VOV4.K’ho- Bi Phạm Văn Lương, den nam 1987, ơm tàm ƀòn Mùi 1, xã Cư Né, kơnhoàl Krông Buk, càr Dăk Lăk, neh 2 dơ̆ lơh tìs mờ gơtìp anih cah rơña lơh glài kŭp jàm 7 nam 6 nhai. Tơnơ̆ tŭ jơh tơngai ơm jàm rê wơl tàm ƀòn lơgar, kơnờm nùs nhơm lơh ngan brồ guh bơh să tờm dê, bal mờ bơta pơdờm pơđiang dong kờl bơh hìu bơnhă mờ mpồl bơtiàn dê, bi  Phạm Văn Lương neh jơh nùs lơh sa gơ gơs cau tờm Hìu măy lơh mòn phan niam chài bơh dơm chi, phan ngui tàm hìu bơnhă mờ priă bơcri rlau 1 tơmàn đong. Geh cồng nha do, bi sùm jơh nùs dong kờl ală cau geh rài kis gơtìp lơh glài ơm jàm bè să tờm he dê tŭ rê wơl tàm ƀòn lơgar kis gơ rờm bal mờ mpồl bơtiàn.

Bi Lương (ào tơlir) bal mờ bàr pe nă kông ñân neh pal kong lơh glài kŭp jàm lơh broă tàm Hìu măy lơh mòn phan niam chài bơh dơm chi tàm xã Cư Né, kơnhoàl Krông Buk

Bol añ tus còp Hìu măy lơh phan mòn niam chài bơh dơm chi bơh bi Phạm Văn Lương dê, ơm tàm xã Cư Né, kơnhoàl Krông Buk, càr Dăk Lăk, tŭ bi gam bal mờ  mờr jơ̆t nă cau lơh broă gam trah mòn rùp dơm chi mờ lơh kơbàng, cơghế. Jà bol añ mŭt nggui tàm cơldŭ wă năc tàm hìu 2 cờn hùc dà cê den hơ̆ sồng tơm bơh bơr. Bi yal, ƀòn tờm ơm tàm càr Thanh Hoá, nam 10 sơnam bi jat hìu bơnhă mŭt tàm càr Dăk Lăk lơh broă sa mờ ơm kis. Ngai hơ̆ kung geh mè bèp ai lòt bơsram, mơya tài bơh hàm nhơl ir bal mờ ală cau bơyô, den sang tĕ broă bơsram sră. Tơnơ̆ dùl tơngai hàm nhơl, bi sac rơwah jat bơsram broă lơh dơm chi mờ trah mòn rùp dơm chi. Broă lơh do kung gam lam bi tìp dùl nă cau ờ niam sùm lòt mus kơl dơm chi kơñau mờ gơtìp lơh glài ơm jàm. Tài bơh lơh jat niam, bi geh toh glài mờ geh lik jàm lài mờ tơngai pơrgon 4 nhai. Rê tàm ƀòn lơgar, mờ bơta bàssìl, rơngòt ờ khin tài là cau neh gơtìp lơh glài, bal mờ bơta tàm pơn jồ bơh mpồl cau ờ niam dê, bi dùl dơ̆ tai lòt jat gùng lòt tìs, mờ broă lơh dong kờl blơi phan lơh geh bơh lơh sa suơn sre, mờ dùl dơ̆ tai pal ơm jàm. Rê wơl tàm hìu jàm, kơnờm geh bơta bơto pơlam bơh kwang bàng atbồ bơto bơtê, bi kơlôi sơnơng is pal tryang tryồng lơh jat broă lơh glài niam tàm hìu jàm nàng lik bơh hìu jàm lơh niam wơl rài kis. Lik bơh hìu jàm, geh bơta dong kờl bơh hìu bơnhă dê, bi blơi phan ngui, măy mok lơh broă trah mòn rùp dơm chi ơpah ai ală anih lơh broă tàm ƀòn dê. Tŭ geh bơta pin dờn bơh năc dê, bi càn priă bơcri blơi măy mok uă bơta nàng mòn lơh. Tus tŭ do, Hìu măy lơhmòn  phan bơh dơm chi bi dê kờp jơh khà priă bơcri rlau 1 tơmàn đong, geh mờr jơ̆t nă cau lơh broă, mờ priă nhai pah nhai bơh 7 tus 12 tơlak đong tơl nă cau. Bi Phạm Văn Lương đơs: Añ lơh niam wơl rài kis pa den añ mìng kơ̆p kờñ tơngkah tus mờ ală bơyô kơnòm să den ơm tĕ ală broă lơh tìs, ờ niam. Ală cau neh gơtŭp tìs bè añ den tŭ lơh jat broă lơh glài jơh rê wơl tàm ƀòn lơgar den bañ bàssìl, lơh wơl tĕ rài kis pa bơh sơnrờp, tài bơh ờ geh bơta lơi là jơla lơm ờ.

