VOV4.K’ho- 4 Nghị quyết bơh pơrjum dơ̆ 5, Ƀan Cấp hàñ Đảng dà lơgar khoă 13 dê là ală nghị quyết geh ală rơnàng kwang bàng, đảng viên mờ làng bol kơp gơn ngan. Do là ală gùng dà, broă lơh dờng ngan, di ngan bơh Đảng dê nàng bơsong ală gah broă lơh gam geh uă bơta pràn, lơh gơlik bơta pràn chul chồl ai bơtàu tơnguh lơh sa, mpồl bơtiàn in mờ lơh kơ̆ kơl jăp wơl bơ̆t bơtàu mpồl Đảng pràn kơldang. Đảng viên, làng bol, ală cau atbồ mờ ală cau jak chài kơp gơn ngan tàm 3 Nghị quyết chồl pràn bơtàu tơnguh gah lơh sa.

Nghị quyết sồ 18 bè “Pơn jat tai tam gơl pa, lơh sir adat boh lam, broă lơh, tơnguh cồng nha atbồ mờ ngui ù, lơh gơlik bơta pràn chul chồl ai lơgar he gơ gơs là lơgar bơtàu tơnguh geh priă jền lơh geh uă” là nghị quyết dờp geh bơta sền gròi uă ngan bơh tơl rơnàng làng bol dê. Ală bơta ờ niam tàm adat boh lam bè ù tiah mờ ală broă lơh geh gơ rềng tŭ do, lơh ờ hềt geh broă lơh geh cồng nha nàng bơsong ală rơndap broă ờ hềt lam lơh, bơta tơrgùm ù, broă lơh tơm wơl priă, khà priă ù... kung lơh kal ke ai uă càr, ƀòn dờng in tàm broă tơm wơl priă ai ù, dong kờl, rơndap wơl ƀòn ơm kis pa, ai wơl ù... Ồng Lưu Ngọc Hà, Củ tịc Ủy ƀan Ñân zân quận Bắc Từ Liêm, ƀòn dờng Hà Nội pà git: “Broă lơh ai wơl ù tàm tŭ atbồ, ngui ù tiah geh 2, 3 càr, ƀòn dờng gơtìp kal ke tŭ đal git bơta bơh lơi geh ù mờ bơta geh ngan ngui ù krơi is. Bè hơ̆ den tàng, broă lơh tơm wơl priă nàng tă bơsong kung bè geh jơnau pơlam den bol he hơ̆ sồng gơtùi bơsong broă ai wơl ù. Geh 1 bơta kal ke tai là tŭ do đal git khà priă tơm wơl mờ dong kờl ai ù ơm in lơyah rlau mờ khà priă drà kă bro dê, lơh gơbàn kal ke ngan tàm broă pơgồp bal bơh làng bol dê tàm broă ờ geh rơndap wơl tiah ơm kis pa mờ ù, mờ mìng geh rơndap wơl tiah ơm kis pa mờ hìu ơm”.

Nghị quyết sồ 18 mờ ală gùng dà, broă lơh dờng bè ù tiah bè lơh gơs broă tam gơl Adat Ù tiah nam 2013 mờ ală adat boh lam ndai geh gơ rềng.. geh kơp gơn ờ mìng bơsong ală bơta ờ niam tŭ do mờ gam gàr ai broă lơh atbồ ù tiah in geh lơh nền nòn, kràñ cê, geh cồng nha, ngui niam priă jền dờng ngan bơh phan kuơ geh is kuơmàng gơ wèt gơnoar ngui jơh gùt làng bol do dê. Mò Bùi Thị An, kwang atbồ Viện phan geh is, tiah ơm kis mờ Bơtàu tơnguh mpồl bơtiàn kơp kơnờm: “Tàm tŭ ngui ù tiah den bol he gơ tup uă broă lơh tìs, lơh gơbàn hoàc huơr bè kes priă kung bè lơh rài kis ờ uă nă làng bol geh tŭ gơtìp ờ niam. Bè hơ̆ den tàng, Nghị quyết sồ 18 geh ai tơlik tŭ do là di tŭ ngan, nàng kờñ ngui phan kuơ geh is là ù tiah, bơ tơl tai ai kes priă in, bơh hơ̆ bơta dia, jàu ù, tac bro ù tiah bơh drà kă bro dê lơh dipal rlau, ring bal rlau. Jat añ den dilah bol he lơh jat jơh nùs Nghị quyết sồ 18 do den geh gơtùi bơsong dùl ròt ală broă bè ù tiah mờ ală bơta ờ niam pà do”.

