VOV4.K’ho- Tơngai sa tềp bơhiàn dà lơgar dê Ñâm Zần 2022 gam mờr tus rềp. Uă cau lơh broă, hìu bơnhă rƀah, hìu bơnhă cíñ sák (ngan là tiah làng bol jơi bơtiàn kòn cau dùl êt nă cau) kơlôi rơcăng bè dùl dơ̆ sa tềp ờ wil tơl tài bơh gơtìp gơrềng bơh kòp Kovid-19. Nàng làng bol lơi kung geh lơh sa tềp mờ “ờ cau lơi gơtìp lời ơm wơl bơh ngkời”, ală ngai do, uă broă lơh sền gròi kơlôi rơcăng sa tềp ai cau rƀah, làng bol tiah jơi bơtiàn kòn cau dùl êt nă cau geh rài kis kal ke in gam geh lơh làm gùt ală tiah tàm jơh gùt lơgar. Ală phan pà sơnam pa ram mhŭ bềng bơta nđàc dong làng bol ram nùs wă rò sơnam pa.

Neh geh tŭ là tiah bơtờp kòp bơh sơnrờp dờng ngan rlau jơh tàm càr Dăk Lăk dê gơbàn tàm tơngai lồi nhai 7 nam 2021 dê bal mờ 51 nă cau F0, ƀòn Ea Bhok, xã Ea Bhok, kơnhoàl Cư Kuiñ neh sơrlèt gan ală ngai ngòt rơngơ̆t nrơ̆t ndơl ngan. Mơya kơnờm bơta dong kờl di tŭ bơh gah lơh sơnơm dê mờ ală gah, ală kâp mờ gơnoar ătbồ dê, làng bol tàm ƀòn neh sơrlèt gan ală bơta kal ke hơ̆, rê wơl mờ ală broă lơh ờs mờng pah ngai. Ồng Nguyễn Văn Dũng là Củ tịc Ủy ƀan Ñân zân xã Ea Bhok pà gĭt, tàm tơngai ƀòn gơtìp wàng se, gơnoar ătbồ xã kung hòi jà ală cau geh nùs nhơm niam pà phan ngui sa pal geh, phe sa ai ală hìu bơnhă rƀah, hìu bơnhă gơtìp gơrềng tài bơh kòp Kovid-19 in nàng khi gờñ bè ờs wơl rài kis. Ală broă dong kờl kung geh tiah do lam lơh di tŭ sơl, ồng Nguyễn Văn Dũng là Củ tịc Ủy ƀan Ñân zân xã Ea Bhok, pà gĭt: Xã kung neh dan mờ Huyện ủy, Ủy ƀan dong kờl tơl nă cau F0 in bè hơ̆ là 10 kĭ phe, F1 rê tàm ƀòn lơgar là 5 kĭ phe. Ală cau lơh broă khăt gơboh is rê wơl hờ ƀòn lơgar den xã gam lơh jăt Kơrnoăt 68 nàng dong kờl ai làng bol in di tŭ nàng geh priă nàng làng bol in pơn jăt tai lơh sa tàm ƀòn lơgar mờ pơn jăt tai mblàng yal làng bol in là ờ gŏ sền ờ sơ̆p, ờ gŏ rơcăng ngăc, lơh jăt niam jơnau sồr 5K bơh Ƀộ Y tế dê.

Ờ gŏ di mìng is ƀòn Ea Bhok lơm, tàm jơh ală ƀòn lơgar bơh làng bol jơi bơtiàn kòn cau dùl êt nă cau dê gơtìp gơrềng tài bơh kòp Kovid-19 ndrờm geh dong kờl bè phe sa, puăc ka mờ sơnơm tơm ba...

