VOV4.K’ho- Drim ngai 20/4, Ƀộ Lao động, Thương ƀiñ mờ Xã hội pơgồp bal mờ Mpồl lơh broă dunia bơyai lơh Pơrjum sền sơ wì 10 nam lam lơh broă lơh gàr ờdo ờdă rài kis mpồl bơtiàn Việt Nam tơngai bơh nam 2012 tus nam 2022- Gùng dà mờ bơta pah gời. Jơnau yal tàm pơrum đơs loh: Tơnơ̆ 10 nam lơh jat Nghị quyết sồ 15 bơh Ƀan Cấp hàñ Đảng dà lơgar dê, broă lơh gàr niam ờdo ờdă rài kis mpồl bơtiàn ai làng bol in lơh geh uă cồng nha kuơmàng.

Ală broă lơh gàr ờdo ờdă rài kis mpồl bơtiàn gam hời rơ hời geh lơh jat gùng dà jat tàm gơnoar geh gàr ờdo ờdă rài kis bơh làng bol dê. Gơnoar bơh cau ùr, kơnòm dềt, cau dờng sơnam, cau kuet kơltê mờ ală cau ờ pràn dê geh gàr niam rlau. Tàm 10 nam do, kờp bal pah nam gùt lơgar bơsong broă dong kờl dùl dơ̆ ai bơh 6 tus 8 rbô nă cau geh màng mờ kac màng in mờ tŭ do gùt lơgar geh rlau 1 tơlak 300 rbô nă cau geh màng mờ kac màng gam geh dong kờl pah nhai. Kờp bal pah nam ai geh broă lơh tàm lơgar ai bơh 1 tơlak 500 rbô tus 1 tơlak 600 rbô nă cau in.

Cau mblàng K’Duẩn