VOV4.K’ho- Tơngai lài, tàm càr Tây Ninh geh uă cau là làng bol Việt Nam, bơh mạng xã hội gơtìp ală cau pơn jồ lòt hờ lơgar Campuchia tìs mờ adat boh lam nàng lơh broă. Bơta geh ngan là uă ngan ală cau do tŭ tus lơgar Campuchia ndrờm gơtìp rồn bơklơn bơta pràn lơh broă, sồr pal lơh broă 11 jơ pah ngai, gơtìp pù pờng, geh tŭ gơtìp cau tờm kông ty tac bro tus kông ty ndai... tus tŭ git gŏ den mìng gam kơp gơn hìu bơnhă pơyua priă tơ wài să nàng geh rê wơl Việt Nam. Bơta do kung neh gơlik geh tàm ală càr Tây Nguyên sơl, làng bol pal rơcang ngac.

Cơldŭ Kảñ sát hìñ sự kwang àng càr Tây Ninh pà git, bơh bồ nam tus tŭ do neh dờp 21 sră dan dong klàs bơh ală hìu bơnhă là làng bol tàm càr geh cau tờm gơtìp pơr lồm lòt tus Campuchia nàng lơh broă mơya gơtìp rồn bơklơn. Ală cau lơh broă do dilah kờñ rê wơl Việt Nam den pal dờp priă tơ wài ai ală cau sồr in.

Kwang àng Tây Ninh lơh broă mờ hìu bơnhă ală cau gơtìp aniai (rùp CTV)

Jat 2, 3 hìu bơnhă yal, oh kòn khi dê neh pồn hìu bơnhă, lơh is sră lòt tus Campuchia lơh broă ai Kông ty Thiên đường trò cơi in. Hìu bơnhă mìng gơtùi hòi điện thoại mờ git anih kòn he lơh broă geh anih ơm, geh sàu sa, ai mùl màl rài kis bè lơi den ờ git loh. Kơlôi rơcang, ờ suk ơm là bơta geh bal bơh ală mè bèp dê tŭ dờp ală dơ̆ hòi điện thoại dan dong kờl bơh kòn he dê bơh đah ne tiah nhàr dà lơgar.

Bi Hồng, ơm tàm kơnhoàl Dương Minh Châu, càr Tây Ninh pà git, sền gŏ mè bòl glar, kòn ùr tơnhua bi dê nam do mìng rơp pa 17 sơnam, neh lơh ờm sră nggal nàng lòt tus Campuchia lơh broă mờ bơta kơp kờñ jòi priă dong mè in. Mơya, priă nhai bơh kòn dê ờ hềt gŏ, mìng gŏ cau mè tŭ do pal lòt làm bă tiah nàng leng càn priă jền kờñ tơ wài kòn he in rê: “Pa do, khai gŏ bơyô khai dê gơtìp pù pờng tơn jờk mờ đèng, gơtìp tac bro tus tềng do, tềng ne den tàng khai rơngòt ngan, hòi điện thoại dan dong kờl nàng geh rê Việt Nam gờñ. Añ kis dùl nă, bèp khai dê chơt gờñ, añ ờ gơtùi gròi sền mờ kung tài bơh lòt lơh broă ờ ru”.

Geh git, tơngai rềp ndo, bơta làng bol lòt tìs mờ adat boh lam tus Campuchia gơlik geh kal ke tài bơh jơnau kờñ jòi cau lơh broă ai ală casino tàm Campuchia gơguh uă. Bơh ală mạng xã hội bè Zalo, facebook, Wechat, Instagram... ală cau tàm Campuchia neh pờ tơlik jơnau tơnggit rơ wah cau lơh broă mờ priă nhai jơnhua ngan mờ tơl bơnah priă jền lòt rê geh cau tàm lơgar Campuchia tă tơm lài.

Kwang àng Tây Ninh sồr làng bol bañ iat ală jơnau pơn jồ (rùp CTV)

Tàm tŭ hơ̆, tŭ do khà uă ngan ơruh pơnu, kơnòm pa tàu Việt Nam den gam jòi broă lơh, den tàng tŭ sền gŏ ală jơnau hòi jà hơ̆ neh ƀuơn ngan ring bal. Tŭ cau jòi broă ring bal den ală cau do tàm yal jơnau mờ ală cau tàm lơgar Việt Nam nàng lam lơh gơs mpồl cau rơndap tap sèng, pơlam ai cau lòt lơh broă hờ lơgar ndai mờ gùng lòt tìs mờ adat boh lam tus Campuchia.

Bi Tùng, ơm tàm kơnhoàl Gò Dầu, geh kòn gam lơh broă tàm lơgar Campuchia kơlôi rơcang ngàn: “Priă nhai lơh geh den khi đơs là kờp tàm priă sàu sa, priă ơm, uă ngan, 1 nhai kung geh jơt nđờ tơlak đông, mơya khi kup wơl ờ ai dờp. Kòn añ dê đơs là loh game, ờ git lơh bè lơi mờ sồr lơh bơh 10 jơ drim tus 10 jơ mang, uă tŭ dà hùc kung ờ geh sơl”.