Sa tềp bơhiàn Ñâm Zần 2022 gam mờr tus rềp ngan, Đảng, Cíñ phủ, Ủy ƀan Mặt trận dà lơgar Việt Nam gam sồr ală ƀộ, gah, ală càr mhar lòt sền, gĭt nền broă gơlik geh tàm rài kis bơh ală cau cíñ sak dê, làng bol jơi bơtiàn kòn cau dùl êt nă cau geh rài kis kal ke dê, gơtìp gơrềng tài bơh kòp dờng Kovid-19, gơtìp hoàc hươr tài bơh trồ tiah, kòp bơtờp geh pơhìn gơtìp jơgloh tàm nhai puh pah...nàng di tŭ dong kờl phe sa, biăp sa mờ pà phan, nàng hìu bơnhă lơi kung geh lơm phan sa tềp ram mhŭ mờ chờ hờp. Ồng Ta Rương Lương là Phó Củ tịc Ủy ƀan Ñân zân xã Hương Hữu, kơnhoàl Nam Đông, càr Thừa Thiên- Huế dê pà gĭt, ală ngai mờr tus rềp ngai sa tềp, uă ngan mpồl cau, cau dùl nă să is geh nùs nhơm niam neh tus còp, pà phan sa tềp ai làng bol jơi bơtiàn kòn cau Cơ Tu in tàm xã: Broă sền gròi kơlôi rơcăng ai hìu bơnhă cíñ sak, hìu bơnhă rƀah, ngan là hìu bơnhă làng bol jơi bơtiàn kòn cau dùl êt nă cau tìp kal ke tàm dơ̆ sa tềp do, là đah bơh Cơdlŭ lơh broă dê den Ủy ƀan Ñân zân kơnhoàl neh geh ală phan pà is, hơ̆ sồng là Cíñ phủ geh phan pà is nàng pà ai hìu bơnhă rƀah, hìu bơnhă kal ke in.

Nàng gàr niam ai làng bol in cau lơi kung geh sa tềp lơngăp lơngai chờ hờp, bal mờ phan pà bơh Củ tịc lơgar mờ bơh càr Thừa Thiên- Huế dê, Ủy ƀan Ñân zân kơnhoàl Nam Đông kung rơcăng rlau 4 tấn nggùl phe sa mờ 200 bơnah phan, tơl bơnah 500 rbô đong pà hìu bơnhă kal ke in. Ồng Nguyễn Thanh Bình là Phó Củ tịc Ủy ƀan Ñân zân càr Thừa Thiên- Huế pà gĭt: Càr sền gròi ngan dong kờl ală cau cíñ sák, cau rƀah, mờ làng bol jơi bơtiàn kòn cau dùl êt nă cau nàng làng bol in cau lơi kung geh lơm dùl dơ̆ sa tềp wil tơl ram mhŭ mờ chờ hờp. Ồng Nguyễn Thanh Bình, yal: Tàm bơta kòp bơtờp gơbàn kal ke ngan, ală hìu cíñ sac, hìu bơnhă rƀah mờ ală làng bol jơi bơtiàn kòn cau dùl êt nă cau tìp uă ngan kal ke bè phan sa ngui sa. Bol añ kung neh sền gròi nàng dong kờl di tŭ ai làng bol in tàm dơ̆ sa tềp do. Bal mờ hơ̆, càr kung neh sơlơ kờp sền ală hìu bơnhă rƀah, hìu bơnhă cíñ sac, hìu bơnhă jơi bơtiàn kòn cau dùl êt nă cau tàm A Lưới mờ Nam Đông mờ jàu kơnòl ai Ủy ƀan Ñân zân kơnhoàl A Lưới mờ Nam Đông in di tŭ dong kờl nàng làng bol geh dùl dơ̆ sa tềp gơ in wil tơl ngan mờ ram mhŭ ngan.

Dơ̆ sa tềp do, rlau 53 rbô hìu bơnhă làng bol jơi bơtiàn kòn cau dùl êt nă cau tàm 5 kơnhoàl tiah kơh bơnơm mờ 8 xã bơh ală kơnhoàl tiah ring càr Quảng Ngãi dê geh dờp phan pà sa tềp. Tơl bơnah phan pà kờp priă 180 rbô đong, tàm hơ̆ geh: Dà màn, tơngi sa, ƀòk ngòk...Do là broă dong kờl bàr pen bơta phan sa pal geh ai cau jơi bơtiàn kòn cau dùl êt nă cau in tàm dơ̆ sa tềp bơhiàn dà lơgar Ñâm Zần 2022. Ồng Nguyễn Thế Nhân là Phó Kwang ătbồ Ƀan Jơi bơtiàn kòn cau càr Quảng Ngãi pà gĭt, pah dơ̆ sơnam pa sa tềp tus, bal mờ ală bơnah phan pà bơh broă dong kờl do, ală tiah, ală mpồl cau gam tàm sơm băt tê bal cèng sa tềp ram mhŭ tus mờ làng bol mờ cau rƀah tiah kơh bơnơm jơnhoa. Ồng Nguyễn Thế Nhân, đơs: Bơdìh mờ broă dong kờl do, Ủy ƀan Mặt trận dà lơgar Việt Nam kung neh hòi jà dong kờl bal jơh ală hìu rƀah tàm ù tiah càr dê. Hòi jà mpồl bơtiàn tàm sơm băt tê bal dong kờl phan sa tềp ai làng bol jơi bơtiàn kòn cau dùl êt nă cau in mờ hìu bơnhă rƀah bal mờ hìu bơnhă mờr ndrờm bè hìu rƀah in.