Hìu măy lơh mòn phan niam chài bơh dơm chi bơh bi Lương dê geh uă cau gơtìp lơh glài kŭp jàm geh bi dong kờl broă lơh tơnơ̆ tŭ rê wơl tàm ƀòn lơgar ơm kis

Bi Phạm Văn Lương wă loh ngan rài kis ală cau neh rlau lơh tìs dê rê wơl tàm ƀòn lơgar tơnơ̆ tŭ jơh tơngai lơh glài gơtìp uă ngan kal ke tàm broă gơ rờm bal mờ mpồl bơtiàn. Den tàng bè hơ̆, bi sùm lơh ngan dong kờl ală cau geh rài kis bè he. Tàm Hìu măy lơh phan mòn niam chài bơh dơm chi bi dê tŭ do geh 6 nă cau lơh broă là cau neh pal lơh jat broă lơh glài ơm jàm rê wơl. Bi Trương Văn Dương, deh nam 1997, ơm tàm xã Cư Kpô, kơnhoàl Krông Buk, là dùl tàm ală cau neh gơtìp lơh glài 2 nam jàm bè broă lơh tìs ngui tìs mờ kơrnoat boh lam ală ma túy, đơs: tơnơ̆ tŭ rê wơl tàm ƀòn lơgar, să tờm añ sùm bàssìl, rơngòt ờ khin ngan tài bơh là cau neh gơtìp lơh glài. Ờ gơdan ngan mờ ờ gĭt lơh bơta lơi, mìng ơm sùm gròn să tờm tàm hìu. Di tŭ hơ̆, bi Lương tus pơndờm pơnđiang, sồr tus tàm Hìu măy lơh mòn phan bơh dơm chi bi dê nàng bơsram broă. Kơnờm geh bơta dong kờl ai geh broă lơh bơh bi Lương dê, añ bơh tiah gơkòl ờ gĭt lơh bè lơi tŭ do neh jòi geh gùng lòt ai să tờm he dê. Tus tŭ do, añ lơh tàm Hìu măy lơh mòn phan bơh dơm chi bơh bi dê neh mờr 2 nam, priă nhai rlau 10 tơlak đong dùl nhai.

Bi Trương Văn Dương, đơs:Tŭ oh lik bơh hìu jàm rê tàm ƀòn lơgar den geh tìp mờ bi Lương, bi pơndờm pơnđiang mờ lơh loh bồ tơngoh ai oh in. Bi đơs ờ geh broă lơh lơi den lòt mờ añ bơsram, lơh mờ ờ duh pal kơlôi sơnơng halà bàssìl bơta lơi ờ. Bi dong kờl oh uă ngan, oh iang nùs mờ ờ lơh tìs tai. Ờ mìng pơndờm pơnđiang oh lơm gời, bi kung đơs mờ jơh oh mi tàm tiah lơh broă là pal pơnđơl pràn lơh ngan tàm broă lơh kung bè tàm rài kis, nàng tơnơ̆ do crơng gơs hìu bơnhă.

Jơh gùt kơnhoàl Krông Buk geh pơgap 150 nă cau lơh tìs adat boh lam pal kong lơh glài ơm jàm den rê wơl tàm ƀòn lơgar ơm kis. Trung tá Y Phía M’lô- Phó Kwang atbồ Mpồl lơh jat kơrnoat lơh glài kŭp jàm mờ dong kờl sền gàr adat boh lam Kwang àng kơnhoàl Krông Buk pà gĭt: Kơnờm lơh jat niam broă lơh mblàng yal, hòi jà mờ dong kờl broă lơh, den khà cau gơtŭp tìs wơl tàm kơnhoàl mìng ơm tàm khà hơđơm 0,8%. Jơh ală cau ơm jàm lik bơh hìu jàm mờ rê wơl tàm ƀòn lơgar ơm kis ndrờm lơh niam wơl nùs nhơm, tryang tryồng lơh broă sa. Tàm hơ̆, bi Phạm Văn Lương là krơh niam bơh ală cau gơtŭp tìs rê wơl tàm ƀòn lơgar kis gơ rờm bal mờ mpồl bơtiàn.

Trung tá Y Phía M’lô, đơs: Tŭ do, tàm ù tiah kơnhoàl Krông Buk geh cau pơn rơ jak ngan tơnơ̆ lơh jat bơta lơh glài ơm jàm rê wơl tàm ƀòn lơgar hơ̆ là bi Phạm Văn Lương. Bi Phạm Văn Lương sùm pơnđơl pràn lơh ngan sơr lèt gan bơta bàssìl, rơngòt ờ khin bơh să tờm dê, jơh nùs lơh broă sa; bơdìh hơ̆ den gam dong kờl ală oh mi pa lik bơh hìu jàm ndai dờp geh broă lơh. Kơnờm bơh hơ̆, bơta lơh tìs wơl bơh cau lik bơh hìu jàm tàm kơnhoàl Krông Buk dê sùm ơm tàm khà lơyah ngan rlau jơh.

Gùng lơh niam wơl rài kis là dùl gùng lòt bềng bơta bol glar, kal ke, bơta lòng, ngan là gơwèt mờ ală cau neh “ lơh tìs” pal kong lơh glài jàm mờ rê wơl tàm ƀòn lơgar. Mờ bơta sền gròi, pơndờm pơnđiang bơh mpồl kwang àng, gơnoar atbồ ală tiah, hìu bơnhă mờ mpồl bơtiàn, bơta lơh ngan brồ guh bơh să tờm dê neh dong bi Lương, bi Dương halà ală cau ndai tàm kơnhoàl Krông Buk sơr lèt gan bơta bàssìl, rơngòt ờ khin, ală bơta pơn jồ, hoài jà nàng lơh niam wơl rài kis, gơ gơs là ală làng bol geh kwơ ai hìu bơnhă mờ mpồl bơtiàn in.

Cau cih Tuấn Long- Cau mblàng K’Hạnh