VOV4.K’ho- Tàm nam 2022, Ƀộ Tài nguyên mờ Môi trường geh lơh mờ yal mờ Quôk hội in rơndăp broă lơh Adat Ù tiah (tam gơl). Do là dùl tàm sin kơnòl broă tờm bơh gah Tài nguyên mờ Môi trường dê ai tơlik tàm nam 2022.

Jăt mờ hơ̆, tơngume tam gơl tơrgùm tus rơndăp ù tiah mờ broă rơndăp lơh ngui ù, giă ù mờ broă sờr ntrờn ù tiah, ai wơl ù, khà ai ngui ù, tơngai ai ngui ù...Do là ală broă gam tìp uă kòl yan, lơh gơkòl tàm tŭ lơh jăt ală rơndăp broă lơh bơtàu tơnguh lơh sa- mpồl bơtiàn tàm ală tiah. Ƀộ trưởng Ƀộ Tài Nguyên mờ Môi trường ồng Trần Hồng Hà pà gĭt, broă tam gơl Adat Ù tiah dơ̆ do nàng kờñ lơh gơlik geh ală tơngume kơrnoăt boh lam wil tơl dùl ròt bal, ring bal nàng ătbồ, ngui geh cồng nha, ngui niam bơta pràn ù tiah lơh geh jơnau kờñ bơtàu tơnguh lơh sa- mpồl bơtiàn, sền gàr dà lơgar, lơngăp lơngai, sền gàr tiah ơm kis, gơdờp mờ tam gơl trồ tiah.

Cau mblàng Lơ Mu K’Yến