờ bơta lòng bal mờ ală cồng nha neh lơh geh bơh nam 2016 dê geh là bơnàng jă nàng gah lơh sa suơn sre càr Daklak geh dùl rơndap broă di, dong gah lơh sa suơn sre càr dê lơh geh khà bơtàu tơnguh tàm nam 2017 bơh 4,5 tus 5% bè Nghị quyết càr neh ai tơlik.

          Cau cih mờ yal tơnggit K’Duẩn