Ală càr, ƀòn dờng mờ làng bol lơh broă sa kung sền gròi uă ngan tus Nghị quyết sồ 19 bè “Lơh sa suơn sre, cau lơh broă sa, ƀòn lơgar” tus nam 2030, broă wèt sền tus nam 2045, do ờ mìng là bơta bơtàu tơnguh tàm tơrbŏ jŏ jòng bơh Nghị quyết sồ 26 Đảng dà lơgar khoă 10 dê bè lơh sa suơn sre, cau lơh broă sa, ƀòn lơgar mờ gam geh ală bơta bơtàu tơnguh pa, ală jơnau kờñ pa, gơguh jak mờ tam gơl loh làng ngan.

Dờp Nghị quyết pa, ồng Nguyễn Trí Ngọc, Phó Củ tịc Tổng Hội lơh sa suơn sre mờ Bơtàu tơnguh ƀòn lơgar Việt Nam pà git: Tàm nùs nhơm chờ hờp bơh broă bơt bơtàu ƀòn lơgar pa dê mờ muh mat ƀòn lơgar ngai sơlơ bơtàu tơnguh, niam bơnĕ, rài kis làng bol lơh broă sa ngai sơlơ geh tơnguh niam, Nghị quyết sồ 19 pa geh ai tơlik pơn jat tai là bơta niam pa lơh gơlik bơta pràn chul chồl pràn kơldang ngan ai tiah lơh sa suơn sre, ƀòn lơgar in. Gàr niam bơtàu tơnguh ring bal đah ƀòn lơgar mờ tiah drà, đah ală ù tiah, ală càr, ƀòn dờng jat gùng dà “Lơh sa suơn sre brê bơnơm, ƀòn lơgar tam gơl pa, cau lơh broă sa gơguh jak: “Nghị quyết pa ai tơlik ai gŏ bơta lơh ngan bơh jơh gùt anih lơh broă cíñ trị dê gơ wèt tus mờ broă lơh sa suơn sre, cau lơh broă sa, ƀòn lơgar. Nàng nghị quyết geh lam lơh jat ngan ngồn, jat bol hi den pal geh ală broă lơh tam gơl pa. Mìng is bè gah lơh sa suơn sre đơs bal, gah tam phan đơs is bol hi gŏ pal geh bơta tam gơl bè lơh sir Adat Ù tiah tài kơrnuat bè ù tiah geh gơ tha lơh nền tus broă bơtàu tơnguh lơh sa suơn sre, kuơmàng là bơtàu tơnguh lơh sa suơn sre phan bơna tac bro tŭ bol he tam gơl bồ tơngoh kơlôi sơnơng bơh lơh broă suơn sre gơs bồ tơngoh klôi sơnơng lơh sa suơn sre”.

Nghị quyết sồ 20 bè “Pơn jat tai tam gơl pa, bơtàu tơnguh mờ tơnguh cồng nha lơh sa mpồl bal tàm tŭ tơngai pa” neh đal git, đơs loh ală bơta ờ niam ờ jơnau bơh tài gam geh ală bơta ờ niam tàm tiah lơh sa mpồl bal. Nghị quyết neh đal git loh ală jơnau kờñ mờ ală kơnòl broă, broă lơh tờm ngan nàng bơtàu tơnguh lơh sa mpồl bal tàm tŭ tơngai pa. Kuơmàng là bơ tơl, lơh sir adat boh lam, mpồl lơh broă, broă lơh pơn jờng, dong kờl bơtàu tơnguh lơh sa mpồl bal, ală mpồl lơh sa lơh broă bal.

Cau mblàng K’Duẩn