Ƀộ trưởng, Củ ñiệm Ủy ƀan Jơi bơtiàn kòn cau ồng Hầu A Lềnh pà gĭt, dơ̆ sa tềp Ñâm Zần 2022, geh jơnau krơi is ngan pơndrờm mờ ală nam lài, tài bơh mùl geh uă hìu bơnhă rƀah, bal mờ bơta gơrềng tai uă ngan bơh kòp Kovid-19 dê sơlơ gơ gơs kal ke rlau. Bal mờ hơ̆, nam do kung là nam lơh jăt tơl jơnau sồr rƀah pa, den tàng khà hìu bơnhă rƀah kung uă rlau sơl. Ồng Hầu A Lềnh đơs: Broă còp, pà phan ai làng bol in tàm dơ̆ sa tềp nam do là broă lơh geh bơta kwơ dờng màng ngan nàng kờñ pơndờm pơnđiang, pơn jờng mờ tam pà bal kal ke mờ dong kờl ai làng bol in geh dùl dơ̆ sa tềp chờ hờp chờ hờñ, ram mhŭ jăt di nùs nhơm jơnau sồr lơh bơh Đảng, Cíñ phủ dê là ờ lời làng bol lơi ờ geh sa tềp.

Tàm tơngai do, uă cau lơh broă, uă hìu bơnhă làng bol jơi bơtiàn kòn cau dùl êt nă cau tàm tiah kơh bơnơm, tiah sar lơgar ngài gam kơlôi rơcăng ngan là lơh bè lơi nàng geh dùl dơ̆ sa tềp tơl hờm tàm tơngai bềng bơta kal ke bơh kòp bơtờp dê. Thứ trưởng Ƀộ Lao động, Thương ƀiñ mờ Xã hội ồng Lê Văn Thanh, pà gĭt: Ƀộ Lao động Thương ƀiñ mờ Xã hội bal mờ Ủy ƀan Mặt trận dà lơgar Việt Nam neh pơgồp bal nàng hòi jà tă pơgồp tàm Kes priă tài cau rƀah bal mờ ală priă jền ndai bơh mpồl bơtiàn dê tă pơgồp nàng lơh bè lơi jơh tơl nă làng bol ndrờm geh phan pà, bulah ờ tơl jơh, mơya lơh ngan uă ngan rlau jơh. Bal mờ hơ̆, Ƀộ kung neh sồr ală tiah sền gròi ai jơh tơl nă làng bol tàm ù tiah he dê in ndrờm geh sa tềp, ờ cau lơi gơtìp lời ơm wơl bơh ngkời mờ hòi jà tă pơgồp bơh uă priă jền ndai. Kwơmàng sền gròi ngan rlau jơh tus mờ cau rƀah, cau mpồl bơtiàn sền gàr dong kờl, ală cau do là cau ờ pràn ngan rlau jơh nàng khi in geh sa tềp mờ dong jơh tơl nă cau geh dùl dơ̆ sa tềp chờ hờp.

Mờ bơta sền gròi bơh Đảng, Cíñ phủ, Mặt trận dà lơgar Việt Nam mờ ală ƀộ gah sồr ală càr, ƀòn dờng sền gròi lơh jăt niam ală broă dong kờl ờdo ờdă rài kis mpồl bơtiàn mờ kwơ bal mpồl bơtiàn, sền gròi kơlôi rơcăng rài kis làng bol in, ngan là ală hìu bơnhă cíñ sac, cau geh rài kis kal ke, gơtìp gơrềng tài bơh kòp Kovid-19. Bơh hơ̆, pơgồp bơnah dong làng bol ală jơi bơtiàn kòn cau dùl êt nă cau đơs is mờ làng bol gùt lơgar đơs bal geh wă rò sơnam pa sa tềp bơhiàn dà lơgar dê Ñâm Zần 2022 ram mhŭ, ờdo ờdă; nàng jơh tơl nă cau, jơh tơl hìu bơnhă ndrờm geh sa tềp.

Cau cih VOV4- Cau mblàng Lơ Mu K’Yến