Bi Sen kung ơm tàm kơnhoàl Gò Dầu geh kòn gam lơh broă tàm lơgar Campuchia yal: Khai hòi điện thoại kung kờñ rê, khai đơs là mè rơcang priă nàng tơ wài kòn rê, tài geh bơyô khai dê pa lòt tus tềng hơ̆ là gơtìp tac tơn, 31 halà 34 tơlak đông tàm pơgap 2, 3 ngai là gơtùi rê. Khai đơs là pal rơcang lài bơh 30 tus 40 tơlak đông, ai ngan ngồn den ờ git là kàr lơi”.

Bơh jòi git, tŭ cau gơtìp pơrlồm tus Campuchia, dilah cau tờm kông ty gŏ cau lơh broă ờ di bè jơnau sồr khi dê den khi geh tac ală cau do ai ală cau tờm kông ty ndai in mờ khà priă jơnhua rlau mờ khà priă neh blơi lài hơ̆. Dilah cau gơtìp pơrlồm kờñ rê wơl hờ Việt Nam den hòi điện thoại hìu bơnhă in nàng pơyua priă tơ wài. Ală cau pơrlồm yal khà priă là 1 rbô 800 dolar Mỹ, ndrờm mờ 40 tơlak đông nàng tơ wài cau rê hờ Việt Nam, ai dilah ờ den geh tac tai ală kông ty ndai in, tŭ hơ̆ priă tơ wài geh gơguh jơnhua tai.

Tŭ do, Cơldŭ kảñ sát Hìñ sự kwang àng Tây Ninh neh geh uă broă lơh mblàng yal tus làng bol sồr rơcang ngac broă: bơh mạng xã hội, ală cau tơlik jơnau hòi jà uă broă lơh niam bè bè broă nggờc, priă nhai uă, lơh broă tàm Campuchia, mờ priă lơh geh kơ̆ kơljap rlau 20 tơlak đông pah nhai; ờ roh priă tă, ờ sồr geh mờng chài lơh broă, mìng kờñ git ngui măi tíñ... Do ngan ngồn là ală jơnau tơnggit lơh uă cau gam jòi broă lơh kờñ “tam gơl rài kis” hơ̆ sồng jòi tus ală dă neh geh sơn lài. Ai jat cơldŭ sền gàr lơngăp lơngai lơh broă mờ lơgar ndai kwang àng Tây Ninh, bơh nhai 9 nam 2021 tus tŭ do, mpồl lơh broă geh gơnoar lơgar Campuchia dê yal neh geh 9 nă cau gơ sơt is să, ntruñ bơh hìu jơnhua cờn, yồng ngko, ờ uă cau den roh thit ờ git loh jơnau bơh tài...

Gơ rềng tus cau tìs lik mờ mut hờ lơgar ndai tìs mờ adat boh lam, bơh ngai 01/01 tus ngai 01/4/2022, kwang àng càr Tây Ninh neh dờp sră yal 17 broă gơlik geh bal mờ 38 nă cau tìs geh gơ rềng (geh 2, 3 broă bơh nam 2021 ntrờn tus nam 2022), lah yă 9 broă, 16 nă cau tìs; gam lùp khàu 7 broă, 22 nă cau gơtìp yă. Bơh bồ nam tus tŭ do, geh 59 nă cau Việt Nam geh Đại sứ quán Việt Nam tàm Campuchia jàu rê wơl mờ tơngai tus do, geh tai 14 nă. Kwang àng càr Tây Ninh sồr, làng bol bañ iat jơnau pơn jồ lik lòt tìs mờ adat boh lam tus Campuchia jòi broă lơh. Mờ kung bañ dong ală cau jum cau lik lòt hờ lơgar ndai tìs mờ adat boh lam. Tŭ git gŏ ală cau geh tềl tơnggŏ lam cau lik lòt hờ lơgar ndai tìs mờ adat boh lam, pal yal anih lơh broă kwang àng rềp ngan rlau jơh in.

Thượng tá Trần Minh Kiệt, Phó kwang atbồ cơldŭ sền gàr lơngăp lơngai lơh broă mờ lơgar ndai Kwang àng Tây Ninh pà git: “Kwang àng Tây Ninh sồr làng bol bañ iat jơnau pơn jồ jòi broă nggờc, priă nhai uă tàm lơgar ndai. Kơp kờñ là làng bol jòi tus ală anih lơh broă geh gơnoar dà lơgar ai gơnoar jòi broă lơh mờ geh dong kờl, sền gàr gơnoar làng bol”.

Loh làng, jơnau kờñ jòi broă lơh là jơnau kờñ di pal. Bulah bè hơ̆, làng bol kung pal rơcang ngac nàng ờ gơ tup tàm ală dă, gơ gơs cau gơtìp pơr lồm bơh bol tac bro cau dê. Bơta do kung geh pơgồp bơnah gàr kơ̆ kơljap lơngăp lơngai tàm ƀòn lơgar.

Cau mblàng K’Duẩn